ភ្ជាប់​ទៅ​គេហទំព័រ​ទាក់ទង

សមាជិក​សភា​នឹង​រួបរួម​គ្នា​ក្រោយ​ការ​បាញ់​អ្នក​តែង​ច្បាប់​រដ្ឋអារីហ្សូណា​

  • Cindy​ Saine​

អ្នក​មក​​ជូន​ពរ​ម្នាក់​បាន​ដាក់​វត្ថុ​​គោរព​នៅ​​បូជនីយដ្ឋាន​បណ្តោះ​អាសន្ន​មួយ​នៅ​​ខាង​ក្រៅ​ការិយាល័យ​របស់​សមាជិក​សភា​គណបក្ស​សាធារណរដ្ឋ អ្នក​ស្រី Gabrielle Giffords នៅ​ក្នុង​ទី​ក្រុង ធូសន (Tucson) រដ្ឋ​ អារីហ្សូណា កាល​ពី​ថ្ងៃ​ទី​៩​ខែ​មករា​ឆ្នាំ​២០១១។

ឧបទ្ទវហេតុ​បាញ់​លោក​ស្រី​តំណាងរាស្រ្ត ហ្កាព្រៀល ឌ្យីហ្វ័រដស៍ (Gabrielle​ Giffords)​ នៅ​ក្នុង​រដ្ឋ​អារីហ្សូណា (Arizona) ​កាល​ពី​ថ្ងៃ​សៅរ៍ ​បាន​ធ្វើ​ឲ្យ​ក្រុម​អ្នក​តែង​ច្បាប់​មាន​ការ​រន្ធត់​ចិត្ត​ និង​ប្តេជ្ញា​ថា​នឹង​ធ្វើ​ការ​រួម​គ្នា។

សមាជិក​សភា​ ក្រុម​គ្រួសារ​ និង​នាយ​ខុទ្ទកាល័យ​របស់​ខ្លួន​ជាង​៨០០​ នាក់បាន​ចូល​រួម​នៅ​ក្នុងសន្និសីទតាមអ៊ីនធ័រណិត (Internet) មួយ​ដែល​កម្រ​មាន​ធ្វើ រវាង​សមាជិក​នៃ​គណបក្ស​ទាំង​ពីរ​នៅ​ក្រោយ​ការបាញ់ប្រហារ​នេះ។​ លោក​ស្រី ឌ្យីហ្វ័រដស៍ កំពុង​មាន​សភាព​ធ្ងន់​ធ្ងរ​នៅ​ក្នុង​មន្ទីរ​ពេទ្យ​ និង​មនុស្ស​ ៦​ នាក់​ទៀត​បាន​បាត់​បង់​ជីវិត​ បន្ទាប់​ពី​ជន​ប្រដាប់​អាវុធ​ម្នាក់​បានបាញ់​កាំភ្លើង​នៅ​ក្នុង​កន្លែង​ចត​រថ​យន្ត​មួយ​នៅ​ទី​ក្រុង​ ធូ​សន (Tucson) ជា​ទីដែល​លោក​ស្រី​តំណាងរាស្រ្ត​កំពុង​ជួប​ជា​មួយ​ប្រជាពលរដ្ឋ​ក្នុង​មណ្ឌល​របស់​លោក​ស្រី។

សភា​តំណាង​រាស្រ្ត​បាន​បញ្ឈប់​កិច្ច​ការ​ទាំង​អស់​ដែលគ្រោង​បំពេញ​នៅ​ក្នុង​សប្តាហ៍​នេះ​ ដោយ​រួម​ទាំង​ការ​បោះ​ឆ្នោត​ដ៏ចម្រូង​ចម្រាស់​មួយ​ដែល​បម្រុង​ធ្វើ​នៅ​ថ្ងៃ​ពុធ​ ដើម្បី​លុប​ចោល​សមិទ្ធិក្នុង​ស្រុក​របស់​លោក​ប្រធានាធិបតីបារ៉ាក់ អូបាម៉ា (Barack ​Obama​) គឺ​កំណែ​ទម្រង់របៀប​ថែទាំ​សុខភាព។​ សភា​តំណាង​រាស្រ្ត​នឹង​ចូល​ប្រជុំ​គ្នា​នៅ​ថ្ងៃ​អង្គា​រ​ ហើយ​សមាជិក​នឹង​សម្តែង​គារវកិច្ច​នៅ​លើ​វេទិកា​សភាចំពោះ​ជន​ដែល​បាន​បាត់​បង់​ជីវិត និង​រង​របួស​នៅ​ក្នុង​ការ​បាញ់​យ៉ាងកំរោល​នៅ​រដ្ឋអារីហ្សូណា។ នៅ​ថ្ងៃ​ពុធ​ សមាជិក​សភា​នឹង​ដាក់​ស្នើ​សេចក្តី​សម្រេច​ចិត្ត​មួយ​ដើម្បី​ជូន​កិត្តិយស​ដល់​ជន​រង​គ្រោះនៃ​ការ​បាញ់​ប្រហារ​នេះ។​ ក្រោយ​មក​នឹង​មាន​ការ​ពន្យល់​វិធី​ការពារ​សន្តិសុខជូនដល់​សមាជិក​សភា​គ្រប់​រូប។

