អង្គការសង្គមស៊ីវិលនិងអង្គការសិទ្ធិមនុស្សក្នុងប្រទេសមីយ៉ាន់ម៉ា ឬភូមា កំពុងជំរុញឲ្យរដ្ឋាភិបាលធ្វើការស៊ើបអង្កេតឲ្យបានពេញលេញដល់ការស្លាបរបស់អ្នកកាសែតម្នាក់ខណៈដែលស្ថិតនៅការឃុំឃាំងរបស់ពួកយោធា។
លោក Aung Kyaw Naing ដែលគេស្គាល់ថា Par Gyi ជាអ្នកកាសែតភាសាភូមា បានត្រូវចាប់ខ្លួនកាលពីថ្ងៃទី៣០ ខែកញ្ញា បន្ទាប់ពីឆ្លងចូលក្នុងប្រទេសភូមានៅក្នុងការធ្វើដំណើររាយការណ៍មួយដោយចាកចេញពីផ្ទះរបស់លោកនៅក្រុង Mae Sot ក្នុងប្រទេសថៃ។
លោក Ye Aung នៃសមាគមអតីតអ្នកទោសនយោបាយភូមាបានប្រាប់ VOA ផ្សាយជាភាសាភូមាថា ក្រុមរបស់លោកនិងអង្គការសង្គមស៊ីវិលកំពុងទាមទារឲ្យធ្វើការស៊ើបអង្កេតឲ្យបានពេញលេញ។
លោកនិយាយថា មុនដំបូង យើងទាមទារឲ្យពួករដ្ឋអំណាចបង្កើតគណៈកម្មការមួយដើម្បីស៊ើបអង្កេតការសម្លាប់នោះ។
លោក Aung Kyaw Naing បានត្រូវឃុំខ្លួនបន្ទាប់ពីរាយការណ៍ពីការប្រយុទ្ធគ្នារវាងកងទ័ពរដ្ឋាភិបាលនិងពួកអ្នកប្រយុទ្ធជនជាតិភាគតិចការ៉ែន។ កាលពីសប្តាហ៍មុន កងទ័ពបានប្រកាសថា លោកត្រូវបានបាញ់សម្លាប់ដោយឆ្មាំការពារម្នាក់ខណៈដែលលោកព្យាយាមរត់គេចខ្លួន៕
