ភ្ជាប់​ទៅ​គេហទំព័រ​ទាក់ទង

ពលរដ្ឋ​ខ្មែរ​រាប់​លាន​នាក់​បាន​ចេញ​ទៅ​បោះឆ្នោត

  • វីអូអេ​​ ខ្មែរ​

អ្នក​បោះឆ្នោត​ពិនិត្យ​ឈ្មោះ​នៅ​ការិយាល័យ​បោះឆ្នោត​មួយ​នៅ​ក្នុង​ខេត្ត​​កណ្តាល​កាល​ពី​ថ្ងៃ​អាទិត្យ​ទី​២៨ ខែ​កក្កដា​ ឆ្នាំ​២០១៣។
ស្ថានីយ៍​បោះឆ្នោត​នៅ​ទូទាំង​ប្រទេស​កម្ពុជា​បាន​បិទ​ទ្វារ​ហើយ​ដោយ​មាន​សេចក្តី​រាយការណ៍​ពី​ភាព​មិន​ប្រក្រតី​មួយ​ចំនួន​រី​ឯការ​រាប់​សន្លឹក​ឆ្នោត​បាន​ចប់​សព្វ​គ្រប់​នៅ​ស្ថានីយ៍​ភាគ​ច្រើន។

គណបក្ស​ប្រឆាំង​បាន​ប្រកាស​ថា​ខ្លួន​ជា​អ្នក​ទទួល​ជោគជ័យ​នៅ​ក្នុង​ការ​បោះឆ្នោត​នេះ​ខណៈ​ពេល​ដែល​គណៈកម្មាធិការ​ជាតិ​រៀបចំ​ការ​បោះឆ្នោត​នៅ​មិន​ទាន់​ប្រកាស​លទ្ធផល​នៅ​ឡើយ​រី​ឯ​គណបក្ស​ប្រជាជន​កម្ពុជា​របស់​លោក​នាយក​រដ្ឋមន្ត្រី​ ហ៊ុន សែន​បាន​ប្រកាស​ថា​ខ្លួន​ទទួល​បាន​៦៨​អសនៈ​និង​គណបក្ស​សង្គ្រោះជាតិ​បាន​៥៥​អសនៈ។

សេចក្តី​រាយការណ៍​នានា​ឱ្យ​ដឹង​ថា​មាន​ប្រជា​ពលរដ្ឋ​ជា​ច្រើន​បាន​ចេញ​ទៅ​បោះឆ្នោត​តាំង​ពី​ព្រឹក​ព្រលឹម​ស្រាងៗ​ដោយ​តម្រង់​ជួរ​យ៉ាង​វែង​ហើយ​មាន​សេចក្តី​រាយការណ៍​ពី​ទឹក​ថ្នាំ​ជ្រលក់​ម្រាម​ដៃ​អាច​ត្រូវ​គេ​លាង​ជម្រះ​បាន​យ៉ាង​ងាយ។

នៅ​ក្នុង​សេចក្តី​ថ្លែង​ការណ៍​មួយ​លោក​សម រង្ស៊ី​ប្រធាន​គណបក្ស​សង្គ្រោះជាតិ​បាន​អំពាវនាវ​ឱ្យ​ពលរដ្ឋ​រក្សា​ភាព​ស្ងៀមស្ងាត់​និង​កុំ​ឱ្យ​មាន​អំពើ​ហិង្សា​កើត​ឡើង​ដែល​នាំ​ឱ្យ​មាន​ភាព​ចលាចល​នៅ​ក្នុង​សង្គម។

គណៈកម្មាធិការ​ជាតិ​កំពុង​ប្រកាស​ជា​បណ្តើរ​នូវ​លទ្ធផល​ក្រៅ​ផ្លូវ​ការ។ ប៉ុន្តែ​លទ្ធផល​ផ្លូវ​ការ​នឹង​ដឹង​នៅ​ពេល​ក្រោយ​ទៀត៕
XS
SM
MD
LG