សត្វផ្សោតមួយក្បាលចុងក្រោយគេបង្អស់នៅអន្លង់ឈើទាលក្នុងខេត្តស្ទឹងត្រែង ប្រឈមនឹងការបាត់បង់នាពេលខាងមុខ ដែលនាំទៅរកការស្លាប់ផុតពូជទាំងស្រុងនៃសត្វផ្សោត។ ហេតុផលមួយនៃការគំរាមកំហែងនេះ គឺដោយសារការស្ថាបនាទំនប់វារីអគ្គិសនីនៅលើតួទន្លេមេគង្គ ដែលនាំឲ្យមានការផ្លាស់ប្តូរលំហូរទឹក។ នេះបើតាមសេចក្តីប្រកាសព័ត៌មានរបស់អង្គការមូលនិធិពិភពលោកសម្រាប់ធម្មជាតិ-កម្ពុជា ហៅកាត់ថា WWF រួមជាមួយរដ្ឋបាលជលផលនៃក្រសួងកសិកម្ម។
សត្វផ្សោតទន្លេមេគង្គ ត្រូវបានអ្នកវិទ្យាសាស្ត្រចាត់ចូលក្នុងបញ្ជីក្រហមជាប្រភេទសត្វកម្រជិតផុតពូជ ក្នុងនោះទន្លេមេគង្គជាជម្រកដ៏សំខាន់របស់សត្វផ្សោត ដែលកំពុងប្រឈមនឹងការបាត់បង់ជាបន្តបន្ទាប់។ នេះបើយោងតាមសេចក្តីប្រកាសព័ត៌មានរួមមួយស្តីពី«សត្វផ្សោតទន្លេមេគង្គដែលរស់នៅអន្លង់ឈើទាលនៃអន្តរព្រំប្រទល់រវាងកម្ពុជានិងឡាវ ដែលចេញផ្សាយកាលពីថ្ងៃទី២៤ ខែតុលា ឆ្នាំ២០២១»។
បើយោងតាមលទ្ធផលជំរឿនសត្វផ្សោតក្នុងឆ្នាំ២០២០ ដោយមិនរាប់បញ្ចូលចំនួនកូនផ្សោតដែលបានកត់ត្រាថ្មីៗ មានការប៉ាន់ប្រមាណថា សត្វផ្សោតមានត្រឹមតែ៨៩ក្បាលប៉ុណ្ណោះ។ ក្នុងនោះដែរក្រុមសត្វផ្សោតដែលរស់នៅក្នុងអន្លង់ឈើទាល គឺជាក្រុមរស់នៅដាច់ដោយឡែកពីក្រុមសត្វផ្សោតដទៃទៀត ដែលកំពុងរស់នៅតាមដងទន្លេមេគង្គក្នុងប្រទេសកម្ពុជា និងត្រូវបានរកឃើញថា នៅរស់រានតិចតួចបំផុតត្រឹមចំនួន៣ក្បាលកាលពីឆ្នាំ២០១៨ និងសល់ត្រឹម១ក្បាលនៅឆ្នាំ២០២១នេះ។
លោក សេង ទៀក នាយកអង្គការ WWF ប្រចាំប្រទេសកម្ពុជា បានប្រាប់វីអូអេនៅថ្ងៃចន្ទនេះថា ទោះបីជា សត្វផ្សោតនៅអន្លង់ឈើទាលនៅសល់ត្រឹម ១ក្បាល ហើយមិនអាចបន្តពូជបានក៏ពិតមែន ប៉ុន្តែនៅតែបន្តកិច្ចសហប្រតិបត្តិការរវាងប្រទេសឡាវ និងកម្ពុជាដដែល ដើម្បីព្យាយាមអភិរក្សសត្វផ្សោតនៅសល់ចុងក្រោយគេដែលមានអាយុប្រមាណជាង២០ ឆ្នាំនេះ។ យ៉ាងណាមិញ លោកសង្ឃឹមថា ភាគីរដ្ឋទាំងសងខាង កម្ពុជា-ឡាវ អាចសហការគ្នាក្នុងការស្តារសត្វកម្រមួយនេះរួមគ្នា ខណៈលោកយល់ថា សត្វផ្សោតបានជួយទ្រទ្រង់ដល់សេដ្ឋកិច្ចតាមរយៈការទាក់ទាញភ្ញៀវទេសចរចូលមកទស្សនា។
