ភ្ជាប់​ទៅ​គេហទំព័រ​ទាក់ទង

បណ្ណាល័យ​សភា​នៃ​សហរដ្ឋ​អាមេរិក​ចាប់​ផ្តើម​បញ្ចេញ​បទភ្លេង​របស់​​ជាតិ


លោក ហារី ខននីក (Harry Connick Jr.) ត្រូវបាន​អញ្ជើញ​ទៅ​កាន់​បណ្ណាល័យ​សភា​នៅក្នុង​រដ្ឋធានី​វ៉ាស៊ីនតោនដើម្បីជួយ​ដល់​ការបើក​ការចេញផ្សាយ​គេហទំព័រ​មួយដែល​ផ្តល់ឲ្យ​នូវ​បទភ្លេង​ជាប្រវត្តិសាស្រ្ត​និង​ដ៏​កម្រ​ចំនួន​មួយ​ម៉ឺន​ទៅឲ្យ​សាធារណជន​​ជា​​ទម្រង់​ឌីជីថល ​ជាលើកទ

តន្ត្រីករដែល​បាន​ឈ្នះបានពានរង្វាន់​ ហ្ក្រាមមី (Grammy) លោក ហារី ខននីក (Harry Connick Jr.) ត្រូវបាន​អញ្ជើញ​ទៅកាន់​បណ្ណាល័យ​សភា​ នៅក្នុង​រដ្ឋធានី​វ៉ាស៊ីនតោន​នាពេលថ្មីៗ​នេះ ដើម្បីជួយ​ដល់​ការបើក​ការចេញផ្សាយ​គេហទំព័រ​មួយ ដែល​ផ្តល់ឱ្យ​នូវបទភ្លេង​ជាប្រវត្តិសាស្រ្ត​និង​ដ៏​កម្រ​ចំនួន​មួយ​ម៉ឺន​ ទៅឱ្យ​សាធារណជន​ជាទម្រង់​ឌីជីថល ​ជាលើកទីមួយ។ បណ្តុំ​ឯកសារ​បទភ្លេងដ៏ធំ​សម្បើម​នេះ​រួមមាន​តន្ត្រី​ប្រជាប្រិយ៍ ​ភ្លេង​ល្ខោន​អូប៉េរ៉ា ​និង​ភ្លេងហ្សាស (Jazz) ​ពីសម័យ​ដើម​ ក៏ដូចជា​កំណាព្យ​និង ​សុន្ទរកថា​នយោបាយ​ល្បីៗ។ អាល់​ ចូលសុន (Al Jolson), អាតទុរូ តូសកានីនី (Arturo Toscanini), អែនរីកូ ការ៉ូសូ (Enrico Caruso) និង ចច ហ្គឺស្សវីន (George Gershwin) គឺជាអ្នក​លេង​ភ្លេង​ដ៏ល្បីៗ​នៅ​ក្នុង​បណ្តុំ​បទភ្លេង ដែល​មាន​សម្រាប់​ការសិក្សា​និង​ការកោត​សរសើរ។

បណ្ណាល័យ​សភា​បាន​ចេញ​ផ្សាយ​គេហទំព័រ​ថ្មីមួយ​ ដែលបាន​បង្ហាញ​បទភ្លេងជា​ប្រវត្តិសាស្រ្ត​និង​ដ៏​កម្រ​ចំនួន​មួយ​ម៉ឺន ​ដែល​ឥឡូវ​នេះ​សាធារណជន​អាច​រក​ស្តាប់​បាន​ជា​ទម្រង់​ឌីជីថល​ និងជាលើក​ទីមួយ​ដោយ​ឥត​គិត​ថ្លៃ។

