ភ្ជាប់​ទៅ​គេហទំព័រ​ទាក់ទង

អាជ្ញាធរ​ខ្មែរ​ប្រើ​ឆ្កែ​ជួយ​តាម​រក​អ្នក​ភ្នំ​វៀតណាម

  • គង់ សុឋានរិទ្ធិ

ក្រុម​បុរស​ជនជាតិ​ដើម​តំបន់​ភ្នំ​វៀតណាម ឬ Montagnard ដើរ​តាម​ផ្លូវ​ចេញ​ពី​តំបន់​ព្រៃ​ជ្រៅ​នៅចម្ងាយ​​ប្រមាណ​៧០​គីឡូម៉ែត្រ​ភាគ​ឦសាន​​ក្រុង​បានលុង​ទី​រួម​ខេត្ត​រតនគីរី​កាល​ពី​ថ្ងៃ​ទី​២២ ខែ​កក្កដា ឆ្នាំ​២០០៤។ Reuters

មន្ត្រី​អាជ្ញាធរ​ទំនង​ជា​កំពុង​ប្រើ​ប្រាស់​សត្វ​ឆ្កែ​ដើម្បីស្វែង​រក​ចាប់​ខ្លួន​ជន​ជាតិ​ដើម​តំបន់​ភ្នំ​វៀតណាម​ដែល​កំពុង​លាក់​ខ្លួន​នៅ​ស្រុក​អូរយ៉ាដាវ ខេត្ត​រតនគិរី ​ដើម្បី​ស្វែង​រក​សិទ្ធិ​ជ្រក​កោន​ទៅ​កាន់​ប្រទេស​ទី​៣​ខណៈ​ដែល​មាន​ជនភៀស​ខ្លួន​បាន​កើន​ដល់ចំនួន​៣២​នាក់​កំពុង​លាក់​ខ្លួន​នៅ​ទី​នោះ។

​លោកឆាយ ធី ​អ្នក​សម្រប​សម្រួល​សមាគម​ការពារ​សិទ្ធិ​មនុស្ស​អាដហុក​ប្រចាំ​ខេត្ត​រតនគិរី ​បាន​ឲ្យ​ដឹង​ថា​ក្រុមជីវពល​ភូមិបាន​ប្រើ​សត្វ​ឆ្កែ​នៅ​ថ្ងៃ​ព្រហស្បតិ៍​នេះ​ដើម្បី​តាម​ប្រម៉ាញ់ជនម៉ុងតាញ៉ា​វៀត​ណាម​នៅ​ក្នុង​ព្រៃ។

លោក​បាន​បន្ថែម​ថា៖

«តាម​អ្នក​ភូមិ​ដែល​រាយការណ៍​មក​សមាគម​អាដហុក​យើង​ បញ្ជាក់​ថា​មាន​សន្តិសុខ​ភូមិ​ប្រើ​ប្រាស់​ឆ្កែ​បណ្តើរ​តាម​ព្រៃ​ដើម្បី​រុក​រក​ជន​ភៀស​ខ្លួន​ដែល​កំពុង​លាក់​ខ្លួន​ដោយសារ​កម្លាំង​ប៉ូលិស​មិន​អាច​រុក​តាម​តំបន់​ព្រៃ​បាន»។​

​ជន​ម៉ុងតាញ៉ា ​ដែល​ជា​ជនជាតិ​ដើម​ចារ៉ាយ​វៀតណាម​ចំនួន​១៣​នាក់​បាន​ភៀស​ខ្លួន​ជា​លើក​ដំបូង​មក​កាន់​ព្រៃ​នៃ​ខេត្ត​រតនគិរី​កាល​ពី​ចុង​ឆ្នាំ​២០១៤​ដើម្បី​គេ​ច​ពី​ការ​ធ្វើ​ទុក​បុក​ម្នេញ​របស់​អាជ្ញាធរ​វៀតណាម​ហើយ​អាជ្ញាធរ​វៀតណាមបាន​ស្នើ​ឲ្យ​អាជ្ញាធរ​កម្ពុជា​ចាប់​ពួក​គេ​បញ្ជូន​ត្រឡប់​ទៅវិញ។​នេះ​បើយោង​តាម​សេចក្តីរាយការណ៍​នានា។

ជន​ជាតិ​តំបន់​ភ្នំ​ទាំង​១៣​នាក់​កំពុង​ស្ថិត​ក្រោមការគាំពារ​របស់​រដ្ឋា​ភិបាល​កម្ពុជា​នៅក្នុង​ទីក្រុង​ភ្នំពេញ​ដោយ​មាន​កិច្ច​សហការ​របស់​ឧត្តម​ស្នង​ការ​អង្គការ​សហ​ប្រជាជាតិ​ទទួល​បន្ទុក​ជន​ភៀស​ខ្លួន។​

