ក្រសួងការបរទេសចិនបានឱ្យដឹងកាលពីថ្ងៃសុក្រ ទី១២ ខែមករាថា កងយោធានៃប្រទេសមីយ៉ាន់ម៉ាបានសម្រេចកិច្ចព្រមព្រៀងមួយជាមួយសម្ព័ន្ធភាពមួយនៃក្រុមទ័ពឈ្លបជនជាតិភាគតិចដែលយោធាបានប្រយុទ្ធប្រឆាំងនៅក្នុងផ្នែកឦសានប្រទេស។ រដ្ឋាភិបាលយោធាមីយ៉ាន់ម៉ាបានបញ្ជាក់ថា ព្រឹត្តិការណ៍នេះបានកើតមានមែន។
អ្នកនាំពាក្យក្រសួងការបរទេសចិនអ្នកស្រី Mao Ning បាននិយាយថា កិច្ចព្រមព្រៀងនេះបានសម្រេចនៅក្នុងកិច្ចចរចាសម្របសម្រួលដោយប្រទេសចិន នៅថ្ងៃទី១០ និងទី១១ ខែមករា នៅទីក្រុង Kunming ទីរួមខេត្តមួយរបស់ប្រទេសចិន ដែលស្ថិតនៅចម្ងាយប្រមាណ ៤០០គ.ម.ពីព្រំដែនមីយ៉ាន់ម៉ា។
អ្នកស្រីបានថ្លែងនៅក្នុងសន្និសីទកាសែតប្រចាំថ្ងៃនៅក្រុងប៉េកាំងថា៖ «ចិនសង្ឃឹមថា ភាគីពាក់ព័ន្ធនៅមីយ៉ាន់ម៉ាអាចអនុវត្តកិច្ចព្រមព្រៀងនេះដោយយកចិត្តទុកដាក់ មានការទប់ចិត្តជាអតិបរិមាចំពោះគ្នាទៅវិញទៅមកនិងដោះស្រាយបញ្ហាតាមរយៈការសន្ទនាគ្នានិងការពិគ្រោះយោបល់គ្នា។
លោកឧត្តមសេនីយ៍ទោ Zaw Min Tun អ្នកនាំពាក្យក្រុមប្រឹក្សាយោធាគ្រប់គ្រងប្រទេសបាននិយាយនៅក្នុងកំណត់សម្គាល់ជាសំឡេងទៅកាន់ពួកអ្នកកាសែតថា ភាគីទាំងពីរបានជួបគ្នានៅក្រុង Kunming ហើយនៅក្រោយការចរចាគ្នា បានយល់ស្របគ្នាអំពីកិច្ចព្រមព្រៀងឈប់បាញ់គ្នាបណ្តោះអាសន្នមួយ។
លោក Zaw Min Tun ថា៖ «យើងនឹងបន្តការពិភាក្សាគ្នា។ យើងនឹងបន្តធ្វើការដើម្បីពង្រឹងកិច្ចឈប់បាញ់គ្នា»។
កិច្ចព្រមព្រៀងឈប់បាញ់គ្នាមួយដែលត្រូវបានសម្រេចកាលពីពាក់កណ្តាលខែធ្នូ មិនត្រូវបានគោរពដោយភាគីណាមួយទេ។
អ្នកនាំពាក្យក្រសួងការបរទេសចិនអ្នកស្រី Mao បានថ្លែងថាសម្ព័ន្ធភាព Three Brotherhood Alliance ដែលមានកងទ័ពសម្ព័ន្ធភាពប្រជាធិបតេយ្យជាតិមីយ៉ាន់ម៉ា កងទ័ពរំដោះជាតិ Ta’ang និងកងទ័ព Arakan បានយល់ស្របគ្នាឱ្យមានការឈប់បាញ់គ្នាជាបន្ទាន់មួយ ឱ្យមានការដកទាហាននិងការដោះស្រាយជម្លោះតាមរយៈកិច្ចចរចាគ្នា។
អ្នកស្រី Mao Ning បានពោលថា៖ «ភាគីទាំងពីរបានសន្យាថានឹងមិនបំផ្លាញសុវត្ថិភាពជនជាតិចិនរស់នៅក្នុងតំបន់ព្រំដែន គម្រោងការចិននិងបុគ្គលិកចិននៅមីយ៉ាន់ម៉ាទេ»។
បណ្តាញព័ត៌មានឯករាជ្យមីយ៉ាន់ម៉ា បណ្តាញព័ត៌មានបរទេសនិងសេវាព័ត៌មានជាភាសាមីយ៉ាន់ម៉ាបានរាយការណ៍អំពីសេចក្តីលម្អិតស្រដៀងគ្នា តែគ្មានពាក្យសម្តីដោយផ្ទាល់ជាបន្ទាន់ពីសម្ព័ន្ធភាពនេះអំពីការឈប់បាញ់គ្នានេះទេ។