នៅ​ក្រោយ​សន្និសីទ​តាម​អ៊ីធ័រណិត លោក​ ចន ឡាសិន (John​ Larson) ​នៃ​រដ្ឋ​ ខុនណិចទីខាត់ (Connecticutt) ប្រធាន​សមាជិក​ប្រជាធិបតេយ្យ​នៃ​សភា​តំណាង​រាស្រ្ត​បាន​ថ្លែង​ប្រាប់​អ្នកយក​ព័ត៌មាន​អំពី​បរិយាកាស​នៅ​វិមាន​ កាពីតូល (Capitol)​ ប្រៀប​ធៀប​ទៅ​នឹង​មនោសញ្ចេតនា​ដែល​ក្រុម​អ្នក​តែង​ច្បាប់​មាន​ នៅ​ក្រោយ​ការ​វាយ​ប្រហារ​ភេរវកម្ម​នៅ​ថ្ងៃ​ទី​ ១១​ កញ្ញា​ឆ្នាំ​ ២០០១។​ លោក​ថ្លែង​ថា៖

«នៅ​ពេល​ដែល​ឧបទ្ទវហេតុ​បែប​នេះ​កើត​ឡើង​ មិន​ខុស​គ្នា​ពី​អ្វី​ដែល​បាន​កើត​ឡើង​នៅ​ពេល​ដែល​មនុស្ស​នាំ​គ្នា​ចេញដោយ​ឯកឯង​ទៅ​ច្រៀង​បទ​ God​ Bless​ America ​ឬ​ «ព្រះ​អាទិទេព​ប្រសិទ្ធពរ​ដល់​ប្រទេស​អាមេរិក» ​នៅ​កាំ​ជណ្តើរ​នៃ​វិមាន​កាពីតូល​ នៅ​ក្រោយ​ថ្ងៃ​ទី​១១​ ខែ​កញ្ញា​នោះ​ទេ គឺ​ធ្វើ​ដោយ​ឯកឯង​ ដោយ​ស្មោះ​ស្ម័គ្រ។​ ខ្ញុំ​គិត​ថា​មនុស្ស​ គេ​យល់»។

លោក​ ចន បេន័រ (John​ Boehner)​ ប្រធាន​សភា​តំណាងរាស្រ្ត​មាន​ប្រសាសន៍​ថា អ្នក​តាក់តែង​ច្បាប់​ត្រូវ​ការ​ចាប់​ដៃគ្នា​ជាមួយ​សហការី​របួស​របស់​ខ្លួន​និង​គ្រួសារ​អ្នក​ស្លាប់​ ប្រជារាស្រ្ត​នៅ​មណ្ឌល​លេខ​ ៨​ ក្នុង​រដ្ឋ​ អារីហ្សូណា​ ហើយ​រួប​រួម​គ្នា​ក្នុង​ចំណោម​សមាជិក​សភា​ផង​ដែរ។​ លោក​ ឡាសិន ​និង​សមាជិក​គណបក្ស​ប្រជាធិបតេយ្យ​ដទៃ​ទៀត​បាន​ថ្លែង​សរសើរ​លោក​ បេន័រ និង​ក្រុម​មេ​ដឹក​នាំ​គណបក្ស​សាធារណរដ្ឋ​និយម​ ចំពោះ​ការ​ចាប់​អារម្មណ៍​របស់​ខ្លួន​នៅ​ក្នុង​ការផ្អាក​ការ​បោះ​ឆ្នោត​ទាំង​អស់​នៅ​ក្នុង​សភា​តំណាងរាស្រ្ត​ក្នុង​សប្តាហ៍​នេះ។