គេហទំព័រ​នេះ​ត្រូវបាន​គេហៅ​ថា​«ប្រអប់​ភ្លេង​របស់​ជាតិ»​ហើយ​ដែល​រួមមាន​បទភ្លេង​ពី​តន្រ្តីករ​ដ៏អស្ចារ្យ​ដូច​ជាលោក អាល់​ ចូលសុន (Al Jolson), អេឌី កងទ័រ (Eddie Cantor), អែនរីកូ ការ៉ូសូ (Enrico Caruso) អាតទុរូ តូសកានីនី (Arturo Toscanini), និង ចច ហ្គឺស្សវីន (George Gershwin)។

វាគឺជា​គម្រោង​សហការ​មួយ​រវាង​បណ្ណាល័យ​សភា​ និង​ក្រុមហ៊ុន​តន្រ្តី​កំសាន្តសូនី (Sony Music Entertainment)។ គេហ​ទំព័រ​នេះ​ផ្តល់​ឱ្យ​នូវលទ្ធភាព​នៃ​ការអាច​ចូលទៅមើលឬ​ស្តាប់បាន​តាម​ប្រព័ន្ធ​អ៊ីនធឺណិត​នូវ​តន្រ្តី​និង​ការថតសំឡេង​និយាយ​ជម្រើសៗ​យ៉ាង​ច្រើន​ដែល​ផលិត​នៅ​ក្នុង​សហរដ្ឋ​អាមេរិក​ រវាង​ឆ្នាំ​១៩០១និង​ឆ្នាំ១៩២៥។

លោក ជេមស៍ ប៊ីលលីងតុន (James Billington) បណ្ណារក្ស​នៃបណ្ណាល័យ​សភា បាន​បង្ហាញ​គម្រោង​ប្រអប់​ភ្លេង​ជាតិ ​នៅឯ​សន្និសីទ​សារព័ត៌មាន​មួយ​ នៅ​ក្នុង​រដ្ឋធានី​វ៉ាស៊ីនតោន ​ឌីស៊ី (Washington DC)។

លោក​មាន​ប្រសាសន៍​ថា៖ «វារួម​មាន​បទភ្លេង​ហ្សាស​ពីដើម សុន្ទរកថា​ល្បីៗ កំណាព្យ រឿង​កំប្លែង ល្ខោន​អូប៉េរ៉ា បទ​ភ្លេង​រាំ​ ជាមួយ​នឹង​ព័ត៌មាន​ផលិត​កម្ម​ផ្លូវការ​ សម្រាប់​បទភ្លេងនីមួយៗ»។

បណ្ណាល័យ​សភា​ផ្ទុក​បណ្តុំ​បទភ្លេង​ដែល​ត្រូវ​បាន​ថត​ទុកជា​ប្រវត្តិ​សាស្រ្ត​ ដ៏ធំ​ជាង​គេ​បង្អស់​មួយ​នៅ​ក្នុង​សហរដ្ឋ​អាមេរិក។ បទភ្លេង​ទាំង​នេះ​ត្រូវ​បាន​រក្សា​ទុក​ជា​ប្រព័ន្ធ​ឌីជីថល​នៅឯ​កន្លែងរក្សា​ទុក​ពិសេស​មួយ​ នៅ​ក្នុង​រដ្ឋ​ Virginia។

បទភ្លេង​ផ្សេងៗ​នៃ​គម្រោង​ប្រអប់​ភ្លេង​របស់​ជាតិ គឺចេញ​មកពី​កន្លែង​រក្សា​ទុក​នេះ។

លោក​រីឆាត​ ស្ទ័រី (Richard Story) គឺជា​ប្រធាន​ក្រុមហ៊ុន​ក្រុម​តន្រ្តី​ពាណិជ្ជកម្ម​ (Commercial Music Group) នៃ​ក្រុមហ៊ុន​តន្រ្តី​កំសាន្ត​សូនី។

