ពលរដ្ឋអាមេរិកកាំងរាប់លាននាក់ ទទួលរងប៉ះពាល់ដោយព្យុះទឹកកករដូវរងារដែលបានបោកបក់មកលើបណ្តារដ្ឋភាគខាងកើតសហរដ្ឋអាមេរិកដែលបណ្តាលឲ្យមានទឹកកកដ៏ខ្លាំង និងធ្វើឲ្យដាច់ចរន្តអគ្គីសនីដល់អតិថិជនប្រមាណ១សែន ៣ម៉ឺននាក់។ នេះ បើតាមសេចក្តីរាយការណ៍របស់ទីភ្នាក់ងារព័ត៌មាន AFP។
មជ្ឈមណ្ឌលអាកាសធាតុជាតិអាមេរិក NWS បានបញ្ជាក់ថា ព្យុះទឹកកកនេះ បានបណ្តាលឲ្យមានការធ្លាក់ទឹកកកយ៉ាងខ្លាំង ទឹកភ្លៀងលាយជាមួយទឹកកក និងខ្យល់បោកបក់ខ្លាំងដែលធ្វើឲ្យប៉ះពាល់ដល់តំបន់ឆ្នេរភាគអាគ្នេយ៍និងកណ្តាលនៃមហាសមុទ្រអាត្លង់ទិច មុនពេលវាបក់បោកទៅកាន់តំបន់ New England និងទៅភាគខាងត្បូងប្រទេសកាណាដា។
មជ្ឈមណ្ឌលអាកាសធាតុជាតិអាមេរិកក៏បានព្រមានផងដែរថា ទឹកកកដែលធ្លាក់អាចមានកម្ពស់ប្រមាណ៣០សង់ទីម៉ែត្រចាប់ពីតំបន់ Ohio Valley ខាងលើភាគខាងជើងរហូតដល់តំបន់បឹង Great Lakes ភាគខាងក្រោមនៅថ្ងៃចន្ទ។
ប្រព័ន្ធផ្សព្វផ្សាយព័ត៌មានអាមេរិក បានរាយការណ៍ថា មនុស្សប្រមាណ៨០លាននាក់ បានស្ថិតនៅក្រោមការព្រមាននៃអាកាសធាតុនៃរដូវរងារនេះ។
មនុស្សប្រមាណ ២៣៥.០០០ នាក់ ពុំមានភ្លើងអគ្គិសនីប្រើប្រាស់កាលពីថ្ងៃអាទិត្យ តែនៅព្រឹកថ្ងៃចន្ទចំនួននេះ បានធ្លាក់ចុះមកនៅត្រឹមប្រមាណ១សែន ៣ម៉ឺននាក់វិញនៅតំបន់ឆ្នេរភាគខាងកើតនិងរដ្ឋ Kentucky ស្របពេលដែលបណ្តាញផ្គត់ផ្គង់អគ្គិសនី ត្រូវបានស្តារឡើងវិញ។ នេះ បើយោងទៅលើគេហទំព័រ PowerOutage.US។
សេវាដឹកជញ្ជូនទទួលរងការបង្អាក់ខ្លាំង ដោយជើងយន្តហោះប្រមាណរាប់ពាន់ត្រូវបានលុប ចោលហើយផ្នែកខ្លះនៃផ្លូវ Highway I-95 ដែលឆ្លងកាត់រដ្ឋត្រូវបានបិទនៅក្នុងរដ្ឋ North Carolina។
ជើងយន្តហោះប្រមាណជាង៣.០០០ ដែលហោះហើរក្នុងប្រទេស និងក្រៅសហរដ្ឋអាមេរិក ត្រូវបានលុបចោលកាលពីថ្ងៃអាទិត្យ។
អភិបាលរដ្ឋ Georgia លោក Brian Kemp បានប្រកាសដាក់រដ្ឋក្នុងស្ថានភាពអាសន្នកាលពីថ្ងៃសុក្រសប្តាហ៍មុនហើយរថយន្តឈូសទឹកកក មានភាពមមាញឹកក្នុងការសម្អាតផ្លូវនៅពេលរសៀល។
រដ្ឋ Virginia និងរដ្ឋ North Carolina ក៏បានប្រកាសស្ថានភាពអាសន្នផងដែរ ដោយសារបញ្ហាអាកាសធាតុនេះ៕