នៅ​ក្នុង​សន្និសីទ​តាម​អ៊ិនធ័រណិត ​សមាជិក​សភា​ និងក្រុមគ្រួសារ ​និង​ក្រុម​បុគ្គលិក​ បាន​ទទួល​ព័ត៌មាន​អំពី​ស្ថានភាព​របស់​លោក​ស្រី​ ហ្កាព្រៀល​ ឌ្យីហ្វ័រដស៍។​ លោក​ស្រី​នៅ​មាន​សភាព​ធ្ងន់​ធ្ងរ​ នៅ​ក្នុង​បន្ទប់ពិនិត្យថែទាំ​ល្អិត​ល្អន់​ ហើយ​វេជ្ជ​បណ្ឌិតរបស់​លោក​ស្រី​បាន​សម្តែង​សុទិដ្ឋិនិយម​ដោយ​ប្រុង​ប្រយ័ត្ន។​ សមាជិក​សភា​ក៏​បាន​ទទួល​ការ​ណែនាំ​អំពី​វិធី​ការពារ​សន្តិសុខ​ និង​របៀប​វារៈ​ថ្មី​សម្រាប់​សប្តាហ៍​ក្រោយ​ដែរ។​ អ្នក​តំណាងរាស្រ្ត​ ឡាសិន ​បាន​ថ្លែង​ថា​ មាន​ការ​សម្តែង​ការ​កោត​សរសើរ និង​សេចក្តី​ស្រឡាញ់​ដ៏​សម្បើមចំពោះ​លោក​ស្រី​ ហ្កាព្រៀល ឌ្យីហ្វ័រដស៍ ផង​ដែរ។​ លោក​មាន​ប្រសាសន៍​ថា៖

«លោក​ស្រី ​ហ្កាព្រៀល ឌ្យីហ្វ័រដស៍​ ជា​សមាជិក​ដ៏​វិសាមញ្ញម្នាក់។​ នៅ​ពេល​ដែល​សមាជិក​ម្នាក់​បង្កើត​ឲ្យ​មាន​មនោសញ្ចេតនា​បែប​នេះ​ក្នុង​ចំណោម​សមាជិក​ដទៃ​ទៀត ខ្ញុំ​គិត​ថា វា​ពិត​ជា​ធ្វើ​ឲ្យ​មាន​គំនិត​នៃ​សហប្រតិបត្តិការ​កាន់​តែ​ខ្លាំង​បែប​នេះ​ជា​មិន​ខាន»។

លោក​ស្រី​ ហ្កាព្រៀល ឌ្យីហ្វ័រដស៍ ជា​សមាជិក​និយម​កណ្តាល​ម្នាក់​នៃ​គណបក្ស​ប្រជាធិបតេយ្យ​ ក្នុងមណ្ឌល​អភិរក្ស​និយម​មួយ​ក្នុង​រដ្ឋ​ អារីហ្សូណា។​ លោក​ស្រី​បាន​ទទួល​ការ​រាប់​អាន​ស្និទ​ស្នាល​ពី​សមាជិកសភា​នៃ​គណបក្ស​ទាំង​ពីរ។ ​លោក​ស្រី​ជា​អ្នក​គាំទ្រកំណែ​ទម្រង់​ច្បាប់​អន្តោប្រវេសន៍​យ៉ាង​ទូលំ​ទូលាយ​ និង​ច្បាប់​កំណែ​ទម្រង់​ខាង​ការ​ថែទាំ​សុខភាពដែល​សមាជិក​គណបក្ស​ប្រជាធិបតេយ្យ​បាន​អនុម័ត​កាល​ពី​ឆ្នាំ​មុន។​ នៅ​ក្នុង​ការ​ពិភាក្សា​ដេញ​ដោល​គ្នា​យ៉ាង​ខ្ទរ​ខ្ទារ​ ស្តី​អំពី​ការ​ថែទាំ​សុខភាព​នេះ​ ទ្វារ​មុខ​នៃ​ការិយាល័យ​របស់​លោក​ស្រី​នៅ​ទី​ក្រុង​ ធូសន (Tucson) ត្រូវ​គេ​វាយ​បំបែក​នៅ​ក្នុង​សកម្មភាព​បំផ្លិច​បំផ្លាញ​មួយ។

