ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

សកម្មជន​សុំ​ឱ្យ​រដ្ឋាភិបាល​បញ្ចុះថ្លៃ​លិខិត​ឆ្លង​ដែន​និង​បង្កើន​បុគ្គលិក​ទូតនៅថៃ


លោក មឿន តុលា ប្រធាន​កម្មវិធី​ការងារ​នៃ​មជ្ឈមណ្ឌល​អប់រំច្បាប់​សម្រាប់​សហគមន៍​។
លោក មឿន តុលា ប្រធាន​កម្មវិធី​ការងារ​នៃ​មជ្ឈមណ្ឌល​អប់រំច្បាប់​សម្រាប់​សហគមន៍​។

សកម្មជន​ការពារ​សិទ្ធិ​ពលករ​ស្នើ​ឡើង​ថា​ ដើម្បី​ឱ្យ​ពលករ​ខ្មែរ​រាប់​ម៉ឺននាក់​រស់នៅ​និង​ធ្វើ​ការ​ដោយ​ស្រប​ច្បាប់នៅ​ប្រទេស​ថៃ ​រដ្ឋាភិបាល​កម្ពុជា​ត្រូវ​ពិចារណា​លើ​តម្លៃ​លិខិត​ឆ្លង​ដែន​ដែល​មាន​តម្លៃ​ខ្ពស់​និង​បង្កើន​ចំនួន​បុគ្គលិក​ស្ថាន​ទូត​តិចតួច​ព្រោះពួកគេ​ត្រូវ​ធ្វើការងារ​ដោះស្រាយ​បញ្ហា​ពលករ​ដែល​មាន​ច្រើន។

ទាញ​យក​ពី​តំណភ្ជាប់​ដើម

លោក​មឿន តុលា​ ប្រធាន កម្មវិធីការងារ នៃមជ្ឈមណ្ឌលអប់រំច្បាប់ សម្រាប់សហគមន៍បាន​បញ្ជាក់​ក្នុង​កម្មវិធី Hello VOA ​កាលពីថ្ងៃ​ព្រហស្បតិ៍​ថា៖

«អ្វី ដែល​រដ្ឋាភិបាល​គួរ​ពិចារណាគឺ​រឿង​តម្លៃ​ប៉ាស្ព័រ​ដែល​ ចេញ​ឱ្យ​ពលករ​យើង​រហូត​ដល់​៤៥០០បាត​នេះ គឺ​ជា​តម្លៃ​មួយ​ដែល​ថ្លៃ​ហើយ​គាត់​ត្រូវ​រង់ចាំ​យូរ​។ ទីពីរ​ការសុំ​ឱ្យ​ថៃ​ពន្យា​ពេល​ចុះ​បញ្ជីពលករ​នេះ​វា​ជាការត្រឹម​ត្រូវ​ក៏ប៉ុន្តែ​មិន​ទាន់​អស់​ទេ​រដ្ឋាភិបាល​គួរ​តែ ពិចារណា​ទៅលើ​បុគ្គលិក​នៃ ស្ថានទូត​ សេវាកម្ម​នៃ បុគ្គលិក​ស្ថានទូត​សម្រួល​យ៉ាង​ណា​ឱ្យ​ពលករ​ខ្មែរ​យើង​អាច​ចុះ បញ្ជី​បាន​ដោយ​រលូន​នៅក្នុង​ប្រទេស​គេ‍»។

ប្រទេសកម្ពុជា​និង​ថៃ​បាន​ចុះ​ហត្ថលេខា​កាលពី​ដើមខែ​កក្កដា​ដោយ​អនុញ្ញាត​ឱ្យពលករ​ខ្មែរ​ប្រហែល​៥ម៉ឺន​នាក់​ដែល​មិន​ទាន់​បាន​ពន្យា​ពេល​បណ្ណ​ស្នាក់​នៅ​បណ្តោះ​អាសន្ន​ឱ្យ​បាន​បន្ត​ស្នាក់​នៅ​រហូតដល់​ខែ​មិនា ឆ្នាំ​២០១៦ ​ដើម្បី​បំពេញ​បែបបទ​ក្លាយ​ជា​ពលករ​ស្រប​ច្បាប់។​

ពលករ​ដែល​មិនមាន​ឯកសារ​កំពុង​ធ្វើការ​នៅ​ប្រទេស​ថៃ​ជួប​ការលំបាកជាច្រើន​ដូច​ជា​មិន​ទទួល​បាន​ប្រាក់​ឈ្នួល​តាម​ស្តង់ដា​ដូច​អ្នក​មាន​ឯកសារត្រឹមត្រូវ​ទេ​។ ឧទាហរណ៍​ក្នុងមួយថ្ងៃ​អ្នក​ស្របច្បាប់​ទទួលកម្រៃ​បាន​៣០០​បាត ប៉ុន្តែ​ពួកគេ​មិន​ទទួល​បាន​គ្រប់​គ្រាន់តាម​ចំនួន​នេះទេ។ អ្នកខ្លះ​ទៀត​មិន​ហ៊ាន​ប្តឹងផ្តល់​តវ៉ា ហើយ​ក៏មិន​ហ៊ាន​តវ៉ា​នៅ​ពេលដែល​ថៅកែបង្ខំ​ឱ្យធ្វើការ​លើ​សម៉ោង​។ នេះ​បើ​តាមកា​របញ្ជាក់​របស់​លោក​មឿន តុលា។​

លោក​មឿន តុលាបាន​បន្ថែម​ថាដោយសារ​ប្រទេស​ថៃ រងសម្ពាធ​ពីរបាយការណ៍​អន្តរជាតិ​ច្រើន​ពាក់​ព័ន្ធ​នឹ​ង​ផលិតផល​ពីប្រទេស​ថៃ​ដែល​ប្រើ​ប្រាស់​កម្លាំង​ពលកម្ម​ដោយ​បង្ខំ​គឺ​ធ្វើ​ឱ្យ​ទាហាន​ថៃ​តែង​តែ ចុះ​ចាប់​ពលករ​ដែល​ខុសច្បាប់​ជាប្រចាំ។

«អញ្ចឹង​ទៅ​ពលករ​ដែល​ធ្វើ​ការ​ដោយខុសច្បាប់​គឺ​គាត់​ភ្នែកនៅកញ្ចឹង​ក​រហូត។ ជួនកាលពេល​កំពុង​ធ្វើ​ការ​គឺ​គាត់​រត់​តែម្តង‍»។

XS
SM
MD
LG