លោក Najib Razak នាយករដ្ឋមន្ត្រីនៃប្រទេសម៉ាឡេស៊ីនិយាយថា សពរបស់លោក Kim Jong Nam ជាជនរងគ្រោះនៃការធ្វើឃាតខុសពីប្រក្រតីកាលពីខែមុននៅចំណតយន្តហោះអន្តរជាតិទីក្រុងគូឡាឡាំពួ បានត្រូវបញ្ចេញទៅឲ្យប្រទេសកូរ៉េខាងជើងទៅ តាមសំណើរបស់ក្រុមគ្រួសារ។
លោកនាយករដ្ឋមន្ត្រី Najib បានមានប្រសាសន៍ថា បន្ទាប់ពីការបញ្ចប់ការវះពិនិត្យសពហើយនិងទទួលបានលិខិតពីក្រុមគ្រួសារដែលស្នើឲ្យបញ្ជូនសពនោះទៅកាន់ប្រទេសកូរ៉េខាងជើងវិញ អ្នកវិភាគសពបានយល់ព្រមប្រគល់សពនោះ។ ជនជាតិម៉ាឡេស៊ី៩នាក់ដែលត្រូវបានឃុំខ្លួននៅក្នុងប្រទេសកូរ៉េខាងជើងចាប់តាំងពីការសម្លាប់នោះមកក៏បានត្រូវគេអនុញ្ញាតឲ្យវិលត្រឡប់ទៅកាន់ប្រទេសម៉ាឡេស៊ីវិញដែរ។
លោក Kim Jong Nam បានត្រូវគេបំពុលថ្នាំនៅចំណតយន្តហោះនៅក្នុងឃាតុកម្មបែបសម័យសង្គ្រាមត្រជាក់ដោយប្រើសារធាតុពុលដ៏ប្រល័យដែលត្រូវបានហាមឃាត់ដោយអង្គការសហប្រជាជាតិថាជាអាវុធប្រល័យលោក។
ប្រទេសកូរ៉េខាងត្បូង បានស្តីបន្ទោសការស្លាប់របស់លោក Kim Jong Nam នោះទៅលើប្រទេសកូរ៉េខាងជើងដែលជាប្រទេសជិតខាងរបស់ខ្លួន ក៏ប៉ុន្តែ កូរ៉េខាងជើងបានច្រានចោលការចោទប្រកាន់ទាំងនេះ។
កូរ៉េខាងជើងបានច្រានចោលការស៊ើបអង្កេតរបស់ប្រទេសម៉ាឡេស៊ីថាជាការប៉ុនប៉ងដើម្បីបង្ខូចកេរ្តិ៍ខ្លួន ហើយបាននិយាយទទូចថា លោក Kim Jong Nam ទំនងជាស្លាប់ដោយសារការគាំងបេះដូង៕
