នៅថ្ងៃពុធនេះ ធនាគារជាតិនៃកម្ពុជា ប្រកាសឲ្យប្រជាពលរដ្ឋខ្មែរប្រុងប្រយ័ត្នចំពោះការប្រើប្រាស់សេវាកម្ចីរហ័សក្រៅផ្លូវការដែលមិនមានឯកសារ ឬទ្រព្យបញ្ចាំ ដើម្បីជៀសវាងការប្រឈមនឹងហានិភ័យផ្សេងៗ។ នេះបើតាមសេចក្តីប្រកាសព័ត៌មានរបស់ធនាគារជាតិនៃកម្ពុជាដែល VOA ទទួលបាន។
ក្នុងសេចក្តីប្រកាសព័ត៌មានរបស់ធនាគារជាតិនៃកម្ពុជា ចេញនៅថ្ងៃទី៣ ខែតុលា ឆ្នាំ២០១៨នេះ ស្តីពីការផ្សព្វផ្សាយឥណទានតាមបណ្តាប្រព័ន្ធទូរស័ព្ទ បញ្ជាក់ថា នាពេលថ្មីៗនេះមានការផ្ញើសារទាក់ទងក្នុងប្រព័ន្ធទូរស័ព្ទ ឃោសនាផ្តល់ប្រាក់កម្ចីរហ័សដោយមិនចាំបាច់មានឯកសារ ឬទ្រព្យបញ្ចាំនៅទូទាំងប្រទេស។ ធនាគារជាតិបន្ថែមក្នុងសេចក្តីប្រកាសព័ត៌មាននោះថា ការផ្តល់កម្ចីបែបនោះ គឺជាអំពើខុសច្បាប់ស្តីពីគ្រឹះស្ថានធនាគារ និងហិរញ្ញវត្ថុ ដោយថាក្រុមហ៊ុន ឬបុគ្គលទាំងនោះមិនទទួលបានការអនុញ្ញាតឲ្យផ្តល់សេវាប្រាក់កម្ចីពីធនាគារជាតិនៃកម្ពុជានោះទេ។
សេចក្តីប្រកាសរបស់ធនាគារជាតិបានបន្ថែមថា៖
«សូមសាធារណៈជនមេត្តាជ្រាបជាព័ត៌មាន និងមានការប្រុងប្រយ័ត្ន ដើម្បីជៀសវាងការប្រើប្រាស់សេវាកម្ចីក្រៅផ្លូវការ ដែលអាចប្រឈមនឹងការចាញ់បោកល្បិចកលរបស់ឈ្មួញចងការប្រាក់ និងហានិភ័យផ្សេងៗជាយថាហេតុ»។
VOA មិនអាចទាក់ទងសុំការអត្ថាធិប្បាយពីអ្នកស្រី ជា សិរី អគ្គនាយកធនាគារជាតិនៃកម្ពុជាបានទេ រហូតដល់ល្ងាចថ្ងៃពុធនេះ។
សេចក្តីប្រកាសព័ត៌មានរបស់ធនាគារជាតិកម្ពុជា ធ្វើឡើងខណៈដែលក្រុមហ៊ុនផ្តល់កម្ចីជាច្រើនកំពុងធ្វើប្រតិបត្តិការតាមរយៈការផ្ញើសារតាមទូរស័ព្ទ ការផ្សព្វផ្សាយតាមបណ្តាញសង្គមហ្វេសប៊ុក ក៏ដូចជាការចែកខិត្តបណ្ណផ្សេងៗជាច្រើន ដែលរៀបរាប់ពីការផ្តល់កម្ចីមានការប្រាក់ខ្ពស់ តែមិនចាំបាច់តម្រូវឲ្យមានវត្ថុបញ្ចាំ។
លោក ង៉ែត ជូ អ្នកជំនាញផ្នែកសេដ្ឋកិច្ចនិងជាទីប្រឹក្សាសេដ្ឋកិច្ចនៃក្រុមហ៊ុន Emerging Markets Consulting (EMC) បានប្រាប់ VOA ថា ការប្រកាសរបស់ធនាគារជាតិនៅពេលនេះ គឺជាវិធានការល្អក្នុងការទប់ស្កាត់ និងកាត់បន្ថយការខ្ចីប្រាក់ពីការផ្តល់កម្ចីទាំងនោះ។ លោកថា ការផ្តល់កម្ចីបែបនោះមិនតម្រូវឲ្យមានឯកសារ ឬវត្ថុបញ្ចាំនោះទេ ប៉ុន្តែពួកគេតម្រូវឲ្យអ្នកខ្ចីបង់ការប្រាក់ខ្ពស់ ដែលធ្វើឲ្យប្រជាពលរដ្ឋអ្នកខ្ចីអាចប្រឈមនឹងហានិភ័យ។
