គណៈកម្មាធិការជាតិរៀបចំការបោះឆ្នោត (គ.ជ.ប) នឹងបើកយុទ្ធនាការចុះឈ្មោះអ្នកបោះឆ្នោតជិតកន្លះលាននាក់ចាប់ពីថ្ងៃទី១ ខែតុលា ។ សម្រាប់អ្នកទើបគ្រប់អាយុ ១៨ឆ្នាំ ដែលត្រូវចុះឈ្មោះដំបូង គឺនឹងចាប់ផ្តើមពីថ្ងៃទី១ ដល់ថ្ងៃទី១៨ ខែតុលា ហើយ សម្រាប់អ្នកចុះឈ្មោះទូទៅ និងការពិនិត្យបញ្ជីឈ្មោះរបស់ពលរដ្ឋ នឹងចាប់ផ្តើមពីថ្ងៃទី១ តុលា ដល់ថ្ងៃទី៣១ ធ្នូ ឆ្នាំ២០១៨ នេះ។ គ.ជ.ប រំពឹងថានឹងអាចបន្ថែមចំនួនអ្នកបោះឆ្នោតជិតកន្លះលាននាក់ទៀតក្នុងបញ្ជីឈ្មោះអ្នកបោះឆ្នោតនៅឆ្នាំនេះ។
គណៈកម្មាធិការជាតិរៀបចំការបោះឆ្នោត (គ.ជ.ប) គ្រោងនឹងចុះឈ្មោះជូនដល់អ្នកបោះឆ្នោត ចំនួនជិតកន្លះលាននាក់ ដោយចាប់ផ្តើមពីដើមខែតុលា ឆ្នាំ២០១៨ នៅទូទាំងប្រទេស។ សម្រាប់អ្នកទើបគ្រប់អាយុ១៨ឆ្នាំ ដែលត្រូវចុះឈ្មោះដំបូង គឺនឹងចាប់ ផ្តើមពីថ្ងៃទី១ ដល់ថ្ងៃទី១៨ ខែតុលា ហើយសម្រាប់អ្នកចុះឈ្មោះ និងការពិនិត្យបញ្ជី ឈ្មោះរបស់ពលរដ្ឋទូទៅ នឹងមានរយៈពេល៣ខែចាប់ផ្តើមពីដើមខែតុលា ឆ្នាំ២០១៨ ផងដែរ។ នេះបើតាមសេចក្តីប្រកាសព័ត៌មានរបស់គ.ជ.បកាលពីថ្ងៃអង្គារ។
សេចក្តីប្រកាសព័ត៌មានដដែលបានបង្ហាញឲ្យដឹងថា ពលរដ្ឋគ្រប់អាយុ១៨ឆ្នាំ ដែលកើតមុន ឬ ត្រឹមថ្ងៃទី១ ខែមករា ឆ្នាំ២០០១ ត្រូវដល់អាយុចុះឈ្មោះបោះឆ្នោត ចាប់ពីថ្ងៃទី១ ខែ តុលា ដល់ថ្ងៃទី១៨ នៅតាមឃុំ សង្កាត់ ឬ កន្លែងស្នាក់នៅរបស់ពួកគេនៅតាមបណ្តាខេត្ត រាជធានីចំនួន២៥ ទូទាំងប្រទេសកម្ពុជា។ ដោយឡែក គ.ជ.ប បានប្រកាសថា ប្រតិទិននៃការពិនិត្យបញ្ជីឈ្មោះ និងការចុះឈ្មោះបោះឆ្នោតពលរដ្ឋជាទូទៅ មានរយៈពេល៣ ខែ ដែលនឹងចាប់ផ្តើមនៅថ្ងៃទី១ ខែតុលា ឆ្នាំ២០១៨ ហើយត្រូវបញ្ចប់នៅថ្ងៃទី៣១ ខែធ្នូ ឆ្នាំ២០១៨។
គ.ជ.ប បានទទូចដល់ពលរដ្ឋចំនួន ៤៨៩ ៩៦៣នាក់ ឲ្យទៅចុះឈ្មោះ និងពិនិត្យបញ្ជីឈ្មោះឲ្យបានគ្រប់គ្នា ដោយបានបញ្ជាក់ថាតាមខ្លឹមសារដើមថា៖
«ការពិនិត្យបញ្ជីឈ្មោះ និងការចុះឈ្មោះបោះឆ្នោតឆ្នាំ២០១៨នេះ គឺមានគោលដៅ ធានាឲ្យបញ្ជីបោះឆ្នោតមានភាពពេញលេញ ភាពត្រឹមត្រូវ និងមានបច្ចុប្បន្នភាព ប្រកបដោយសុវត្ថិភាព»។