របាយការណ៍បណ្តាញព័ត៌មានបាននិយាយថា កងយោធាបានយល់ព្រមបញ្ឈប់ការទម្លាក់គ្រាប់បែកនិងការបាញ់ផ្តក់ដោយកាំភ្លើងធំនៅក្នុងរដ្ឋ Shan ដែលនៅជាប់ប្រទេសចិន។ ចំណែកឯសម្ព័ន្ធភាព Three Brotherhood Alliance បានយល់ព្រមបញ្ឈប់ការវាយលុករបស់ខ្លួននិងមិនវាយយកទីក្រុងនិងទីតាំងយោធាថែមទៀតទេ។
របាយការណ៍ទាំងនេះចែងថា កិច្ចឈប់បាញ់គ្នានេះនឹងមិនត្រូវអនុវត្តក្នុងតំបន់ឯទៀតៗនៃប្រទេសមីយ៉ាន់ម៉ាទេ។
ប្រទេសមីយ៉ាន់ម៉ាពោរពេញដោយអំពើហិង្សាដែលចាប់ផ្តើមមានក្រោយកងយោធាបានដករដ្ឋាភិបាលជាប់ឆ្នោតរបស់លោកស្រី Aung San Suu Kyi ចេញពីតំណែងកាលពីខែកុម្ភៈ ឆ្នាំ២០២១។ សម្ព័ន្ធភាព Three Brotherhood Alliance បានវាយលុកប្រឆាំងនឹងកងយោធាកាលពីខែតុលាហើយបានគ្រប់គ្រងក្រុង Laukkaing ដែលជាក្រុងសំខាន់មួយនៅជាប់ព្រំដែនចិនកាលពីសប្តាហ៍ទី ១ នៃខែមករា។
ការវាយប្រហារដោយសម្ព័ន្ធភាពនេះជាឧបសគ្គធំបំផុតនៅលើសមរភូមិសម្រាប់ពួកគ្រប់គ្រងយោធានៃប្រទេសមីយ៉ាន់ម៉ាតាំងពីកងទ័ពបានក្តាប់អំណាចមក។
ការប្រយុទ្ធភាគច្រើនកើតមានតាមព្រំដែនមីយ៉ាន់ម៉ាជាមួយប្រទេសចិន រារាំងពាណិជ្ជកម្មឆ្លងដែននិងធ្វើឱ្យមីយ៉ាន់ម៉ាមានអស្ថិរភាពថែមទៀត។ ប្រទេសមីយ៉ាន់ម៉ាជាសម្ព័ន្ធមិត្តយុទ្ធសាស្ត្រមួយរបស់ចិន ដែលមានសង្គ្រាមស៊ីវីលនៅក្នុងផ្នែកជាច្រើនរបស់ប្រទេស។
ប្រទេសចិនខ្វល់ខ្វាយអំពីកំណើនអំពើហិង្សានិងសុវត្ថិភាពពលរដ្ឋចិនក្នុងប៉ែកខាងជើងមីយ៉ាន់ម៉ា។ ចិនក៏បានបង្ក្រាបកិច្ចប្រតិបត្តិការឆបោកតាមអ៊ីនធើណិតដែលបាននាំយកក្រុមអ្នកធ្វើការចិនចូលក្នុងមីយ៉ាន់ម៉ាហើយបង្ខំពួកគេឱ្យធ្វើការ មានរួមទាំងនៅក្រុង Laukkaing ផងដែរ។
សម្ព័ន្ធភាពនេះបានអះអាងអំពីជ័យជំនះជាច្រើន មានរួមការវាយយកបានប៉ុស្តិ៍យោធាជាង ២៥០ ទីក្រុងប្រមាណ ១២ និងច្រកព្រំដែនធំៗប្រាំដែលគ្រប់គ្រងពាណិជ្ជកម្មជាមួយប្រទេសចិន។
លោក Zaw Min Tun បាននិយាយថា មីយ៉ាន់ម៉ានិងចិននឹងបន្តការចរចាគ្នាដើម្បីបើកច្រកពាណិជ្ជកម្មព្រំដែនជាថ្មី ដែលត្រូវបានបិទនៅក្រោយមានការប្រយុទ្ធគ្នា ហើយនៅពេលនេះច្រកព្រំដែនភាគច្រើនឬទាំងអស់ស្ថិតក្នុងកណ្តាប់ដៃសម្ព័ន្ធភាព Three Brotherhood Alliance៕
ប្រែសម្រួលដោយលោក ឈឹម សុមេធ
វេទិកាបញ្ចេញមតិ