រដ្ឋអាជ្ញា​បាន​ប្តឹង​ចោទ​ពី​បទធ្វើ​ឃាត​ថ្នាក់​ទី​មួយ​ចំនួន​២​ប្រការ ការ​ប៉ុន​ប៉ង​ធ្វើឃាត​ចំនួន​២​ប្រការ​ និង​ការ​ប៉ុន​ប៉ង​សម្លាប់​សមាជិក​ម្នាក់​របស់​សភា​ចំនួន​១​ប្រការ ប្រឆាំង​នឹង​ ដ្យារិដ លី លូន័រ (Jared​ Lee​ Loughner)​ អាយុ​ ២២​ ឆ្នាំ។​ លូន័រ​បាន​ចុះផ្សាយ​រូប​ វីដេអូ​វែង​ និង​ច្របូក​ច្របល់​នៅ​ក្នុង​ អ៊ីនធ័រណិត ​ដោយ​ចោទ​ថា រដ្ឋាភិបាល​សរអា​ជា​អ្នក​ត្រួត​ខួរ​ក្បាល​និង​បង្វិល​ខួរ​ក្បាល​មនុស្ស។​ អាជ្ញាធរ​និយាយ​ថា​ គេ​មិន​ឃើញ​មាន​ហេតុផល​ជាក់​លាក់​ណា​មួយ​ទេ។

ទោះ​បី​ជា​ក្រុម​អ្នក​តែង​ច្បាប់​បានអំពាវនាវ​ឲ្យ​មានការ​បញ្ចេញ​មតិ និង​ឯកភាព​ពី​ប្រជាពលរដ្ឋកាន់​តែ​ច្រើន​ក៏​ដោយ​ ក៏​សមាជិក​គណបក្ស​ប្រជាធិបតេយ្យ​ខ្លះ​នៅ​តែ​ចង្អុល​ទៅ​រក​ភាសា​ប្រឆាំង​រដ្ឋាភិបាល​របស់​ចលនា​ ធី ផាធី (Tea​ Party) និង​ទៅ​ររក​ពាក្យ​សម្តី​អុច​អាល​ពី​មេដឹកនាំ​អភិរក្សនិយម​ ដូច​ជា​អតិត​អភិបាល​រដ្ឋ​ អាឡាស្កា (Alaska)​ លោក​ស្រី​ សារ៉ា ផេល្លីន (Sarah​ Pailin) ​ជា​ដើម​ ថា អាចជា​កត្តា​ដែល​ធ្វើ​ឲ្យ​មាន​អំពើ​ហឹង្សា។

លោក​ ឌីក ឌូប៊ីន (Dick​ Durbin)​ សមាជិក​ព្រឹទ្ធសភា​នៃ​គណបក្ស​ប្រជាធិបតេយ្យ​ពី​រដ្ឋ​ អ៊ីល្លីណ័យ (Illinois) បាន​និយាយ​យោង​ទៅ​រក​សម្តី​តតាំង​របស់​លោក​ស្រី​ ផេល្លីន ដែល​ថា «កុំ​ដក​ថយ​ ចូរ​ច្រក​គ្រាប់»​ និង​រូប​រង្វង់​មូល​មាន​ខ្វែង​ជើង​ក្អែក​នៅ​កណ្តាល​ ដែល​លោក​ស្រី​ប្រើ​ជា​សញ្ញា​តំណាង​ឲ្យ​មណ្ឌល​ដែល​លោក​ស្រី​ចង់​ឲ្យ​សមាជិក​គណបក្ស​សាធារណរដ្ឋ​និយមទទួល​ជ័យ​ជំនះ។​ លោក​ឌុប៊ីន ពោល​ថា​ គឺ​ «វត្ថុ​ទាំង​នេះ​ហើយ​ដែល​ទាក់​ទាញ​ឲ្យ​មាន​ពាក្យ​សម្តី​បំពុល​ដែល​អាច​ដឹក​នាំ​មនុស្ស​ដែល​មាន​ស្មារតី​មិន​នឹងនឲ្យ​ជឿ​ថា​នេះ​ជា​«ចម្លើយ​មួយ​ដែល​គេ​អាច​ទទួល​យក​បាន»។