ក្រៅពីការចុះឈ្មោះពលរដ្ឋខ្មែរដែលទើបគ្រប់អាយុ១៨ឆ្នាំ គ.ជ.បនឹងធ្វើការស្រង់និង លុបឈ្មោះ អ្នកដែលបានទទួលមរណៈភាព អ្នកដែលត្រូវបានដកសិទ្ធិបោះឆ្នោតជាបណ្តោះអាសន្ន អ្នកដែលផ្លាស់លំនៅឋាន ឬ ចេញពីឃុំសង្កាត់ បន្ថែមពីលើការអំពាវនាវដល់គណបក្សនយោបាយ និងអង្គការនានាឲ្យដាក់អ្នកឃ្លាំមើលការចុះឈ្មោះបោះឆ្នោត និងដំណើរការផ្សេងៗទៀត។ គ.ជ.ប ក៏បានបញ្ជាក់បន្ថែមថា ពលរដ្ឋចំនួន ៩៥ ៩២៨នាក់ (៩ម៉ឺន ៦សែននាក់) នឹងត្រូវលុបឈ្មោះចេញពីបញ្ជីបោះឆ្នោត។
លោក កន សាវាង្ស អ្នកសម្របសម្រួលនៃអង្គការឃ្លាំមើលការបោះឆ្នោតឯករាជ្យមួយ ឈ្មោះ ខុមហ្រ៊ែល (COMFREL) បានអះអាងថា នេះជាដំណើរការជាប្រចាំឆ្នាំធម្មតាដែលច្បាប់តម្រូវ។ លោកបានជំរុញដល់ពលរដ្ឋឲ្យចូលរួមក្នុងការចុះឈ្មោះនិងការពិនិត្យបញ្ជីឈ្មោះ ជាពិសេសការចូលរួមក្នុងដំណើរការប្រជាធិបតេយ្យនៅកម្ពុជា។
«សម្រាប់ប្រទេសប្រកាន់ប្រជាធិបតេយ្យរឿងសំខាន់ គឺការចូលរួមរបស់ប្រជាពលរដ្ឋ។ ការចូលរួមរបស់ប្រជាពលរដ្ឋហ្នឹង គឺការចូលរួមទាំងការបោះឆ្នោត ចូលរួមទាំងការ តាមដាន ចូលរួមទាំងការពិនិត្យ ចូលរួមទាំងមតិយោបល់ផ្សេងៗ តាមរយៈតំណាង របស់ខ្លួន។ អានេះជារឿងសំខាន់ណាស់សំរាប់ប្រជាពលរដ្ឋនៅក្នុងសង្គមដែលមាន និន្នាការប្រជាធិបតេយ្យ»។
លោក កន សាវាង្ស បានអំពាវនាវដល់ពលរដ្ឋឲ្យត្រៀមឯកសារបញ្ជាក់អត្តសញ្ញាណ រួមទាំងអត្តសញ្ញាប័ណ្ណ ដើម្បីចុះឈ្មោះបោះឆ្នោតនិងពិនិត្យបញ្ជីឈ្មោះបោះឆ្នោត នេះ។ លោក អះអាងថា គ.ជ.ប អាចទំនងជាចុះឈ្មោះអ្នកបោះឆ្នោតមិនអស់ទេ ដោយសារមានពលរដ្ឋ និងពលករចំណាកស្រុកជាច្រើនសន្ធឹកសន្ធាប់នៅក្រៅប្រទេសមិនអាចចុះឈ្មោះ បានព្រោះតែកម្ពុជាគ្មានប្រព័ន្ធចុះឈ្មោះក្រៅប្រទេស។
កាលពីការបោះឆ្នោតជាតិឆ្នាំ២០១៧ ពលរដ្ឋដែលបានចុះឈ្មោះនិងមានសិទ្ធិបោះឆ្នោតទាំងអស់ មានចំនួនជាង៨លាន៣សែននាក់ ក្នុងចំណោមពលរដ្ឋកម្ពុជាសរុបទាំងអស់មានចំនួនជិត១៦លាននាក់៕
