ភ្ជាប់​ទៅ​គេហទំព័រ​ទាក់ទង

រដ្ឋ​មន្រ្តីការពារ​ប្រទេស​អាមេរិក​​ថា​​ប្រធានាធិបតី​​​ស៊ីរី​យកចិត្ត​ទុកដាក់ការ​ព្រមាន​របស់​អាមេរិក​ប្រឆាំង​នឹងការ​ប្រើ​អាវុធ​គីមី


រដ្ឋមន្រ្តី​ក្រសួង​ការពារ​ប្រទេស​សហរដ្ឋអាមេរិក​ Jim Mattis ពិភាក្សា​ពី​ភាពជាដៃគូ​រវាងសហរដ្ឋអាមេរិក​និង​អាល្លឺម៉ង់ក្នុង​ពិធីរំលឹក​ខួបទី​៧០នៃ Marshall Plan​ នៅ​មជ្ឈមណ្ឌលអឺរ៉ុប​​ George C. Marshall សម្រាប់ការសិក្សាសន្តិសុខនៅ​ទីក្រុង​ Garmisch ប្រទេស​អាល្លឺម៉ង់កាល​ពី​ថ្ងៃទី​២៨ មិថុនា ២០១៧។

លោក James Mattis រដ្ឋ​មន្រ្តីការ​ពារ​ប្រទេស​សហរដ្ឋ​អាមេរិកមាន​ប្រសាសន៍​កាលពី​ថ្ងៃ​ពុធ​ថា ស៊ីរី​ហាក់​ដូចជា​យក​ចិត្ត​ទុកដាក់​ពីការ​ព្រមាន​របស់​សហរដ្ឋ​អាមេរិកដល់​ការ​មិន​ឲ្យ​ប្រើ​អាវុធ​គីមី។

លោករដ្ឋ​មន្រ្តីការ​ពារ​ប្រទេស​អាមេរិកMattisបាន​មាន​ប្រសាសន៍​ដោយ​និយាយ​យោង​ដល់​របប​របស់​ប្រធានាធិបតី Bashar al-Assad នៃ​ប្រទេស​ស៊ីរី​ថា «ការណ៍​នេះ​បង្ហាញ​ថា ​ពួកគេ​បាន​គិតគូ​ពីការ​ព្រមាន​នេះ‍។ ពួកគេ​មិន​បាន​ចាប់​ផ្តើម​ការ​វាយ​ប្រហារ​អាវុធ​គីមី​ថ្មី​ណាមួយ​ទេ‍»។

សេចក្តី​ថ្លែងការណ៍​កាលពី​រសៀល​ថ្ងៃ​ចន្ទ​ពីលោកSean Spicerអ្នកនាំ​ពាក្យសេតវិ មាន​បាន​ព្រមាន​ប្រធានា​ធិបតី​ស៊ីរី Bashar al-Assad ថា​ប្រសិនបើ​កងទ័ព​រដ្ឋាភិបាល​ធ្វើ​ការ​វាយ​ប្រហារ​អាវុធ​គីមី ប្រធានា​ធិបតី​អាសាដនិង​យោធា​របស់​លោក ​នឹងខាតបង់​យ៉ាង​ធ្ងន់​ធ្ងរ។ សេចក្តី​ថ្លែងការណ៍​នោះ​កើត​មាន​ឡើង​បន្ទាប់​ពី​ភ្នាក់ងារ​ស៊ើបការណ៍​សម្ងាត់​សហរដ្ឋ​អាមេរិក​បាន​និយាយថា ​ខ្លួន​បាន​រក​ឃើញ​ការ​ប្រុងប្រៀប​រៀបចំ​ដ៏​ធំ​មួយ​សម្រាប់​ការ​វាយ​ប្រហារ​អាវុធគីមី​មួយ​ទៀត​នៅ​ក្នុង​ប្រទេស​ស៊ីរី ​ការចោទ​ប្រកាន់​ដែល​រដ្ឋាភិបាល​ស៊ីរី​បាន​ច្រាន​ចោល។

ការវាយ​ប្រហារ​កាល​ពី​ថ្ងៃ​ទី៤ ​ខែមេសា​ទៅ​លើ​ទីក្រុង Khan Sheikhounដែល​កាន់​កាប់​ដោយ​ពួក​ប្រឆាំង​បាន​សម្លាប់​មនុស្ស​ជាង៨០​នាក់​ហើយ​បាន​ធ្វើ​ឲ្យ​មានការរិះគន់​យ៉ាង​ខ្លាំង​ពី​រដ្ឋាភិបាល​បរទេស ​រួមទាំង​សហរដ្ឋ​អាមេរិក។

ថ្លែង​ពី​ពិធី​មួយ​ក្នុង​ប្រទេស​អាល្លឺម៉ង់​ដើម្បី​គោរព​ខួប​លើក​ទី​៧០​នៃ​ផែនការ Marshall ​ដើម្បី​ស្ថាបនាអឺរ៉ុប​ឡើង​វិញ​បន្ទាប់​ពី​សង្គ្រាម​លោកលើក​ទី២ ​លោករដ្ឋមន្រ្តីការ​ពារ​ប្រទេស​អាមេរិក Mattis ​ក៏​បាន​រិះគន់​ប្រធានា​ធិបតីរុស្ស៊ី Vladimir Puitnថា​បណ្តាល​ឲ្យគ្រោះ​ថ្នាក់​អន្តរជាតិ​ដែរ៕

XS
SM
MD
LG