លោកបានលើកឡើងពីកត្តាដែលជះឥទ្ធិពលធ្ងន់ធ្ងរជាងគេ ដែលបណ្តាលឲ្យសត្វផ្សោតទន្លេមេគង្គប្រភេទនេះ ធ្លាក់ចុះជាបន្តបន្ទាប់មកទល់ពេលនេះ គឺកត្តាបម្រែបម្រួលលំហូរទឹកទន្លេនៃទំនប់វារីអគ្គិសនីនៅផ្នែកខាងលើ។
លោកបន្ថែមថា៖ «បើតាមការពិនិត្យមើលជារួមគឺការប្រែប្រួលលំហូរទឹកនេះ គឺមានផលប៉ះពាល់ខ្លាំងទៅលើការរស់នៅរបស់ផ្សោត។ វា Sensitive [ងាយរងប្រតិកម្ម] ទៅលើផលប៉ះពាល់នៃបរិស្ថាននេះតែម្តង។ ដូចខ្ញុំបានលើកឡើងការប្រែប្រួលលំហូរទឹកនេះ គឺកើតឡើងដោយសារការតែទំនប់វារីអគ្គិសនីនៅផ្នែកខាងលើទន្លេមេគង្គហ្នឹងតែម្តង» ។
បើតាមសេចក្តីប្រកាសព័ត៌មាន សត្វផ្សោតទន្លេមេគង្គ បានប្រឈមនឹងការគំរាមកំហែងកាន់តែខ្លាំងឡើងៗ ដោយសារកត្តាមួយចំនួន រួមមានការស្លាប់ដោយជាប់នឹងមងនេសាទ ការអភិវឌ្ឍទំនប់វារីអគ្គីសនីនៅខ្សែទឹកប៉ែកខាងលើមេគង្គដែលបង្កការរាំងនូវលំហូរទឹកជាធម្មជាតិ ការនេសាទហួសកម្រិត និងការអនុវត្តវិធីសាស្ត្រនេសាទបែបបំផ្លាញ ដូចជាការប្រើឧបករណ៍ឆក់ជាដើម។
នៅក្នុងសេចក្តីប្រកាសព័ត៌មាននោះ លោក ពុំ សុថា ប្រតិភូរាជរដ្ឋាភិបាលទទួលបន្ទុកជាប្រធានរដ្ឋបាលជលផល បានទទូចដល់ប្រទេសនៅផ្នែកខាងលើនៃដងទន្លេមេគង្គឲ្យសិក្សានិងវាយតម្លៃហេតុប៉ះពាល់បរិស្ថាន ធនធានធម្មជាតិ និងសង្គម ឲ្យបានពេញលេញ មុននឹងសម្រេចចិត្តសាងសង់ទំនប់វារីអគ្គិសនី។
លោក គង់ ចាន់ធី ប្រធានបណ្តាញសហគមន៍នេសាទ ស្រុកបុរីអូរស្វាយសែនជ័យ ក្នុងខេត្តស្ទឹងត្រែងនៃប្រទេសកម្ពុជាប្រាប់វីអូអេថា នៅពេលសត្វផ្សោតទទួលរងការបាត់បង់ សេដ្ឋកិច្ចរបស់ពលរដ្ឋដែលទទួលបានតាមរយៈភ្ញៀវទេសចរដែលចូលមកទស្សនាសត្វផ្សោត ក៏រងការខាតបង់ដូចគ្នា។
