ត្រីជិត៣០តោនបានងាប់នៅក្នុងបឹងទន្លេឆ្មាដែលជាបឹងអភិរក្សមួយនៅក្នុងខេត្តកំពង់ធំ ដោយសារកម្តៅនិងខ្យល់កន្ត្រាក់ ដែលជាហេតុបង្កឲ្យត្រីជាច្រើនតោននេះបានបាត់បង់ជីវិត។
លោក សុខ លូ អភិបាលខេត្តកំពង់ធំ បានថ្លែងប្រាប់ VOA តាមទូរសព្ទកាលពីរសៀលថ្ងៃអង្គារថា ខ្យល់កន្ត្រាក់ខ្លាំងរយៈពេលពីរបីថ្ងៃ រួមនឹងកម្តៅអាកាសធាតុ ដែលបណ្តាលឲ្យទឹកក្នុងបឹងទន្លេឆ្មាហួតឡើងរាក់ជាងមុន ជាហេតុបង្កឲ្យត្រីជាច្រើនតោននេះ បានបាត់បង់ជីវិត ចាប់តាំងពីថ្ងៃអាទិត្យសប្តាហ៍មុន។ លោកបានបញ្ជាក់ថា៖
«ដោយសារពីយប់ ២៨ ២៩ វាព្យុះ រយៈពេលជិតបីម៉ោង។ ហើយអាកាសធាតុខែនេះរៀងក្តៅហើយទឹករាក់ផង ធ្វើឲ្យមានបញ្ហានេះកើតឡើង។ និយាយរួម ព្រឹត្តិការណ៍នេះកើតឡើងសឹងរាល់តែឆ្នាំ ដោយសារតែតំបន់នេះទឹករាក់ ហើយកាលណាមានព្យុះវានឹងរងផលប៉ះពាល់ហើយបាទ។»
អភិបាលខេត្តកំពង់ធំដដែលបានបន្តថា តំបន់អភិរក្សបឹងទន្លេឆ្មា ដែលមានទំហំ៨.៣២៥ហិកតា ស្ថិតនៅឃុំពាមបាង ស្រុកស្ទោង ជាប់នឹងមាត់បឹងទន្លេសាបដែលមានត្រីងាប់ជារៀងរាល់ឆ្នាំ ជាពិសេសគឺនៅអំឡុងរដូវប្រាំង។
កម្ពុជាកំពុងទទួលរងឥទ្ធិពលព្យុះកម្តៅ អែលនីណូ (El Niño) ដែលបណ្តាលឲ្យអាកាសធាតុឡើងក្តៅខុសពីឆ្នាំមុនរហូតដល់ ៤០ អង្សា ទៅ៤២ អង្សា តាំងពីខែមីនាមកម៉្លេះ។ យោងតាមក្រសួងធនធានទឹកនឹងឧតុនិយម ឥទ្ធិពលព្យុះកម្តៅនេះនឹងបន្តដល់ចុងខែឧសភា ឆ្នាំ២០១៩។ ព្យុះកម្តៅក្នុងរដូវប្រាំងនេះក៏បានបណ្តាលឲ្យបឹងបួរមួយចំនួននៅក្នុងខេត្តដទៃទៀតរាំងស្ងួតផងដែរ។
សីតុណ្ហភាពនៅខេត្តកំពង់ធំដែលស្ថិតនៅចំកណ្តាលប្រទេសកម្ពុជាមួយនេះគឺស្ថិតនៅចន្លោះពី ៣៧អង្សា ទៅ៣៨អង្សា យោងតាមលោក សុខ លូអភិបាលខេត្តកំពង់ធំ។
ទោះបីជាបឹងទន្លេឆ្មាត្រូវបានអភិរក្ស និងមិនត្រូវបានអនុញ្ញាតឲ្យកសិករធ្វើការនេសាទក៏ដោយ ការបាត់បង់ត្រីក្នុងចំនួនច្រើននេះនៅតែប៉ះពាល់ដល់ការនេសាទរបស់កសិករនៅឆ្នាំក្រោយ។ នេះបើយោងតាមលោក ប៉ែន វណ្ណរិទ្ធិ នាយខណ្ឌជលផលខេត្តកំពង់ធំ។
លោក ប៉ែន វណ្ណរិទ្ធិ បាននិយាយប្រាប់ VOA តាមទូរសព្ទថា៖
