ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

រដ្ឋាភិបាល​ម៉ិកស៊ិក ប្រកាស​សូមទោស​ជនជាតិ​ដើម​ម៉ាយ៉ាន


រាប់ពីស្តាំ ប្រធានាធិបតី​ម៉ិកស៊ិក​លោក Andres Manuel Lopez Obrador ប្រធានាធិបតី​ក្វាតេម៉ាឡា​លោក Alejandro Giammattei និង​រដ្ឋមន្រ្តី​ក្រសួង​មហាផ្ទៃ​អ្នកស្រី Olga Sanchez Cordero នៅក្នុង​ពិធី​ប្រកាស​សូមអភ័យទោស​ជា​ផ្លូវការ​ដល់​ជនជាតិ​ដើម​ម៉ាយ៉ាន នៅ​ថ្ងៃទី៣ ខែឧសភា ឆ្នាំ២០២១។

រដ្ឋាភិបាល​ប្រទេសម៉ិកស៊ិក​កាល​ពី​ថ្ងៃចន្ទ​ ទី៣​ ខែឧសភា​ បាន​ប្រកាស​សូមទោស​ជនជាតិ​ដើម​ភាគតិច​ម៉ាយ៉ាន​ជាផ្លូវការ​ ចំពោះ​ការ​ប្រព្រឹត្ត​ទង្វើ​ខុស​ឆ្គង​នានា​ប្រឆាំង​នឹង​ពួកគេ​ ចាប់​តាំង​ពី​យុទ្ធនាការ​គ្រប់គ្រង​ទ្វីប​អាមេរិក​ដោយ​អេស៉្បាញ។

ការ​ប្រកាស​សូមទោស​នេះ​ ត្រូវ​បាន​ផ្តួចផ្តើម​ឡើង​ដោយ​ប្រធានាធិបតី​ប្រទេស​ម៉ិកស៊ិក លោក Andrés Manuel López Obrador និង​សមភាគី​ក្វាតេម៉ាឡា​ គឺ​លោកប្រធានាធិបតី Alejandro Giammattei នៅ​ក្នុង​រដ្ឋធានី Felipe Carrillo Puerto បន្ទាប់​ពី​យុទ្ធនាការ​គ្រប់គ្រង​ទ្វីប​អាមេរិក​របស់​ម៉ិកស៊ិក​កាល​ពី​៥០០ឆ្នាំ​មុន។ លោកប្រធានាធិបតី​នៃ​ប្រទេសម៉ិកស៊ិក ​បាន​ថ្លែង​ដោយ​សំដៅ​ជាពិសេស​ទៅ​លើ​សង្គ្រាម​បែងចែក​វណ្ណៈ Caste War​ ​នៅ​ក្នុង​សតវត្សរ៍​ទី១៩។

ប្រធានាធិបតី​ប្រទេស​ម៉ិកសិក​រូបនេះ​បានថ្លែង​ដូច្នេះ​ថា៖ «យើង​សូម​អភ័យទោស​ជនជាតិ​ម៉ាយ៉ាន​ ចំពោះ​អំពើ​រំលោភបំពាន​នានា​ដែល​បាន​ធ្វើ​ឡើង​ដោយ​ប្រើ​អំណាច​បុគ្គល​ អំណាច​ប្រទេស​ និង​អំណាច​បរទេស​នៅក្នុង​អំឡុង​ពេល​យុទ្ធនាការ​គ្រប់គ្រង​អស់​រយៈពេល​៣សតវត្សរ៍​នៃ​ការ​គ្រប់គ្រង​ក្រោម​របប​អាណានិគម​ និង​២សតវត្សរ៍​នៃ​ឯករាជ្យ​របស់​ម៉ិកស៊ិក»។

ជម្លោះ​នេះ ​គឺ​ជា​ការ​ឆ្លើយតប​ទៅ​នឹង​ការ​បះបោរ​របស់​ជនជាតិ​ម៉ាយ៉ាន​ដែល​ត្រូវ​បាន​គេ​យក​ធ្វើ​ជា​ទាសករ​នៅ​ក្នុង​រដ្ឋ Yucatan ដែល​បាន​ចាប់ផ្តើម​នៅក្នុង​ឆ្នាំ១៨៤៧ និង​បាន​បញ្ចប់​នៅក្នុង​ឆ្នាំ១៩០១ ដែល​ពេល​នោះ​ជនជាតិ​ដើម​ម៉ាយ៉ាន​បាន​ក្រោកឡើង​តវ៉ា​ប្រឆាំង​នឹង​ពួកស្បែកស​ និង​ក្រុម​ចម្រុះ​ជាតិ​សាសន៍។

នៅ​អំឡុង​ពិធី​នោះ​ រដ្ឋាភិបាល​ម៉ិកស៊ិក​បាន​ទទួល​ស្គាល់​ការ​រើសអើង​ពូជសាសន៍​ និង​ការ​រើសអើង​នានា​ ដែល​ក្រុម​ជនជាតិ​ភាគតិច​នេះ​នៅ​តែ​រងគ្រោះ​ បន្ទាប់​ពី​ឯករាជ្យ​ភាព​របស់​ម៉ិកស៊ិក។

គម្រោង​សាងសង់ផ្លូ​រថភ្លើង​ម៉ាយ៉ា​ ដែល​ជា​គម្រោង​សំខាន់​របស់​រដ្ឋាភិបាល​ម៉ិកស៊ិកបច្ចុប្បន្ន​ ត្រូវ​បាន​លើកឡើង​នៅ​អំឡុង​ពិធីនោះ​ និង​ត្រូវ​បាន​រិះគន់ពី​សំណាក់​អ្នកស្រុក។

កាល​ពី​ខែមិថុនា​ លោក Lopez Obrador បាន​អនុញ្ញាត​ឲ្យ​សាងសង់​ផ្លូវ​រថភ្លើង​ម៉ាយ៉ាន​ប្រវែង១៥០០គីឡូម៉ែត្រ ​ឆ្លង​កាត់​តំបន់​នានា​នៃ​ឧបទ្វីប Yucatan ដែលរមណីយដ្ឋាន Cancun​ ស្ថិតនៅទីនោះ។

អង្គការ​ជាច្រើន​បាន​បដិសេធ​គម្រោង​នេះ ​ដោយ​អះអាង​ថា​ គម្រោង​នេះ​ នឹង​បង្ក​គ្រោះថ្នាក់​ដល់​បរិស្ថាន​ និង​សហគមន៍​ជនជាតិ​ដើម​ជាច្រើន​ក្នុង​តំបន់​នេះ៕

ប្រែសម្រួលដោយអ្នកស្រី ស៊ូ ពេជ្រចិន្តា

XS
SM
MD
LG