ពលករឡាវជាច្រើនដែលប្រឈមនឹងស្ថានភាពសេដ្ឋកិច្ចមិនល្អកំពុងស្វែងរកការងារធ្វើនៅក្នុងប្រទេសថៃ កូរ៉េខាងត្បូង និងប្រទេសផ្សេងទៀត ដើម្បីបានប្រាក់បៀវត្សរ៍ប្រសើរជាងអ្វីដែលពួកគេអាចរកបាននៅក្នុងប្រទេសឡាវ។ ប៉ុន្តែ ការស្វះស្វែងរកការងារធ្វើទាំងនេះក៏ធ្វើឱ្យពួកគេជួបហានិភ័យផងដែរ ដោយពួកគេអាចធ្លាក់ចូលក្នុងអន្ទាក់បំណុលនិងការជួញដូរមនុស្ស។
ប្រទេសឡាវមានប្រាក់បៀវត្សរ៍អប្បបរមាទាបបំផុតនៅក្នុងតំបន់ ដែលជាបញ្ហាមួយដែលរឹតតែធ្ងន់ធ្ងរបន្ថែមទៀតដោយសារអតិផរណានិងការធ្លាក់តម្លៃរូបិយប័ណ្ណគីបរបស់ខ្លួន។ ប្រទេសនេះក៏កាន់តែពឹងផ្អែកផងដែរលើប្រទេសចិនដោយសារតែបំណុលនិងការវិនិយោគដ៏ច្រើនក្រាស់ក្រែលរបស់ចិនលើវិស័យថាមពលនៅក្នុងប្រទេសនេះ។
នៅពេលជាមួយគ្នានេះ របាយការណ៍របស់រដ្ឋាភិបាលឡាវបានបង្ហាញថា កង្វះពលករជំនាញ ដែលក្រសួងថាមពលនិងរ៉ែរបស់ឡាវថាបណ្តាលមកពី «អ្នកជំនាញវិជ្ជាជីវៈសម្រុកទៅធ្វើការនៅបរទេស» និងការផ្តល់ថវិកាមិនគ្រប់គ្រាន់ បានបង្អាក់ដល់គម្រោងថាមពលវារីអគ្គិសនីនិងរ៉ែនៅក្នុងប្រទេស។
ក្រសួងការងារនិងសុខុមាលភាពសង្គមនៃប្រទេសឡាវបានរាយការណ៍កាលពីឆ្នាំមុនថា ក្នុងចំណោមពលករឡាវ ៣០៣.៣៩១ នាក់ដែលធ្វើការនៅក្រៅប្រទេស ពលករ ១០០.២៣០ នាក់ធ្វើការដោយស្របច្បាប់ ចំណែកឯពលករ ២០៣.១៦១ នាក់ទៀតស្វែងរកការងារធ្វើនៅក្នុងប្រទេសជិតខាងដោយគ្មានការអនុញ្ញាតត្រឹមត្រូវ។
សេចក្តីរាយការណ៍មួយដែលបានចេញផ្សាយកាលពីខែកុម្ភៈដោយកាសែត Vientiane Times បានបញ្ជាក់ថា ជនជាតិឡាវប្រមាណ ២២៨.០០០ នាក់ធ្វើការនៅក្នុងប្រទេសថៃ ដែលក្នុងនោះ ៧០.០០០ នាក់ធ្វើការដោយខុសច្បាប់។
សេចក្ដីរាយការណ៍នេះបានបន្ថែមថា ពលករឡាវ ១៣.០០០ នាក់ទៀតធ្វើការនៅក្នុងប្រទេសកូរ៉េខាងត្បូង។ តួលេខទាំងនេះមិនបានរួមបញ្ចូលនូវពលករចំណាកស្រុកក្នុងចំនួនដ៏ច្រើនដែលបានឆ្លងព្រំដែនដោយខុសច្បាប់ចូលទៅក្នុងប្រទេសជិតខាង ជាពិសេសប្រទេសចិននោះទេ។
គេឃើញមានទិន្នន័យកត់ត្រាតែបន្តិចបន្តួចប៉ុណ្ណោះអំពីពលករចំណាកស្រុកឡាវនៅក្នុងប្រទេសចិន។ ប៉ុន្តែ គេឃើញមានសេចក្ដីរាយការណ៍ថា ជនជាតិឡាវខ្លះបានឆ្លងព្រំដែនពីស្រុកខ្លះនៅក្នុងខេត្ត Luang Namtha ទៅរកការងារប្រចាំសប្ដាហ៍ឬការងារតាមរដូវកាលនៅក្នុងប្រទេសចិន។ នេះបើតាមការបញ្ជាក់របស់អ្នកនាំពាក្យការិយាល័យតំបន់អាស៊ីនិងប៉ាស៊ីហ្វិកនៃអង្គការទេសន្តរប្រវេសន៍អន្តរជាតិ (IOM) នៅក្នុងទីក្រុងបាងកកនៃប្រទេសថៃ។
អ្នកនាំពាក្យរូបនេះបានថ្លែងថា៖ «ពលករចំណាកស្រុកដូចនេះប្រើលិខិតឆ្លងដែននិងបណ្ណឆ្លងដែនដើម្បីឆ្លងកាត់ព្រំដែនទៅរកការងារមិនទៀងទាត់ធ្វើនៅក្នុងប្រទេសចិនតាមរយៈពួកមេខ្យល់ឡាវនិងចិន។ អាជ្ញាធរប្រទេសទាំងពីរនិងគ្រួសាររបស់ពួកគេមិនដឹងអំពីស្ថានភាពការងារនិងការរស់នៅរបស់ពួកគេនៅក្នុងប្រទេសចិននោះទេ»។