លោកបញ្ជាក់ថា៖
«ជួនកាលគាត់មានកម្ចីនៅធនាគារ ឬក៏គ្រឹះស្ថានមីក្រូហិរញ្ញវត្ថុដែលគាត់កំពុងលំបាកសង ហើយគាត់មានតម្រូវការហិរញ្ញវត្ថុបន្ថែម ជាសម្ពាធអីផ្សេងៗ ឬក៏គាត់ពិបាកក្នុងការរកប្រាក់សងគ្រឹះស្ថានមីក្រូហិរញ្ញវត្ថុហ្នឹង គាត់អាចរត់ទៅរកកម្ចីក្រៅផ្លូវការហ្នឹងឯង។ អញ្ចឹងវាងាយមានបញ្ហាផ្នែកខាងវិបត្តិហិរញ្ញវត្ថុខ្លាំងណាស់ សម្រាប់អ្នកដែលគាត់ខ្ចីប្រភពទុនដែលមិនមានការគ្រប់គ្រងច្បាស់លាស់ហ្នឹង ដោយសារការប្រាក់ហ្នឹងវាថ្លៃ»។
លោក ង៉ែត ជូ ពន្យល់ពីមូលហេតុដែលក្រុមផ្តល់កម្ចីទាំងនោះនៅបន្តការផ្តល់កម្ចីដោយមិនមានឯកសារ ឬវត្ថុបញ្ចាំថា៖
«ជាទូទៅគាត់បន្តធ្វើសកម្មភាពហ្នឹង ដោយសារគាត់យកការប្រាក់ខ្ពស់ អញ្ចឹងហើយបើសិនណាឧទាហរណ៍ថាអតិថិជនដែលខ្ចីប្រាក់ហ្នឹង១០នាក់ មាន២នាក់ខូច បានន័យថា មិនមានលទ្ធភាពសង ក៏នៅមានអ្នក៨នាក់ទៀតមានលទ្ធភាពសង អញ្ចឹងគេអាចកាត់កង គិតគូរហានិភ័យហ្នឹងបាន ជាទូទៅ។ ដោយសារអត្រាការប្រាក់ហ្នឹងវាខ្ពស់មែនទែន»។
លោក ង៉ែត ជូ បន្ថែមថា រដ្ឋាភិបាលដែលជាស្ថាប័នពាក់ព័ន្ធ គួរប្រើយន្តការច្បាប់ក្នុងការរឹតបន្តឹងការផ្តល់កម្ចីបែបនេះឲ្យបានតឹងរ៉ឹងជាងមុន ដើម្បីធានាពីប្រសិទ្ធភាពនៃការការពារផលប្រយោជន៍របស់សាធារណៈជន។
ទំព័រហ្វេសប៊ុករបស់ក្រុមហ៊ុនផ្តល់កម្ចីមួយឈ្មោះ Brother Cash បានផ្តល់កម្ចីតាមរយៈប្រព័ន្ធអ៊ីនធឺណិត ដោយគណនាប្រាក់កម្រៃតាមរូបមន្ត ប្រាក់កម្រៃ = ប្រាក់កម្ចី x ចំនួនថ្ងៃប្រើប្រាស់ x អត្រាការប្រាក់។ ក្នុងគេហទំព័រដែលគ្រាន់តែបំពេញព័ត៌មានដើម្បីខ្ចីប្រាក់នោះ បានកំណត់ពីការខ្ចីប្រាក់ចំនួន២០០ដុល្លារ ក្នុងរយៈពេល១ថ្ងៃ ត្រូវបង់ការប្រាក់ចំនួន៣.៧ដុល្លារ។ ចំណែកការខ្ចីប្រាក់ចំនួន២០០ដុល្លារ ក្នុងរយៈពេល៣០ថ្ងៃ ត្រូវបង់ការប្រាក់ចំនួន១១១ដុល្លារ។
រហូតមកដល់ពេលនេះមិនទាន់មានការអះអាងណាមួយដែលបញ្ជាក់ពីប្រភពនៃក្រុមហ៊ុនផ្តល់កម្ចីដោយមិនត្រូវការឯកសារ និងវត្ថុបញ្ចាំ តែមានការប្រាក់ខ្ពស់ទាំងនោះនៅឡើយ៕
