លោកស្រី Michelle Obama ភរិយាលោកប្រធានាធិបតី បារ៉ាក់ អូបាម៉ា បានអញ្ជើញទៅដល់ប្រទេសជប៉ុនហើយនៅក្នុងទស្សនកិច្ច៣ថ្ងៃ ដែលមានគោលដៅសង្កត់ការចាប់ផ្តើមកម្មវិធីដំបូងរបស់រដ្ឋបាលលោកអូបាម៉ា ហៅថា «Let Girls Learn» ដើម្បីដំឡើងការអប់រំដល់នារីជាច្រើនលាននាក់នៅជុំវិញពិភពលោក។
លោកស្រី អូបាម៉ាបានអញ្ជើញទៅដល់ក្រុងតូក្យូ នៅល្ងាចថ្ងៃពុធនេះ។ នៅថ្ងៃព្រហស្បត៍ លោកស្រីត្រូវជួបដាច់ដោយឡែកពីគ្នាជាមួយលោកនាយករដ្ឋមន្រ្តី Shinzo Abe និងលោកស្រីភរិយា Akie។ លោកស្រីក៏មានផែនការចូលគាល់ព្រះចៅអធិរាជ និងព្រះអគ្គមហេសីផងដែរ មុនអញ្ជើញទៅកន្លែងសំខាន់ទេសចរណ៍ Kyoto នៅថ្ងៃសុក្រ។
សេចក្តីថ្លែងមួយរបស់សេតវិមាននិយាយថា លោកស្រី Michelle Obama នឹងប្រកាសភាពជាដៃគូមួយរវាងសហរដ្ឋអាមេរិកនិងប្រទេសជប៉ុនលើការផ្តួចផ្តើមគំនិត «Let Girls Learn» ដែលមានគោលដៅជួយអប់រំនារី ៦២ លាននាក់ក្នុងពិភពលោកដែលមិនបានទៅសាលារៀន។
អង្គការ Peace Corps របស់អាមេរិក និងសមភាគីជប៉ុន ហៅ Overseas Cooperation Volunteers នឹងធ្វើការជាមួយគ្នានៅក្នុងយុទ្ធនាការនេះ។
នៅថ្ងៃសុក្រ លោកស្រីនឹងអញ្ជើញចេញដំណើរទៅប្រទេសកម្ពុជា ដែលជាប្រទេសដៃគូមួយក្នុងចំណោមប្រទេស១១ នៅក្នុងយុទ្ធនាការ "Let Girls Learn"។ ប្រទេសឯទៀតមាន Albanie, Benin, Burkina Faso, Georgie, Ghana, Moldova, Mongolie, Mozambique, Togo និង Uganda។
លោកស្រី Michelle Obama គឺជាភរិយាប្រធានាធិបតីសហរដ្ឋអាមេរិកកំពុងកាន់តំណែងទីមួយរបស់អាមេរិក ដែលនឹងអញ្ជើញទីទស្សនាប្រទេសកម្ពុជា។
នៅទីនោះលោកស្រីនឹងជួបជាមួយសមភាគីកម្ពុជារបស់លោកស្រីគឺ លោកស្រី ប៊ុន រ៉ានីហើយនិងក្រុមអ្នកស្ម័គ្រចិត្តអង្គការ Peace Corps អាមេរិក ដែលមានមុខនាទីសំខាន់នៅក្នុងការជួយពង្រីកកម្មវិធីអប់រំឲ្យនារីក្នុងប្រទេសកម្ពុជា៕