សមាជិក​គណបក្ស​សាធារណរដ្ឋ​និយមច្រាន​ចោល​យោបល់​ដែល​ថា គណបក្ស​របស់​ខ្លួន​ជា​អ្នក​ធ្វើ​ឲ្យ​មាន​បរិយាកាស​នយោបាយ​ដ៏​មាន​គ្រោះ​ថ្នាក់​ជាង​មុន​មួយ។​ លោក​ ឡាម៉ារ អាឡិកសាឌ័រ (Lamar​ Alexander) សមាជិក​ព្រឹទ្ធសភាគណបក្ស​សាធារណរដ្ឋ​និយមនៃ​រដ្ឋ​ ថេនណិស៊ី (Tennessee) ​បាន​កត់​សម្គាល់​កាល​ពី​ថ្ងៃ​អាទិត្យ​ថា​ ជន​ជាប់ចោទ​ដែលជា​អ្នក​បាញ់ ​បាន​ចុះ​ផ្សាយ​នៅ​ក្នុង​អ៊ីនធ័ណិត​ថា​ គេ​បាន​អាន​សៀវភៅ​អំពី​លទ្ធិ​ ម៉ាក្ស (Marx)​ និយម​ និង​ណាហ្ស៊ី (Nazi) និយម​ ហើយ​ថា​នេះ​មិន​មែន​ជា​លក្ខណៈ​សម្បត្តិ​របស់​សមាជិក​សាមញ្ញ​ម្នាក់របស់​ចលនា ធី ផាធី ទេ។​ ក្រុម​អ្នក​គាំទ្រ​ចលនា​ធី ផាធី ទាម​ទារ​ឲ្យ​មាន​ពន្ធ​ដារ​ទាប​ និង​ចំនួន​មន្រ្តី​រដ្ឋាភិបាលតិច។​ អ្នក​សរសេរប្លូហ្គ (blog)​ និង​អ្នករិះគន់​ខ្លះ​នៃ​គណបក្ស​សាធារណរដ្ឋ​និយម​បាន​ចោទ​សមាជិក​បក្សប្រជាធិបតេយ្យ​ថា កំពុង​ខំ​ទាញ​យក​ចំណេញ​ផ្នែកនយោបាយ​ពី​ការ​បាញ់ប្រហារ​នេះ។

លោក​ប្រធានាធិបតី​អូបាម៉ា បាន​ចេញ​សេចក្តី​ថ្លែងការណ៍​មួយ​កាល​ពី​ថ្ងៃ​អាទិត្យ​ អំពាវនាវ​ឲ្យ​ប្រជាពលរដ្ឋ​អាមេរិកាំងនៅ​ពាស​ពេញ​ប្រទេស​ធ្វើ​សេចក្តី​ស្មឹង​ស្មាធ​ស្ងៀម​ស្ងាត់​មួយ​រយៈនៅ​វេលា​ម៉ោង​ ១១​ ព្រឹក​ថ្ងៃ​ច័ន្ទ តាម​ម៉ោង​នៅ​រដ្ឋធានី​វ៉ាស៊ីនតោន​ ដើម្បី​ជា​កិត្តិយស​ដល់​ជន​រង​គ្រោះ​ស្លូតត្រង់​នៃ​សោកនាកម្មនៅ​រដ្ឋ ​អារីហ្សូណា ដោយ​រួម​ទាំង​អ្នក​ដែល​កំពុងអ្នក​រងរបួស​ដ៏​ធ្ងន់​ធ្ងរ​ដែល​កំពុង​តស៊ូ​ដើម្បី​រួច​ពី​ស្លាប់​ផង​ដែរ។​ លោក អូបាម៉ា ថ្លែង​ថា​ នេះ​ជា​«ពេល​វេលា​ដែល​ប្រជាពលរដ្ឋអាមេរិកត្រូវ​រួប​រួម​គ្នា​ជា​ប្រទេស​តែ​មួយ ​នៅ​ក្នុង​ការ​បន់​ស្រន់​ឬ​ការ​ត្រិះ​រិះ​ ដោយ​ទុក​ជន​រង​គ្រោះ​ និង​ក្រុម​គ្រួសារ​របស់​គេ​ឲ្យជាប់​នឹង​ចិត្ត»៕

ប្រែ​សម្រួល​ដោយ​ កែរ ​យ៉ាន

XS
SM
MD
LG