លោកបញ្ជាក់ថា៖ «កត្តាដែលវាបាត់បង់លឿនបំផុតហ្នឹង គឺដោយសារការកសាងទំនប់វារីអគ្គិសនីនៅដងសាហុងហ្នឹងវាជារឿងមួយសំខាន់។ ដោយសារកាលណាយើងសាងសង់ទំនប់វារីអគ្គិសនីនៅដនសាហុងហ្នឹង យើងឃើញមានការបំផ្ទុះថ្ម ការបំភាយឧស្ម័នផ្សេងៗ ទាក់ទងទៅហ្នឹងការសាងសង់ទំនប់វារីអគ្គិសនីដូចជាជាតិកំបៅរអីផ្សេងៗ ទាំងអស់ហ្នឹង។ ព្រោះអីសត្វផ្សោតត្រូវការទឹកបែបធម្មជាតិ។ នៅពេលដែលទឹកមានជាតិពុល ជាតិអីផ្សេងៗវាអត់អាចរស់នៅកើតទេ»។
លោកបានស្នើឲ្យប្រទេសទាំងអស់ផ្អាកការធ្វើទំនប់វារីអគ្គិសនីតាមដងទន្លេមេគង្គ ដែលលោកយល់ថា ទំនប់វារីអគ្គិសនីប៉ះពាល់សត្វផ្សោត និងត្រីផងដែរ។
លោក អ៊ុក វិបុល ប្រធាននាយកដ្ឋានអភិរក្សធនធានជលផលនៃរដ្ឋបាលជលផល បានប្រាប់វីអូអេនៅថ្ងៃចន្ទថា ដោយសារតែអន្លង់ឈើទាល គឺជាអន្លង់មួយក្នុងចំណោមអន្លង់ទាំង៩ក្នុងប្រទេសកម្ពុជា ដែលមានត្រីដូហ្វីនប្រភេទសត្វផ្សោតអ៊ីរ៉ាវ៉ាឌី ដែលប្រជាពលរដ្ឋខ្មែរចំណាំហៅថាផ្សោតក្បាលត្រឡោក ហើយវាងាយរងគ្រោះនឹងការបាត់បង់ជាងគេ។
លោកបញ្ជាក់ថា៖ «ជាពិសេសវា[អន្លង់ឈើទាល] ប្រឈមនឹងចរន្តទឹកផង វា[អន្លង់ឈើទាល]នៅដើមទី ហើយនិងកិច្ចសហការយើងមិនសូវបានជិតដិត ចឹងទៅច្បាប់ស្តីពីការគ្រប់គ្រងធនធានជលផលក៏ផ្សេងគ្នា ចឹងទៅវាធ្វើឲ្យប៉ះពាល់ដល់ការគ្រប់គ្រងកន្លែងហ្នឹងច្រើន»។
បើតាមអង្គការ WWF ឲ្យដឹងទៀតថា ទន្លេមេគង្គក្នុងប្រទេសកម្ពុជា គឺជាទីជម្រកដ៏សំខាន់របស់សត្វផ្សោតអ៊ីរ៉ាវ៉ាឌីដែលប្រភេទសត្វងាយរងគ្រោះថ្នាក់ជិតផុតពូជបំផុត។ វាជាសត្វផ្សោតដែលស្ថិតក្នុងចំណោមប្រភេទសត្វផ្សោតទឹកសាបទាំងអស់ចំនួនតែ៦ប៉ុណ្ណោះនៅលើពិភពលោក។ នៅក្នុងឆ្នាំ២០០៧ ការតាមដានស្ថានភាព និងចំនួនសត្វផ្សោតដោយផ្អែកលើអត្តសញ្ញាណរូបថតដែលធ្វើឡើងដោយរដ្ឋបាលជលផល និងអង្គការ WWF បានកត់ត្រាទុកសត្វផ្សោតពេញវ័យចំនួន៨ក្បាល ដែលធ្លាប់បានរស់នៅក្នុងអន្លង់អន្តរព្រំដែនឡាវ-កម្ពុជានេះ។ ការតាមដានក្រោយៗទៀត ដែលបានប្រព្រឹត្តទៅតាមវដ្តនៃការធ្វើជំរឿនសត្វផ្សោត បានបង្ហាញថាចំនួននេះ បានធ្លាក់ចុះត្រឹម៣ក្បាលនៅក្នុងឆ្នាំ២០១៨ និងមកនៅត្រឹមតែមួយក្បាលប៉ុណ្ណោះ នៅក្នុងឆ្នាំ ២០២១នេះ៕
