អ្នកធ្វើយុទ្ធនាការផ្នែកសិទ្ធិមនុស្សនិយាយថា សេចក្តីស្នើច្បាប់ថ្មីមួយ ដែលអនុញ្ញាតឲ្យប៉ូលិសផាកពិន័យពលរដ្ឋដែលគេចាត់ទុកថា ស្លៀកពាក់ខ្លីមិនសមរម្យ នោះ អាចនឹងត្រូវបានគេយកទៅអនុវត្តនិងធ្វើឲ្យប៉ះពាល់ដល់សិទ្ធិសេរីភាពរបស់ស្រ្តី ក៏ដូចជាការបង្កើតនូវវប្បធម៌និទណ្ឌភាពទាក់ទងអំពើហិង្សាផ្លូវភេទជាដើម។
សេចក្តីព្រាងច្បាប់ថ្មីនេះ ដែលនឹងត្រូវចូលជាធរមាននៅឆ្នាំក្រោយ ប្រសិនបើមានការយល់ព្រមដោយក្រសួងពាក់ព័ន្ធនានានិងរដ្ឋសភានោះនឹងដាក់ការហាមប្រាមដល់បុរសដែលចេញក្រៅផ្ទះមិនពាក់អាវ និងហាមស្ត្រីមិនឲ្យ«ស្លៀកខ្លីខើចលើ ខើចក្រោម» ឬ«សម្លៀកបំពាក់ស្តើងដែលអាចមើលឃើញកេរភេទ»។
ខណៈរដ្ឋាភិបាលតាក់តែងច្បាប់នេះឡើង ក្នុងបំណងថែរក្សាប្រពៃណីជាតិនោះអ្នករិះគន់ព្រួយបារម្ភថា ច្បាប់នេះ នឹងត្រូវគេយកទៅប្រើប្រាស់ធ្វើជាឧបករណ៍ ដើម្បីត្រួតត្រានិងគាបសង្កត់លើស្រី្តភេទ នៅក្នុងប្រទេសដែលជាសង្គមអភិរក្ស។
លោកស្រី ចក់ សុភាព នាយិកាប្រតិបត្តិនៃមជ្ឈមណ្ឌលសិទ្ធិមនុស្សកម្ពុជា លើកឡើងថា៖ «ក្នុងរយៈពេលប៉ុន្មានខែចុងក្រោយថ្មីៗនេះ យើងឃើញមានការតាមដាននិងត្រួតពិនិត្យមើលការស្លៀកពាក់របស់ស្ត្រីដោយមន្ត្រីជាន់ខ្ពស់រដ្ឋាភិបាល ដែលធ្វើឲ្យប៉ះពាល់ដល់សិទ្ធិសេរីភាពបុគ្គលក៏ដូចជាសិទ្ធិសម្តែងផ្ទាល់ខ្លួនរបស់ស្រ្តីផងដែរ ហើយបែរជាបន្ទោសស្ត្រីចំពោះអំពើហិង្សាលើស្ត្រីភេទ»។
លោកស្រីបន្តថា ៖ «ខ្ញុំព្រួយបារម្ភថាច្បាប់នេះនឹងត្រូវគេយកទៅប្រើប្រាស់មិនសមហេតុផលប្រឆាំងស្ត្រីភេទ ដែលគ្រាន់តែអនុវត្តនូវសិទ្ធិសេរីភាពជាមូលដ្ឋានរបស់ពួកគេ»។
ប៉ុន្តែលោក អ៊ុក គឹមលេខ រដ្ឋលេខាធិការក្រសួងមហាផ្ទៃ ដែលជាអ្នកដឹកនាំដំណើរការធ្វើសេចក្តីព្រាងច្បាប់ថ្មីនេះ បានឲ្យដឹងថា ច្បាប់នេះត្រូវការជាចាំបាច់ក្នុងការអភិរក្សវប្បធម៌ប្រពៃណី។
លោកបានថ្លែងប្រាប់ទីភ្នាក់ងារព័ត៌មានReutersថា៖ «វាជារឿងល្អ ក្នុងការស្លៀកពាក់មិនខើចលើសពីពាក់កណ្តាលភ្លៅ»។
លោកបន្ថែមទៀតថា៖ «វាមិនមែនជារឿងសណ្តាប់ធ្នាប់សាធារណៈសុទ្ធសាធនោះទេ តែវាក៏ជារឿងទំនៀមទម្លាប់ប្រពៃណីផងដែរ»។