អ្នកនាំពាក្យរូបនេះបានបន្ថែមថា៖ «ពួកគេមិនអាចដឹងអំពីកន្លែងដែលពលករទាំងនេះធ្វើការនិងរស់នៅទេ។ ករណីនេះបង្កើនភាពងាយរងគ្រោះរបស់ពួកគេចំពោះហានិភ័យនៃការរំលោភបំពាននិងការកេងប្រវញ្ច»។
អ្នកនាំពាក្យរូបនេះបានបញ្ជាក់ទៀតថា ជនជួញដូរមនុស្សប្រើបណ្តាញសង្គមអនឡាញនានាដូចជាទិកតុក (TikTok) ជាដើមដើម្បីទាក់ទាញពលករ និងប្រើការបំភាន់ មេខ្យល់ និងសម្ពាធពីមិត្តភក្តិដើម្បីល្បួងពលករឱ្យធ្លាក់ចូលទៅក្នុងផែនការបោកប្រាស់នេះ។ ពលករចំណាកស្រុកឡាវជាច្រើនត្រូវបានគេសន្យាដដែលៗថានឹងផ្ដល់ការងារដែលទទួលបានប្រាក់បៀវត្សរ៍ច្រើនផ្នែកសេវាកម្មអនឡាញឬក៏ផ្នែករូបិយប័ណ្ណឌីជីថល។
ទោះបីជាមានការសន្យាអំពីការផ្ដល់ការងារដែលមានប្រាក់បៀវត្សរ៍ច្រើននៅបរទេសក៏ដោយ ក៏ របៀបជ្រើសរើសពលករបែបបោកបញ្ឆោតនេះជាញឹកញយនាំឱ្យមានការកេងប្រវញ្ចនិងទាសភាពបំណុលដោយសារតែការតម្រូវឱ្យបង់សោហ៊ុយជាមុននិងកិច្ចព្រមព្រៀងមិនច្បាស់លាស់។ នេះបើតាមការបញ្ជាក់របស់លោក Matthew Friedman ប្រធានក្លឹបមេគង្គ (Mekong Club) នៅទីក្រុងហុងកុង ដែលជាអង្គការប្រឆាំងនឹងទាសភាព។
លោក Friedman បាននិយាយថា៖ «ជាញឹកញយ ពលករទាំងនេះមិនដឹងថាពួកគេនឹងជួបប្រទះហេតុការណ៍អ្វីខ្លះទេ។ ពួកគេចុះហត្ថលេខាលើកិច្ចព្រមព្រៀងដោយមិនបានយល់ដឹងពេញលេញអំពីអ្វីដែលពួកគេចុះហត្ថលេខា ឬក៏អត្រាការប្រាក់និងសោហ៊ុយផ្សេងៗនោះឡើយ»។
លោកបានបន្ថែមថា នៅក្នុងប្រទេសកូរ៉េខាងត្បូង ជាពិសេសនៅទីក្រុងសេអ៊ូលឬទីក្រុង Busan ពលករបានជាប់ក្នុងអន្ទាក់បំណុល ដោយមិនអាចចាកចេញបានទេប្រសិនបើមិនសងបំណុលទាំងអស់។
អង្គការ IOM បានលើកឡើងថា ពលករឡាវដែលភាគច្រើនជាមនុស្សពេញវ័យក្មេងៗនិងជាយុវជនជំទង់បានធ្វើចំណាកស្រុកកាន់តែច្រើនទៅប្រទេសថៃដើម្បីស្វែងរកការងារដែលមានប្រាក់បៀវត្សរ៍ច្រើននៅក្នុងផ្នែកសំណង់ ផ្នែកបម្រើតាមភោជនីយដ្ឋាន ឬផ្នែកបម្រើតាមផ្ទះ ហើយជារឿយៗប្រឈមនឹងការកេងប្រវញ្ចនិងស្ថានភាពគ្មានសុវត្ថិភាព។
ទោះបីជាមានកិច្ចព្រមព្រៀងតាមផ្លូវច្បាប់អំពីការងាររវាងប្រទេសថៃនិងប្រទេសឡាវក៏ដោយ ក៏ចំណាកស្រុកខុសច្បាប់នៅតែបន្តកើតមានដោយសារតែភាពចន្លោះប្រហោងក្នុងក្របខ័ណ្ឌច្បាប់និងក្នុងប្រព័ន្ធតាមដាននៃប្រទេសទាំងពីរ។
ករណីថ្មីបំផុតពាក់ព័ន្ធនឹងរឿងនេះបានកើតឡើងកាលពីថ្ងៃទី ៣ ខែមីនានៅក្នុងខេត្ត Udon Thani នាប៉ែកឦសានប្រទេសថៃដែលស្ថិតនៅចម្ងាយប្រមាណ ៧៥ គីឡូម៉ែត្រពីព្រំដែនឡាវ ដែលនៅទីនោះប៉ូលិសមូលដ្ឋានបានជួយសង្គ្រោះនារីឡាវម្នាក់អាយុ ១៨ ឆ្នាំដែលធ្វើការជាអ្នកបម្រើតាមផ្ទះពីការធ្វើបាបធ្ងន់ធ្ងរពីសំណាក់ម្ចាស់ផ្ទះដែលនាងធ្វើការ៕
ប្រែសម្រួលដោយលោក ឈឹម សុមេធ