«តាមពិតតំបន់ហ្នឹងជាតំបន់អភិរក្ស មិនឲ្យប្រជាជនចូលទេ ហើយត្រីគឺ ត្រីសម្រាប់ទុក មេពូជ ហើយយើងគិតវាពិតជាជះឥទ្ធិពលខ្លះហើយ វាចៀសមិនផុតតែត្រីមេពូជវាងាប់អស់ច្រើនអ៊ីចឹង វាជះឥទ្ធិពលដល់ការនេសាទនៅឆ្នាំក្រោយ វាបាត់បង់ត្រីមេពូជមួយចំនួន។»
អ្នកជំនាញជលផល លោក ប៉ែន វណ្ណរិទ្ធិ បន្ថែមថា បើអាកាសធាតុនៅតែបន្តបែបនេះ ត្រីនៅក្នុងបឹងទន្លេឆ្មានេះនឹងនៅតែបន្តងាប់។ ប៉ុន្តែលោកមានប្រសាសន៍ថា លោកចាត់វិធានការទប់ស្កាត់ការរាំងស្ងួតនេះ ដោយការដាក់កំប្លោកនៅលើបឹងទន្លេឆ្មាដើម្បីកាត់បន្ថយកម្តៅ។
លោកបានបន្តថា ត្រីដែលបានងាប់រាប់តោននេះគឺជាត្រីដែលងាយនឹងរងគ្រោះនៅពេលដែលទឹករាក់ហើយឡើងកម្តៅ។
«ប៉ុន្តែប្រភេទនេះគឺប្រភេទត្រីសទេ ដែលងាប់នេះនោះ ភាគច្រើនជាពពួកត្រីស្រកាសត្រូរាល ត្រីឆ្ពិន ត្រីស្រកែង ត្រីអីហ្នឹងណា។ ពពួកត្រីនេះវាត្រូវការកម្រិតអុកស៊ីសែនខ្ពស់ ព្រោះវាងាយនឹងងាប់ណាស់ វាខុសពីពពួកត្រីអណ្តែង ត្រីផ្ទក់ ត្រីរ៉ស់ ត្រីឆ្តោ វាមិនងាយទេពួកអាហ្នឹងនោះវាស៊ូ។»
លោក ចុក ជឿន អ្នកនេសាទដែលរស់នៅក្បែរទន្លេនេះបារម្ភពីការបាត់បង់ធនធានជលផល និងចំណូលរបស់លោកនៅក្នុងរយៈពេលពីរបីខែខាងមុខ បន្ទាប់ពីត្រីជាច្រើនតោននេះបានងាប់ រួមទាំងអាកាសធាតុក្តៅហែងដែលមិនអាចសន្និដ្ឋានបានជាមុន។
លោកបាននិយាយថា៖
«អាត្រីងាប់អ៊ីចឹង វាប៉ះពាល់ហើយ វាប៉ះពាល់ត្រង់ថា នៅរដូវដែលយើងខែប្រាំមួយ ខែប្រាំពីរអី ខែប្រាំបីអីត្រីវាត្រូវសាយភាយមកក្រៅ ដល់ពេលឥឡូវ ត្រីវាងាប់អស់អ៊ីចឹង វាយ៉ាប់នឹងប្រជាជនយើងនៅហ្នឹងនេសាទអត់បាន វាងាប់អស់ហើយ។»
លោកបានបន្ថែមថា៖
«ខ្ញុំបារម្ភខ្លាចមានព្យុះ មានខ្យល់កន្រ្តាក់អីមកទៀត ត្រីហ្នឹងស្លាប់ទៀតហើយ អ៊ីចឹងខ្ញុំដឹងទប់ស្កាត់ម៉េចឈ្នះ បើគ្រោះធម្មជាតិហ្នឹង ខ្ញុំដឹងធ្វើម៉េច។»
អាជ្ញាធរបានអនុញ្ញាតឲ្យប្រជាពលរដ្ឋនាំគ្នាប្រមូលយក ត្រីដែលងាប់ជិត៣០តោន នៅក្នុងបឹងនេះទៅធ្វើជាប្រហុក ឬផ្អក។
ទោះបីជាយ៉ាងណាក៏ដោយ ប្រៀបធៀបនឹងឆ្នាំមុនៗ ត្រីជិត ៣០តោន ដែលបានងាប់នៅក្នុងបឹងទន្លេឆ្មាឆ្នាំនេះ មានចំនួនតិច។ បើយោងតាមនាយខណ្ឌជលផលខេត្តកំពង់ធំ លោក ប៉ែន វណ្ណរិទ្ធិ ត្រីជិតមួយរយតោនបានងាប់កាលពីឆ្នាំ២០១៦ ពេលដែលបឹងទន្លេឆ្មានេះរីងស្ងួតហួតហែង៕