កាលពីដើមឆ្នាំនេះអ្នកលក់ផលិតផលអនឡាញម្នាក់ឈ្មោះថៃ ស្រីនាងត្រូវបានកាត់ទោសឲ្យជាប់ពន្ធនាគារ៦ខែ ពីបទពាក់ព័ន្ធនឹងរឿងផ្សព្វផ្សាយរូបភាពអាសអាភាស និងការស្លៀកពាក់មិនសមរម្យ បន្ទាប់ពីនាងមិនអើពើនឹងការព្រមានរបស់មន្ត្រីរដ្ឋាភិបាល ដែលហាមមិនឲ្យស្លៀកពាក់លេចលើលេចក្រោម ក្នុងពេលផ្សាយផ្ទាល់លក់សម្លៀកបំពាក់និងឡេលាបខ្លួននោះតាមប្រព័ន្ធសង្គមហ្វេសប៊ុក។
ការចាប់ខ្លួនស្ត្រីរូបនេះត្រូវបានធ្វើឡើង បន្ទាប់ពីលោកនាយករដ្ឋមន្ត្រី ហ៊ុន សែន បានអំពាវនាវឲ្យអាជ្ញាធរតាមឃ្លាំមើលស្រ្តីរូបណាដែលលក់ដូរតាមប្រព័ន្ធអនឡាញ ហើយស្លៀកពាក់ខ្លីធ្វើឲ្យមានភាពស្រើបស្រាល ដែលជាការធ្វើឲ្យខូចដល់វប្បធម៌កម្ពុជា ហើយដែលលើកទឹកចិត្តឲ្យមានការរំលោភផ្លូវភេទ។
ក្រុមសិទ្ធិមនុស្សបានរិះគន់ដល់ការបង្រ្កាបនោះ ហើយព្រមានថាច្បាប់ថ្មីនេះ អាចដាក់ស្រ្តីឲ្យស្ថិតក្នុងហានិភ័យបន្ថែមទៀត ទាក់ទងនឹងការបំពាននិងអំពើហិង្សាខាងផ្លូវភេទ ដោយជំរុញឲ្យមានវប្បធម៌បន្ទោសជនរងគ្រោះទៅវិញ។
លោកស្រី Ming Yu Hah នាយិការងអង្គការ Amnesty International ប្រចាំតំបន់អាស៊ីប៉ាស៊ីហ្វិក បានឲ្យដឹងថា៖ ការស្តីបន្ទោសស្ត្រីទាក់ទងនឹងជម្រើសនៃការស្លៀកពាក់របស់ពួកគេ ជាការអនុវត្តនូវគំនិតដែលថា ស្ត្រីជាអ្នកធ្វើឲ្យមានអំពើហិង្សាផ្លូវភេទលើខ្លួនឯងហើយវាបង្កើនវប្បធម៌និទណ្ឌភាព ដែលកើតមានឡើងពាក់ព័ន្ធនឹងអំពើហិង្សាយេនឌ័រ។
ពលរដ្ឋខែ្មរជាច្រើននៅតែគិតថាស្រ្តីខ្មែរជាមនុស្សស្រគត់ស្រគំទន់ភ្លន់និងស្ងាត់ស្ងៀម ដូចអ្វីដែលមានចែងក្នុងច្បាប់ស្រី ដែលជាច្បាប់មួយដាក់គំនាបលើស្ត្រី ហើយដែលអង្គការសហប្រជាជាតិ បានលើកឡើងកាលពីឆ្នាំទៅថា ច្បាប់នេះគួរត្រូវបានលប់ចេញ«ទាំងស្រុង»ពីកម្មវិធីសិក្សានានា។
អង្គការសហប្រជាជាតិ បានហៅច្បាប់ស្រីនោះថាជា«ឫសគល់ដែលផ្តល់តម្លៃទាបដល់ស្ត្រីភេទ»។ ច្បាប់ដែលមានអាយុជាច្រើនសតវត្សរ៍មកនេះ ហើយដែលត្រូវបានគេដាក់ក្នុងកម្មវិធីសិក្សារហូតដល់ឆ្នាំ២០០៧នោះ បង្រៀនឲ្យស្រ្តីភេទស្តាប់បង្គាប់និងត្រូវចេះរៀបឬកពាររបស់ខ្លួនយ៉ាងនេះឬយ៉ាងនោះ។
លោកស្រី Ming Yu Hah បន្តទៀតថា៖ «ការគោរពប្រពៃណីនេះអាចបង្កើតសំណួរថាតើនរណាជាអ្នកកំណត់និយមន័យនៃប្រពៃណី? ឈរលើលើមូលដ្ឋានអ្វី? ហើយក្នុងគោលបំណងអ្វី?»៕
ប្រែសម្រួលដោយលោក ជ្រា វណ្ណារិទ្ធ
