ឱសថសម្រាប់ចំណាប់ខ្មាំងក្នុងកណ្តាប់ដៃពួកសកម្មប្រយុទ្ធហាម៉ាស់នៅតំបន់ហ្កាហ្សាត្រូវបានចែកចាយនៅថ្ងៃពុធនេះ ក្រោមកិច្ចព្រមព្រៀងដែលសម្របសម្រួលដោយប្រទេសបារាំងនិងកាតា។
ប្រទេសបារាំងបាននិយាយថា ឱសថសម្រាប់ចំណាប់ខ្មាំង ៤៥ នាក់ ដែលមានជំងឺរ៉ាំរ៉ៃហើយការផ្តល់ឱ្យ នឹងធ្វើឡើងដោយមានជំនួយពីកាកបាទក្រហមអន្តរជាតិ។
ប្រទេសកាតាបាននិយាយថា កិច្ចព្រមព្រៀងនេះក៏រួមបញ្ចូលថ្នាំពេទ្យ និងជំនួយមនុស្សធម៌ផ្សេងទៀតសម្រាប់ជនស៊ីវិលប៉ាឡេស្ទីននៅតំបន់ហ្កាហ្សាផងដែរ។
ក្រុមសកម្មប្រយុទ្ធហាម៉ាស់បានចាប់មនុស្សប្រមាណ ២៤០ នាក់ ក្នុងអំឡុងពេលវាយប្រហារលើអ៊ីស្រាអែលកាលពីថ្ងៃទី ៧ ខែតុលាឆ្នាំមុន ដែលអំឡុងពេលនោះពួកគេបានសម្លាប់មនុស្សប្រហែល ១២០០នាក់ផងដែរ។ នេះបើយោងតាមតួលេខរបស់អ៊ីស្រាអែល។ អ៊ីស្រាអែលបានចាប់ផ្តើមយុទ្ធនាការយោធារបស់ខ្លួនដើម្បីកម្ចាត់ក្រុមហាម៉ាស់បន្ទាប់ពីការវាយប្រហារនោះ។
ចំណាប់ខ្មាំងជាង ១០០ នាក់ ត្រូវបានដោះលែងក្នុងអំឡុងពេលមានបទឈប់បាញ់បណ្តោះអាសន្នកាលពីខែវិច្ឆិកា ប៉ុន្តែប្រហែល ១៣០ នាក់ ត្រូវបានគេជឿថានៅក្នុងកណ្តាប់ដៃក្រុមហាម៉ាស់នៅហ្កាហ្សានៅឡើយ។
សហរដ្ឋអាមេរិកបាននិយាយកាលពីថ្ងៃអង្គារថា ខ្លួនមានក្តីសង្ឃឹមថា កិច្ចពិភាក្សាសម្របសម្រួលដោយប្រទេសកាតាអាចនាំឱ្យមានកិច្ចព្រមព្រៀងថ្មីដើម្បីដោះលែងចំណាប់ខ្មាំងជាថ្នូរនឹងបទឈប់បាញ់រវាងក្រុមហាម៉ាស់និងអ៊ីស្រាអែល។
សង្រ្គាមបានបន្តនៅថ្ងៃពុធនេះដោយយោធាអ៊ីស្រាអែលនិយាយថា ខ្លួនបានសម្លាប់យុទ្ធជនប៉ាឡេស្ទីន ៦នាក់ រួមទាំងមន្ត្រីក្រុមហាម៉ាស់ម្នាក់ដែលអ៊ីស្រាអែលនិយាយថា ជាអ្នកទទួលបន្ទុកក្នុងការសួរចម្លើយចារបុរសដែលសង្ស័យនៅតំបន់ហ្កាហ្សាភាគខាងត្បូង។
យោធាអ៊ីស្រាអែលបាននិយាយនៅថ្ងៃពុធនេះថា ខ្លួនបានវាយប្រហារតាមអាកាសដែលបានសម្លាប់មន្ត្រីសកម្មប្រយុទ្ធជាន់ខ្ពស់ប៉ាឡេស្ទីនម្នាក់នៅក្នុងទីក្រុង Nablus នៅ West Bank។ យោធាអ៊ីស្រាអែលបានចោទប្រកាន់ថា លោក Ahmed Abdullah Abu Shalal ជាអ្នកទទួលខុសត្រូវចំពោះការរៀបចំផែនការវាយប្រហារជាច្រើនប្រឆាំងនឹងជនជាតិអ៊ីស្រាអែលនៅក្នុងទីក្រុងហ្សេរុយសាឡឹម។
