កាសែតរស្មីកម្ពុជាបានបិទដំណើរការទាំងស្រុង នាពេលថ្មីៗនេះ ក្រោមហេតុផលថាក្រុមប្រឹក្សាភិបាលក្រុមហ៊ុនប្រកាសថាមិនមានចំណូលគ្រប់គ្រាន់សម្រាប់បុគ្គលិក។ នេះបើតាមលោក ទាវ សារៈមុន្នី និពន្ធនាយកកាសែតរស្មីកម្ពុជា។
ការប្រកាសបិទលើកនេះគឺជាការប្រកាសបញ្ចប់វត្តមានកាសែតរស្មីកម្ពុជា ត្រឹមពេលនេះ។ កាសែតរស្មីកម្ពុជា កាលពីថ្ងៃទី២៨ ខែតុលា ឆ្នាំ២០២០ បានសម្រេចចិត្តបិទការបោះពុម្ពផ្សាយរបស់ខ្លួន ដោយសារមានបញ្ហាវិបត្តិហិរញ្ញវត្ថុ និងបន្តតែការផ្សាយបែបឌីជីថល រហូតមកដល់ថ្ងៃបិទដំណើរការទាំងស្រុង។
លោក ទាវ សារៈមុន្នី និពន្ធនាយកកាសែតរស្មីកម្ពុជា ដែលបម្រើការនៅស្ថាប័ននេះតាំងពីកាសែតនេះចាប់ផ្ដើមនៅឆ្នាំ១៩៩៣ ប្រាប់វីអូអេនៅថ្ងៃអង្គារនេះថា កាសែតរស្មីកម្ពុជាសម្រេចចិត្តរំសាយបុគ្គលិកដោយសារតែក្រុមហ៊ុនមិនមានចំណូលសម្រាប់ផ្គត់ផ្គង់ការចំណាយតទៅទៀត។
លោកបញ្ជាក់ថា៖ «ក្រុមប្រឹក្សាភិបាលក្រុមហ៊ុនគាត់ប្រកាសថា យើងអត់មានចំណូលដើម្បីអាចទ្រទ្រង់ចំណាយបាន»។
លោកបន្ថែមថាបើទោះបីជាក្រុមហ៊ុនប្រកាសថារំសាយបុគ្គលិក ក៏ខាងក្រុមហ៊ុនមានដំណោះស្រាយតាមច្បាប់ការងារសម្រាប់បុគ្គលិក ដោយផ្ដល់នូវប្រាក់អតីតភាពការងារ និងប្រាក់បញ្ឈប់ពីការងារ។
លោក ណុប វី នាយកប្រតិបត្តិសមាគមសម្ព័ន្ធអ្នកសារព័ត៌មានកម្ពុជា ហៅកាត់ថាខេមបូចា ប្រាប់វីអូអេថាលោកសោកស្ដាយចំពោះការបិទកាសែតមួយនេះ ដែលជាការបាត់បង់បណ្ដាញសារព័ត៌មាននៅកម្ពុជា។
លោកថ្លែងថា៖ «ជារួមគឺការបាត់បង់បណ្ដាញសារព័ត៌មានដែលជាផ្នែកមួយតិចឬច្រើននឹងបានចូលរួមចំណែកនៅក្នុងការផ្ដល់ព័ត៌មានជូនទៅដល់សាធារណជននៅក្នុងប្រទេសកម្ពុជាយើង»។
បើតាមលោក ទាវ សារៈមុន្នី កាសែតរស្មីកម្ពុជា ពីដើមឡើយ មានម្ចាស់គ្រប់គ្រង គឺឧកញ៉ា ថេង ប៊ុនម៉ា ដែលបានស្លាប់កាលពីឆ្នាំ២០១៦។ ប៉ុន្តែមុនពេលដែលកាសែតនេះប្រកាសបិទទាំងស្រុង សារព័ត៌មានមួយនេះ ត្រូវបានគ្រប់គ្រងដោយបុគ្គលម្នាក់ឈ្មោះ ផ្លុង ឆុំ។
ការស្រាវជ្រាវរបស់Media Ownership Monitorដែលជាគម្រោងមួយសហការស្រាវជ្រាវដោយមជ្ឈមណ្ឌលកម្ពុជា ដើម្បីប្រព័ន្ធផ្សព្វផ្សាយឯករាជ្យ(CCIM) ចេញផ្សាយកាលពីឆ្នាំ២០១៥ បង្ហាញថាក្នុងឆ្នាំ២០០៥ កាសែតរស្មីកម្ពុជាត្រូវបានប្តូរកម្មសិទ្ធិពីលោកឧកញ៉ា ថេង ប៊ុនម៉ា ទៅលោក សាយ ឈុំ ដែលជាប្រធានព្រឹទ្ធសភា៕
សារព័ត៌មានរស្មីកម្ពុជាបិទដំណើរការទាំងស្រុង ក្រោមហេតុផលមិនមានចំណូលសម្រាប់ផ្គត់ផ្គង់
ភ្នំពេញ —
