នៅថ្ងៃពុធនេះ តុលាការឧទ្ធរណ៍ម៉ាឡេស៊ីបានសម្រេចតម្កល់ទុកសាលក្រមកាត់ទោសអតីតនាយករដ្ឋមន្ត្រីម៉ាឡេស៊ីលោក Najib Razak ក្រោមបទចោទប្រកាន់ថាបានប្រព្រឹត្តិអំពើពុករលួយទាក់ទិននឹងរឿងអាស្រូវថវិការាប់ពាន់លានដុល្លាររបស់ក្រុមហ៊ុន 1MDB របស់រដ្ឋ។ នេះបើយោងតាមសេចក្ដីរាយការណ៍របស់ទីភ្នាក់ងារព័ត៌មាន Reuters។
លោក Najib បានប្តឹងឧទ្ធរណ៍ប្រឆាំងនឹងសាលក្រមតុលាការក្នុងទីក្រុងគូឡាឡាំពួ ដែលបានកាត់ទោសលោកឲ្យជាប់ពន្ធនាគារ ១២ ឆ្នាំ និងពិន័យជាប្រាក់ ៥០ លានដុល្លារអាមេរិក កាលពីឆ្នាំមុន ក្រោមបទចោទប្រកាន់ថាលោកបានរំលោភលើសេចក្តីទុកចិត្ត រំលោភអំណាច និងលាងលុយកខ្វក់។ នេះគឺជាសវនាការមួយក្នុងចំណោមសវនាការចំនួន ៥ ដែលលោកNajib ត្រូវប្រឈម ពាក់ព័ន្ធនឹងបទចោទប្រកាន់អំពើពុករលួយ។
តុលាការបានរកឃើញថា លោក Najib បានទទួលថវិកាខុសច្បាប់ប្រមាណ ១០ លានដុល្លារអាមេរិកពីក្រុមហ៊ុន SRC International ដែលពីមុនជាផ្នែកមួយរបស់ក្រុមហ៊ុន 1MDB។ លោក Najib បានបដិសេធថាលោកមិនបានប្រព្រឹត្តិដូចការចោទប្រកាន់នោះទេ។
លោកចៅក្រម Abdul Karim Abdul Jalil នៃតុលាការឧទ្ធរណ៍ម៉ាឡេស៊ី បាននិយាយថា លោកឯកភាពតាមសាលក្រមរបស់តុលាការក្រុងគូឡាឡាំពួទាក់ទិននឹងការកាត់ទោសនិងផ្ដន្ទាទោសនេះ។
លោក Shafee Abdullah ដែលជាមេធាវីរបស់លោក Najib បានបញ្ជាក់ប្រាប់តុលាការថា លោក Najib អាចនឹងប្ដឹងបន្តទៀតឡើងទៅតុលាការសហព័ន្ធ ដែលជាតុលាការកំពូលរបស់ប្រទេសម៉ាឡេស៊ី៕