រដ្ឋមន្ត្រីការបរទេសសហរដ្ឋអាមេរិក លោក Antony Blinken បាននិយាយជាថ្មីទៀតអំពីសេចក្តីត្រូវការឱ្យមាន «ការបង្កើតរដ្ឋប៉ាឡេស្ទីន» នៅថ្ងៃពុធនេះ ក្នុងការប្រជុំប្រចាំឆ្នាំនៃវេទិកាសេដ្ឋកិច្ចពិភពលោកនៅកន្លែងកម្សាន្ត Davos ក្នុងប្រទេសស្វីស។
លោក Blinken បានថ្លែងនៅថ្ងៃពុធនេះថា អ៊ីស្រាអែល«នឹងមិនមានសន្តិសុខពិតប្រាកដទេ បើគ្មានរដ្ឋប៉ាឡេស្ទីនទេនោះ»។ លោកមានប្រសាសន៍ថា ប្រសិនបើរដ្ឋជ្វីហ្វ អាចចូលក្នុងចំណោមបណ្តាប្រទេសនៅមជ្ឈិមបូព៌ាបាន តំបន់នេះនឹងរួបរួមគ្នាធ្វើឱ្យអ៊ីរ៉ង់និង កូនអុករបស់ខ្លួននៅឯកោពីគេ។ កូនអុករបស់អ៊ីរ៉ង់មានរួមក្រុមឧទ្ទាមហ៊ូធី ដែលបានវាយប្រហារនាវាពាណិជ្ជកម្មក្នុងសមុទ្រក្រហម។ លោកបានបញ្ជាក់ថាអ៊ី រ៉ង់ជាកង្វល់ខាងសន្តិសុខធំបំផុត។
កងកម្លាំងប្រតិបត្តិការពិសេសរបស់កងទ័ពជើងទឹកសហរដ្ឋអាមេរិកបានរឹបអូសគ្រឿងបន្លាស់មីស៊ីលធ្វើនៅអ៊ីរ៉ង់និងសព្វាវុធផ្សេងទៀតពីកប៉ាល់មួយគ្រឿង ដែលធ្វើដំណើរឆ្ពោះទៅរកក្រុមឧទ្ទាមហ៊ូធី នៅក្នុងប្រទេសយេម៉ែន នៅក្នុងការវាយឆ្មក់មួយកាលពីសប្ដាហ៍មុន ដែលនៅក្នុងការវាយឆ្មក់នោះទាហានកុម្មង់ដូរបស់ខ្លួនពីរនាក់បានបាត់ខ្លួន។
ការវាយឆ្មក់នេះគឺជាការរឹបអូសថ្មីចុងក្រោយបង្អស់របស់កងទ័ពជើងទឹកសហរដ្ឋអាមេរិកនិងសម្ព័ន្ធមិត្តរបស់ខ្លួននូវការដឹកជញ្ជូនអាវុធ ដែលធ្វើដំណើរសំដៅឆ្ពោះទៅរកក្រុមឧទ្ទាមហ៊ូធី។
ក្រុមហ៊ូធីនេះបានធ្វើការវាយប្រហារជាច្រើនលើកច្រើនសារដែលបង្អាក់ដល់ពាណិជ្ជកម្មអន្តរជាតិនៅសមុទ្រក្រហមនិងឈូងសមុទ្រអាដេន (Gulf of Aden)។ ក្រុមនេះអះអាងថា ខ្លួនធ្វើការវាយប្រហារដូច្នេះដោយសារតែអ៊ីស្រាអែលធ្វើសង្គ្រាមប្រឆាំងនឹងក្រុមហាម៉ាស់នៅក្នុងតំបន់ហ្កាហ្សា។
ស្របពេលនេះដែរ កប៉ាល់ថ្មីមួយគ្រឿងបានរងការបាញ់ប្រហារដែលគេសង្ស័យថាធ្វើឡើងដោយក្រុមហ៊ូធីនៅសមុទ្រក្រហម និងបានរងការខូចខាតមួយចំនួន បើទោះបីជាគ្មាននរណាម្នាក់រងរបួសក៏ដោយ។ នេះបើយោងតាមការបញ្ជាក់របស់មន្ត្រីដែលដឹងរឿងនេះ៕
វេទិកាបញ្ចេញមតិ