ស្ត្រីជាម្តាយរបស់កូន២នាក់ ដែលកូនទាំងពីរសុទ្ធតែមានសញ្ជាតិអាមេរិក ត្រូវបានបញ្ជូនទៅកាន់ប្រទេសម៉ិកស៊ិកវិញកាលពីព្រឹកថ្ងៃព្រហស្បតិ៍។ នេះបើតាមសម្តីរបស់មេធាវីរបស់អ្នកស្រី។ ការបណ្តេញចេញនេះបង្ហាញពីការផ្លាស់ប្ដូរគោលនយោបាយអាមេរិកចំពោះជនអន្តោប្រវេសន៍ដែលគ្មានឯកសារ។
លោក Ray Ybarra Maldonado បាននិយាយថា ស្ត្រីដែលរស់នៅក្នុងអាមេរិកដោយគ្មានឯកសារនោះត្រូវបានចាប់ឃុំខ្លួននៅក្នុងទីក្រុង Phoenix នៃរដ្ឋ Arizona កាលពីថ្ងៃពុធ នៅពេលដែលអ្នកស្រីបានឈប់ដើម្បីឲ្យគេត្រួតពិនិត្យនៅឯការិយាល័យអន្តោប្រវេសន៍អាមេរិកមួយ។
លោក Maldonado បាននិយាយថា «ខ្ញុំត្រូវបានស្ថានកុងស៊ុលម៉ិកស៊ិកប្រាប់ថា កូនក្តីរបស់ខ្ញុំត្រូវបានបញ្ជូនខ្លួនចេញពីសហរដ្ឋអាមេរិក»។
អ្នកស្រី Garcia de Rayos វ័យ ៣៦ឆ្នាំ បានត្រូវបានមន្ត្រីអន្តោប្រវេសន៍អាមេរិកត្រួតពិនិត្យជារៀងរាល់ឆ្នាំចាប់តាំងពីឆ្នាំ២០០៨មក នៅពេលដែលអ្នកស្រីត្រូវបានគេឃាត់ខ្លួនចំពោះការប្រើប្រាស់លេខសន្តិសុខសង្គម ឬហៅថា Social Security number ក្លែងក្លាយ ក្នុងអំឡុងពេលនៃការវាយឆ្មក់ទៅលើសួនទឹកមួយដែលអ្នកស្រីបម្រើការនៅទីនោះ។ កាលពីលើកមុនៗ អ្នកស្រីបានឆ្លើយសំណួរដែលសួរទៅកាន់អ្នកស្រី ហើយអ្នកស្រីអាចត្រឡប់ទៅផ្ទះបាន។
ប៉ុន្តែកាលពីល្ងាចថ្ងៃព្រហស្បតិ៍ នៅពេលដែលអ្នកស្រី Rayos ទៅចូលប្រជុំ អ្នកស្រីត្រូវបានគេចាប់ខ្លួន ហើយនីតិវិធីបញ្ជូនខ្លួនត្រូវបានចាប់ផ្តើម។ អ្នកស្រីបានរស់នៅក្នុងសហរដ្ឋអាមេរិកអស់រយៈពេលជាង២២ឆ្នាំមកហើយ៕
