ករណីបាត់បង់សត្វផ្សោតមួយក្បាលទៀតក្នុងឆ្នាំ២០២៣លើកនេះជាករណីដែលបង្កពីជនល្មើសលួចប្រើឧបករណ៍ឆក់ត្រីក្នុងទន្លេងមេគង្គ នៅក្នុងខេត្តស្ទឹងត្រែង។ នេះបើតាមសេចក្ដីប្រកាសព័ត៌មានរបស់ក្រសួងកសិកម្ម រុក្ខាប្រមាញ់ និងនេសាទ ដែលបង្ហោះនៅលើបណ្តាញសង្គមហ្វេសប៊ុកកាលពីថ្ងៃទី១៦ ខែវិចិ្ឆកា ឆ្នាំ២០២៣។
ករណីសត្វផ្សោតដែលបានបាត់បង់ជីវិតនៅក្នុងទន្លេមេគង្គនេះមិនមែនជាករណីទីមួយទេនៅក្នុងឆ្នាំនេះ ពោលគឺកាលពីខែមីនា ក៏ធ្លាប់មានសត្វផ្សោតស្លាប់ដោយសារជាប់មងនេសាទផងដែរ។ ករណីនៃការស្លាប់សត្វផ្សោតចុងក្រោយនេះ បានធ្វើឲ្យចំនួនសត្វផ្សោតដែលបានស្លាប់ក្នុងឆ្នាំ២០២៣នេះ កើនដល់៥ក្បាល។
បើតាមសេចក្ដីប្រកាសព័ត៌មានរបស់រដ្ឋបាលជលផលនៃក្រសួងកសិកម្ម សាកសពសត្វផ្សោតដែលបានងាប់កាលពីថ្ងៃទី១៥ ខែវិច្ឆិកានេះ គឺជាផ្សោតឈ្មោលវ័យជំទង់ អាយុប្រមាណ ៧ឆ្នាំ ប្រវែង១,៩៤ម៉ែត្រ ទម្ងន់ ៦៥គីឡូក្រាម។ សាកសពផ្សោតនោះត្រូវបានគេប្រទះឃើញនៅភូមិកោះជ្រឹម ឃុំអូរម្រះ ស្រុកសៀមបូក ខេត្តស្ទឹងត្រែង។
រដ្ឋបាលជលផលបានបញ្ជាក់ឲ្យដឹងនៅក្នុងសេចក្តីប្រកាសចុះផ្សាយកាលពីព្រហស្បតិ៍ ថា សត្វផ្សោតខាងលើបានស្លាប់ដោយសារ «ឧបករណ៍ឆក់ ព្រោះមានស្នាមជាំដុំៗនៅផ្នែកក្បាល និងដងខ្លួន»។ លទ្ធផលនៃការធ្វើកោសល្យវិច្ឆ័យនេះ បានមកពីការសហការរវាងមន្ត្រីជំនាញរបស់រដ្ឋបាលជលផល និងអង្គការមូលនិធិសកលសម្រាប់ការអភិរក្សសត្វព្រៃនិងធម្មជាតិកម្ពុជា ហៅកាត់ថា WWF កម្ពុជា ។
អ្នកនាំពាក្យសាលាខេត្តស្ទឹងត្រែងលោក ម៉ែន គុង ប្រាប់វីអូអេថា មកទល់ពេលនេះអាជ្ញាធរខេត្តស្ទឹងត្រែង មិនទាន់ចាប់បានជនល្មើសនៅឡើយទេ។ លោកបន្ថែមថា អាជ្ញាធរ និងមន្រ្ដីជំនាញកំពុងធ្វើការស្រាវជ្រាវលើសកម្មភាពល្មើសនឹងការនេសាទដែលបង្កការស្លាប់លើសត្វផ្សោតនេះ។
លោកថ្លែងថា៖ « អាហ្នឹងអាស្រ័យទៅលើការរកឃើញ ហើយនិងករណីដែលធ្វើឲ្យស្លាប់សត្វផ្សោតនេះ តាមសម្ថតកិច្ចជំនាញសិន យើងមិនអាចសន្និដ្ឋានថាយ៉ាងមិចចំពោះជនល្មើសដែលពាក់ព័ន្ធនឹងករណីនេះទេ»។
វីអូអេមិនទាន់អាចសុំការអត្ថាធិប្បាយពីអ្នកនាំពាក្យក្រសួងកសិកម្ម កញ្ញា អ៊ឹម រចនា បាននៅឡើយទេ។
នាយកអង្គការមូលនិធិសកលសម្រាប់អភិរក្សសត្វព្រៃនិងធម្មជាតិកម្ពុជា ហៅកាត់ថា WWF កម្ពុជា លោក សេង ទៀក ថ្លែងថា ការរស់រានរបស់ផ្សោតវ័យជំទង់មានសារៈសំខាន់ក្នុងការបន្តពូជប្រភេទសត្វកម្រមួយនេះ។ លោកបានជំរុញឲ្យមានការបន្តផ្សព្វផ្សាយ និងការចូលរួមពីប្រជាពលរដ្ឋ ទប់ស្កាត់ការប្រើប្រាស់ឧបករណ៍នេសាទត្រីខុសច្បាប់ ដើម្បីការពារមិនឲ្យកើតមានគ្រោះថ្នាក់លើសត្វផ្សោតដទៃទៀតនៅថ្ងៃមុខ។
លោកប្រាប់វីអូអេថា៖ «បញ្ហានេះគឺចំាបាច់ណាស់ត្រូវមានការចូលរួមពីប្រជាពលរដ្ឋជាពិសេស ដើម្បីធ្វើយ៉ាងណាឲ្យមានការកាត់បន្ថយឲ្យបានកាន់តែខ្លាំង ឬក៏បញ្ឈប់ទៅលើការប្រើប្រាស់ឧបករណ៍នេសាទខុសច្បាប់នៅតំបន់ផ្សោតរស់នៅ»។
លោកបន្ថែមថា នៅក្នុងខែ ១១ និងខែ១២នេះ ជារដូវដែលត្រីឡើងពីតំបន់ទន្លេសាបទៅតំបន់ទន្លេមេគង្គ។ហេតុដូច្នេះ លោកសំណូមពរដល់ប្រជាជននៅតំបន់នោះសូមបញ្ឈប់ការប្រើឧបករណ៍នេសាទខុសច្បាប់ ។
សត្វផ្សោតទន្លេមេគង្គ គឺជារតនៈសម្បត្តិធម្មជាតិមានជីវិត ដែលមានប្រមាណ ៩០ក្បាលរស់នៅតាមបណ្តោយដងទន្លេមេគង្គ នៃខេត្តក្រចេះ និងខេត្តស្ទឹងត្រែងរបស់ប្រទេសកម្ពុជា។ នេះបើតាមអង្គការ WWF កម្ពុជា។ បើតាមសេចក្តីប្រកាសរបស់រដ្ឋបាលជលផល ដំណាលគ្នានឹងមានការស្លាប់សត្វផ្សោតជាបន្តបន្ទាប់នៅឆ្នាំ២០២៣នេះ សត្វផ្សោតចំនួន៨ក្បាលក៏បានកើតនៅឆ្នាំដដែលនេះផងដែរ៕
