អ្នកឧកញ៉ា ឡេង ណាវ៉ាត្រា បានច្រានចោលការចុះផ្សាយរបស់សារព័ត៌មានដែលថា លោកជាអ្នកលាងលុយឱ្យគេ ដោយបញ្ជាក់ថា មិនមានអ្នកណាម្នាក់នៅពីក្រោយមុខជំនួញរបស់លោកឡើយ។
កាលពីពេលថ្មីៗនេះ អ្នកសារព័ត៌មាន ឌឹ ខេមបូឌា ដេលី លោក តាំង សារ៉ាដា បានចុះផ្សាយព័ត៌មាន ក្រោមចំណងជើងថា តើអ្នកឧកញ៉ា ឡេង ណាវ៉ាត្រាជាអ្នកណា? ដោយបានលើកឡើងអំពីមន្ទិលសង្ស័យថា ឧកញ៉ាឡេង ណាវ៉ាត្រាកំពុងធ្វើសកម្មភាពលាងលុយកខ្វក់ឱ្យអ្នកមានអំណាចនៅក្នុងប្រទេសកម្ពុជា ជាពិសេសត្រកូលហ៊ុន។
លោក ឡេង ណាវ៉ាត្រា បានប្រតិកម្មខ្លាំងៗ និងបានចាត់ទុកថា ការផ្សាយនោះមិនពិត និងការពារខ្លួនថា លោកមិនបានលាងលុយកខ្វក់អ្វីនោះទេ។ នេះមិនមែនជាលើកទីមួយទេ ដែលលោកឡេង ណាវ៉ាត្រាចេញមកការពារខ្លួន និងប្រតិកម្មតបទៅលើការចោទប្រកាន់។
លោកថ្លែងថា៖ «ប៉ុន្តែដាច់ខាត អ្នកឯងមកចោទខ្ញុំថា ខ្ញុំលាងលុយគឺមិនបាន ព្រោះខ្ញុំអត់បានធ្វើ។ បើនិយាយថាខ្ញុំជំពាក់គេគឺបាន កុំឱ្យតែបោកប្រាស់គេ។ យើងមិនបានបោកប្រាស់គេទេ។ ខ្ញុំមិនបានបោកប្រាស់បងប្អូនណាទេ»។
លោក ឡេង ណាវ៉ាត្រា ចាត់ទុកការចុះផ្សាយរបស់លោក តាំង សារ៉ាដា ជា«ទង្វើដែលគ្មានគុធម៌»។
លោកបញ្ជាក់ថា៖ «អ៊ីចឹងអ្នកឯងចង់និយាយផ្តួលរលំ ឡេង ណាវ៉ាត្រា គឺមិនអាចទៅរួចទេ ត្រូវចាំឱ្យច្បាស់។ លោក តាំង សារ៉ាដា ត្រូវចាំឱ្យច្បាស់ ហើយនិពន្ធសាច់រឿងឱ្យបានល្អជាងនេះមក។ និពន្ធបែបនេះ វាអត់ត្រូវទេ។ មកស៊ើបអង្កេតខ្ញុំតទៅទៀតទៅ! លោកឯងអីក៏អាក្រក់ម៉្លេះ! លោកឯងទៅរស់នៅសំងំសុខនៅស្រុកគេ លោកឯង លោកឯងមិនបានជួយគេទេ លោកឯងបានជាមកបំផ្លាញក្មេងដូចជាខ្ញុំនេះ ដែលប្រឹងប្រែងតស៊ូជួយសង្គមជាតិ ដោយមិនខ្លាចស្លាប់...អត់មានឱ្យអ្នកឯងមកធ្វើអីតាមអំពើចិត្តទេ»។
លោក ឡេង ណាវ៉ាត្រា អះអាងថា ការរកស៊ីក្នុងរយៈពេល៥ឆ្នាំនេះគឺអតិថិជនជំពាក់លុយលោកជាង៣០០លានដុល្លារ ដែលរួមមានគម្រោងលក់ផ្ទះលក់រាប់ម៉ឺនល្វែង។
លោក តាំង សារ៉ាដា អ្នកសារព័ត៌មានរបស់ឌឹ ខេមបូឌា ដេលី បដិសេធមិនធ្វើការអត្ថាធិប្បាយអ្វីនោះទេ នៅពេលវីអូអេទាក់ទងដើម្បីសាកសួរ។
សារព័ត៌មានឌឹ ខេមបូឌា ដេលី កាលពីថ្ងៃទី២១ ខែមករា បានចេញផ្សាយវីដេអូសំឡេង ដែលមានរយៈពេលជាង២៩នាទី ក្រោមចំណងជើងថា «តើអ្នកឧកញ៉ាឡេង ណាវ៉ាត្រាជានរណា? សារព័ត៌មាននោះ បានរំលេច និងរៀបរាប់អំពីទ្រព្យសម្បត្តិរបស់លោក ឡេង ណាវ៉ាត្រា ដោយថា មានការសង្ស័យថា លោកកំពុងឈរឈ្មោះរកស៊ីលាងលុយកខ្វក់ឱ្យអ្នកមានអំណាចកំពូលនៅកម្ពុជា ជាពិសេសត្រកូលហ៊ុន។ សារព័ត៌មាននោះថា ការណ៍នេះតម្រូវឱ្យសមត្ថកិច្ចត្រូវបើកការស៊ើបអង្កេតដើម្បីទប់ស្កាត់ការលាងលុយកខ្វក់នេះ។