លោក​នាយ​ឧត្តមសេនីយ៍​ខៀវ សុភ័គ ​អ្នក​នាំពាក្យ​ក្រសួងមហាផ្ទៃ​មាន​ប្រសាសន៍​ថា​ជន​ម៉ុងតាញ៉ា​ពី​ប្រាំ​ទៅ​ប្រាំមួយ​នាក់​បាន​ទទួល​ការ​សម្ភាសន៍ដើម្បី​វាយ​តម្លៃ​ពី​លក្ខខណ្ឌ​នៃ​ការ​ទទួល​បាន​សិទ្ធិ​ជា​ជន​ភៀស​ខ្លួន​សម្រាប់​ទៅ​រស់​នៅ​ប្រទេស​ទី​៣។​ក៏​ប៉ុន្តែ ​លោក​បញ្ជាក់​ថា​នៅ​មិន​ទាន់​មាន​ការវាយតម្លៃ​ចុង​ក្រោយ​នៅឡើយ។

ក្នុង​ពេល​នេះ​មាន​ជនភៀស​ខ្លួន​តំបន់​ភ្នំវៀតណាម​ចំនួន​៣២​នាក់​កំពុង​លាក់​ខ្លួន​ក្នុង​ព្រៃ​នៃ​ឃុំយ៉ាទុង​ ស្រុក​អូរយ៉ាដាវ ​ខេត្ត​រតនគិរី ​ក្នុ​ងនោះ​មាន​ស្ត្រី​បី​នាក់។​ពួកគេ​មាន​អាយុ​ចាប់​ពី​២០​ឆ្នាំ​ឡើង​ទៅ។​ជន​ភៀស​ខ្លួន​ចុង​ក្រោយ​បាន​មក​ដល់​ខេត្ត​រតនគិរីកាល​ពី​ថ្ងៃ​ទី​១០​ខែកុម្ភៈ​និង​មាន​គ្នា​ចំនួន​៩​នាក់។

​លោក​នាយឧត្តមសេនីយ៍​ខៀវ សុភ័គ ​មាន​ប្រសាន៍​ថា​អាជ្ញាធរ​មាន​នាទី​ក្នុង​ការ​ស្វែង​រក​ការ​ពិត​លើ​អ្នក​លាក់​ខ្លួន​ទាំង​៣២​នាក់​នេះ។ ​ប៉ុន្តែ​លោក​បញ្ជាក់​ថា​លោក​មិន​បាន​ទទួល​ដំណឹង​អំពី​វិធានការ​ប្រើ​សត្វ​ឆ្កែ​ដើម្បី​តាម​ចាប់​ជនជាតិ​ចារ៉ាយ​វៀតណាម​ទាំង​នេះ​ទេ។

«បើ​មាន​ការ​លាក់​ខ្លួន​យើង​ត្រូវ​រក​ហើយ​ដើម្បី​ដឹង​ថា​ពិត​ឬ​មិន​ពិត»។

លោក​ងួន កឿន ស្នង​ការ​នគរបាល​ខេត្ត​រតនគិរី​មិន​ធ្វើ​អត្ថា​ធិប្បាយ​ណាមួយ​នោះ​ទេ​ដោយ​លោក​ថ្លែង​ថា​កំពុង​ជាប់​ប្រជុំ។

យ៉ាងហោច​ណាស់​មាន​ជនភៀស​ខ្លួន​វៀតណាម​បាន​មក​ដល់​ក្រុង​ភ្នំពេញ​ដោយ​ខ្លួន​ឯង​ចំនួន​១០​នាក់​ក្នុ​ងប៉ុន្មាន​ថ្ងៃ​ចុង​ក្រោយ​នេះ​ដើម្បី​ជួប​ជា​មួយ​ឧត្តមស្នងការ​អង្គការ​សហប្រជាជាតិ​ដើម្បី​ជនភៀស​ខ្លួន​ដើម្បី​ជួយ​ពួក​គេ។

លោកស្រី​វីវៀន តាន់​( Vivian Tan) ​អ្នក​នាំពាក្យ​ឧត្តម​ស្នង​ការ​អង្គការ​សហ​ប្រជាជាតិ​សម្រាប់​ជន​ភៀស​ខ្លួន​(UNHCR)​ប្រចាំ​តំបន់​មាន​ប្រសាសន៍​តាម​សារ​អេឡិក​ត្រូនិក​(អ៊ីម៉ែល)​នៅ​ថ្ងៃ​នេះ​ថា​អង្គការ​សហ​ប្រជាជាតិ​«បន្ត​ធ្វើ​ការ​តស៊ូមតិ​ជាមួយ​ក្រុម​អាជ្ញាធរ​កម្ពុជា​ដើម្បីឲ្យ​ជន​ភៀស​ខ្លួន​ម្នាក់ៗ​ដែល​ចង់​ស្វែង​រក​សិទ្ធិ​ជ្រក​កោនមាន​លទ្ធភាព​ទៅ​ដល់​ប្រព័ន្ធ​គ្រប់​គ្រង​ជន​ភៀស​ខ្លួន​របស់​ជាតិ​នៃ ​ប្រទេស​កម្ពុជា​ដូច​ដែល​ជន​ភៀស​ខ្លួន​ចំនួន​១៣​នាក់​ដំបូង​ដែរ»៕

XS
SM
MD
LG