«បញ្ជីរាយ​បទភ្លេង​ទាំងនេះ​ផ្ទុក​ទៅដោយ​បណ្តុំ​បទភ្លេង​ដ៏​គួរ​ឱ្យចាប់​អារម្មណ៍​មួយ​នៃ​រតនៈ​វត្ថុ​ដែល​ត្រូវ​បាន​ថត​ទុក ហើយ​ដែលបាន​បង្ហាញ​អំពីប្រភព​និង​ការវិវត្តន៍​នៃ​តន្រ្តី​អាមេរិកាំង។ ទាំង​នេះ​គឺ​ជា​បទភ្លេង​របស់​សិល្បករ ​ដែល​មាន​ឥទ្ធិពល​និង​សារៈសំខាន់​ជាង​គេ​បំផុត»។

លោក អឺប៊ី ប្លែក (Eubie Blake) គឺជាមនុស្ស​ម្នាក់​ក្នុង​ចំណោម​សិល្បៈករ​ទាំង​នោះ។

នៅក្នុង​វគ្គវីដេអូ​ខ្លី​មួយ ដែលមាន​នៅ​ក្នុង​គម្រោង​បទភ្លេង​របស់ជាតិ​ លោក​បាន​សម្តែង​នៅ​ក្នុង​បទ​ចម្រៀង​ដែល​មាន​ចំណង​ជើង​ថា «ខ្ញុំ​ស្រលាញ់ ហារី (Harry) ខ្លាំង​ណាស់​» ដែលលោក​បាន​តែង​នៅ​ក្នុង​ឆ្នាំ​១៩២១។

យោង​តាម​ ឌឺអាណា (DeAnna) គម្រោង​ប្រអប់​ភ្លេង​របស់​ជាតិ​ បាន​ចេញ​ផ្សាយតែ​មួយ​ផ្នែក​នៃ​អ្វី​ដែល​នឹង​ត្រូវ​ដាក់​ចេញ​តែ​ប៉ុណ្ណោះ។

«យើង​គិត​ថា គម្រោង​ប្រអប់​ភ្លេង​របស់​ជាតិគឺ​មាន​ថាមពល​ណាស់​។ វាគឺជា​បណ្ណសារនៃ​សំឡេង​ជា​ប្រវត្តិសាស្រ្តដែល​វិវត្តន៍​ទៅមុខ​មួយ ហើយ​យើង​ចង់​ធ្វើ​ឱ្យ​វា​រីកចម្រើន​ឡើង ​ដើម្បី​បញ្ចូល​បទភ្លេងចំនួន​រាប់​ម៉ឺន​បន្ថែមទៀត នៅ​ក្នុង​ប៉ុន្មាន​ឆ្នាំ​បន្ទាប់​ទៅ​ទៀត»។

មាន​បទភ្លេង​ចំនួន​ប្រហែលមួយ​សែន​ នៅឯ​កន្លែងរក្សា​ទុកបទ​ភ្លេងក្នុង​រដ្ឋ​Virgina។​ អ្នកទស្សនា​គេហទំព័រ​របស់​ប្រអប់ភ្លេង​ជាតិ ឥឡូវ​នេះ​អាចបើក​ស្តាប់​បទភ្លេង​ចំនួន​មួយ​ម៉ឺន​ក្នុង​ចំណោម​បទ​ភ្លេង​ទាំង​អស់​ ដោយគ្រាន់​តែ​អាច​ទាញ​យក​សម្លេង​មក​ស្តាប់តែប៉ុណ្ណោះ។​ ហើយ​ពួកគេ​ក៏អាច​បើក​មើល​រូបភាព​ស្លាក​សញ្ញា និងជីវប្រវត្តិ​របស់​អ្នក​សម្តែងរាប់​ពាន់​នាក់​ផងដែរ។

គេហទំព័រ​របស់​គម្រោង​ប្រអប់​ភ្លេង​របស់​ជាតិ​ គឺ www.loc.gov/jukebox/។

ប្រែ​សម្រួល​ដោយ ឌី ខាំបូលី

XS
SM
MD
LG