លោក តាំង សារ៉ាដា បានរៀបរាប់ក្នុងវីដេអូសំឡេងថា៖ «ដោយសារតែទ្រព្យសម្បត្តិរបស់លោកកើនឡើងយ៉ាងឆាប់រហ័សក្នុងរយៈពេល៥ឆ្នាំចុងក្រោយ បើទោះបីជាក្រុមហ៊ុនជាច្រើនប្រឈមមុខនឹងការក្ស័យធន ដោយសារបញ្ហារាលដាលជាសាកលពីជំងឺកូវីដ១៩នោះ ទើបមានមន្ទិលសង្ស័យថា ឧកញ៉ារូបនេះកំពុងធ្វើសកម្មភាពលាងលុយកខ្វក់ឱ្យអ្នកមានអំណាចនៅក្នុងប្រទេសកម្ពុជា ជាពិសេសគឺត្រកូលហ៊ុននេះតែម្តង»។
លោក តាំង សារ៉ាដា រៀបរាប់បន្តថា លោក ឡេង ណាវ៉ាត្រា ពុំដែលទទួលបានប្រាក់ចំណេញពីគម្រោងវិនិយោគទាំងអស់របស់ខ្លួននោះទេ ហើយអ្នកឧកញ៉ារូបនោះ បច្ចុប្បន្នលេចមុខមាត់ក្នុងសង្គមតាមរយៈការផ្ដល់ថវិកា២៣,៣លានដុល្លារក្នុងរយៈពេល៥ឆ្នាំចុងក្រោយឱ្យរដ្ឋាភិបាល កាកបាទក្រហមកម្ពុជា មន្ទីរពេទ្យគន្ធបុប្ផាជាដើម។
លោក ផៃ ស៊ីផាន អ្នកនាំពាក្យរដ្ឋាភិបាល ប្រាប់វីអូអេថា នេះជារឿងបុគ្គល ដូច្នេះលោកមិនមានការអត្ថាធិប្បាយអ្វីឡើយ។
ពាក់ព័ន្ធនឹងការចុះផ្សាយរបស់សារព័ត៌មានឌឹ ខេមបូឌា ដេលីអំពីលោកឡេង ណាវ៉ាត្រា លោក ប៉ែន បូណា រដ្ឋលេខាធិការក្រសួងព័ត៌មាន បានបង្ហោះសារនៅលើហ្វេសប៊ុករបស់លោកថា វិជ្ជាជីវៈសារព័ត៌មានមិនអនុញ្ញាតឱ្យយកការសង្ស័យមកធ្វើជាកម្មវត្ថុក្នុងការចោទប្រកាន់បុគ្គលណាម្នាក់ភ្ជាប់ទៅនឹងបទល្មើសអ្វីមួយឡើយ។ លោកបន្តថា បើចង់ផ្សាយរឿងធំបែបនេះ អ្នកសារព័ត៌មានត្រូវបើកការស៊ើបអង្កេតស៊ីជម្រៅមួយដើម្បីប្រមូលឯកសារ ភ័ស្តុតាងឱ្យបានគ្រប់គ្រាន់ និងរឹងមាំបំផុតជាមុនសិន។
គួរបញ្ជាក់ថា លោកឡេង ណាវ៉ាត្រា ជាឧកញ៉ាម្នាក់ដែលកំពុងមានភាពល្បីល្បាញក្នុងវិស័យអចលនទ្រព្យ ដីធ្លី និងផ្ទះល្វែងនៅកម្ពុជា។ លោកតែងតែបរិច្ចាគថវិកាទៅរដ្ឋាភិបាល។ កាលពីខែមីនា ឆ្នាំ២០២១ លោកបានបរិច្ចាគលុយចំនួន៣លានដុល្លារអាមេរិកទៅកាន់រដ្ឋាភិបាលកម្ពុជាដើម្បីទប់ស្កាត់ជំងឺកូវីដ១៩។
ក្រៅពីនេះលោក ឡេង ណាវ៉ាត្រា ក៏បានបង្កើត«គ្រឹះស្ថានមីក្រូហិរញ្ញវត្ថុឡេង ណាវ៉ាត្រា ឃែភីថលម.ក» ដែលទទួលបានអាជ្ញាបណ្ណស្របច្បាប់ពីធនាគារជាតិនៃកម្ពុជា និងក្រសួងពាណិជ្ជកម្ម អំឡុងឆ្នាំ២០២១ ដែលមានទីស្នាក់ការកណ្ដាលស្ថិតលើមហាវិថី OCIC ភូមិកៀនឃ្លាំង សង្កាត់ជ្រោយចង្វារ ខណ្ឌជ្រោយចង្វារ រាជធានីភ្នំពេញ៕
