សាលាដំបូងខេត្តកោះកុងនៅថ្ងៃព្រហស្បតិ៍នេះ បានសម្រេចលើកពេល ប្រកាសសាលក្រមកាត់ទោសសកម្មជនការពារបរិស្ថានពីររូបរបស់អតីតអង្គការមាតាធម្មជាតិទៅថ្ងៃសុក្រទី២៦ ខែមករានេះ នៅគ្រាមានការរឹតបន្តឹងពីកម្លាំងសន្តិសុខនៅក្រៅសាលាដំបូងខេត្ត។ នេះបើតាមការបញ្ជាក់ពីមេធាវីការពារក្ដីសកម្មជនការពារបរិស្ថានទាំងពីរនិងក្រុមអ្នកឃ្លាំមើលការកាត់ក្ដី។
លោក ហ៊ុន វណ្ណៈ វ័យ៣៥ ឆ្នាំ និងលោក ឌឹម គុណឌី វ័យ២១ឆ្នាំ បានរងការចោទប្រកាន់ពីបទ «ប៉ះពាល់ដល់សិទ្ធិខាងរូបភាពនៃបុគ្គល» និង «ញុះញង់ឲ្យប្រព្រឹត្តបទឧក្រិដ្ឋជាអាទិ៍ តាមមាត្រា៣០២ និង៤៩៥ នៃក្រមព្រហ្មទណ្ឌកម្ពុជា ក្រោយពីពួកគេទាំងពីរនាក់ បានថតវីដេអូកប៉ាល់ពីរគ្រឿងដែលគេសង្ស័យថា កំពុងតែដឹកជញ្ជូនខ្សាច់ស៊ីលីការសម្រាប់នាំចេញដោយខុសច្បាប់ នៅតាមបណ្ដោយឆ្នេរព្រែកខ្សាច់ក្នុងខេត្តកោះកុងកាលពីថ្ងៃទី១១ ខែកញ្ញា ឆ្នាំ២០១៧។
លោក សំ ចំរើន មេធាវីការពារក្ដីសកម្មជនការពារបរិស្ថានទាំងពីរ បានប្រាប់ VOA នៅរសៀលថ្ងៃព្រហស្បតិ៍នេះថា តុលាការមានឆន្ទានុសិទ្ធិក្នុងការដកថយទៅធ្វើការពិចារណាលើការកាត់សេចក្ដី។
លោកថា តុលាការ នឹងប្រកាសសាលក្រមកាត់ទោសកូនក្ដីលោកនៅម៉ោង ២និង៣០រសៀលថ្ងៃសុក្រនេះ។ លោកមានក្ដីសង្ឃឹមថា កូនក្ដីលោកទាំងពីរនឹងទទួលបានសេរីភាព ដោយហេតុថា ពួកគេមិនបានប្រព្រឹត្តដូចការចោទប្រកាន់របស់តំណាងអយ្យការនោះឡើយ។
«ដូចខ្ញុំថា បញ្ជាក់ប្រាប់សារព័ត៌មានផ្សេងៗថាខ្ញុំ មិនហ៊ានទស្សន៍ទាយ អាដេញការសម្រេចរបស់លោកចៅក្រមទេ គ្រាន់តែខ្ញុំមានសង្ឃឹមថា នឹងមានភាពវិជ្ជមានច្រើនសម្រាប់កូនក្ដីខ្ញុំណា៎»។
មេធាវីរូបនេះក៏បានលើកឡើងហេតុផលបន្ថែមថា៖
«បាទដោយសារពួកគាត់ សុចរិតហើយមិនបានអ្វីដែលគាត់ធ្វើមិនចូលទៅក្នុងបទចោទប្រកាន់ ដែលតំណាងអយ្យការបាន សម្រេចចោទប្រកាន់កន្លងមកហ្នឹងអ្ហាស់បាទ»។
នៅក្នុងសវនាការកាត់ទោសសកម្មជនទាំងពីរនាក់នេះ មិនមានវត្តមានដើមបណ្ដឹងនោះទេ ដោយដើមបណ្ដឹងបានចាត់ឲ្យមេធាវីមួយរូប ធ្វើជាតំណាងខ្លួន។ នេះបើតាមការបញ្ជាក់របស់លោកមេធាវី សំ ចំរើន ដែលបានបដិសេធមិនទទួលភាពជាតំណាងជាដើមបណ្ដឹងរបស់មេធាវីខាងភាគីដែលប្ដឹងកូនក្ដីលោកទាំងពីរនាក់។
អ្នកទាំងពីរ ត្រូវបានចាប់ខ្លួន បន្ទាប់ពីមានពាក្យបណ្ដឹងពីក្រុមហ៊ុន LYP របស់សមាជិកព្រឹទ្ធសភានៃគណបក្សប្រជាជនកម្ពុជា គឺលោក លី យ៉ុងផាត់។ ពាក្យបណ្ដឹងនេះ ធ្វើឡើងតែមួយថ្ងៃប៉ុណ្ណោះ ក្រោយពីអង្គការមាតុធម្មជាតិ បានចេញផ្សាយខ្សែអាត់វីដេអូមួយ ដែលបង្ហាញពីភាពខុសគ្នានៃទិន្នន័យនៃការនាំចេញខ្សាច់របស់រដ្ឋាភិបាលកម្ពុជា។
ក្រោយការចាប់ខ្លួនសកម្មជនទាំងពីររូបបានពីរថ្ងៃ ក្រសួងមហាផ្ទៃបានសម្រេចលុបឈ្មោះអង្គការ«មាតាធម្មជាតិ» ចេញពីបញ្ជីអង្គការមិនមែនរដ្ឋាភិបាល។
លោក ខៀវ សុភ័គ អ្នកនាំពាក្យក្រសួងមហាផ្ទៃប្រាប់ VOA ថា ការសម្រេចលុបឈ្មោះអង្គការមាតាធម្មជាតិនេះគឺធ្វើទៅតាមសំណើរបស់ព្រះតេជគុណ ព្រហ្ម ធម្មជាតិ ដែលជាប្រធានអង្គការនេះ ដែលស្នើឲ្យក្រសួងមហាផ្ទៃ បញ្ចប់អាណត្តិអង្គការមាតាធម្មជាតិ។
លោក អ៊ិន គង់ជិត មន្ត្រីសិទ្ធិមនុស្សប្រចាំខេត្តកោះកុង មានប្រសាសន៍ប្រាប់ VOA នៅថ្ងៃ ព្រហស្បតិ៍នេះថា សវនាការកាត់ទោសសកម្មជនទាំងពីរនាក់ បានបញ្ចប់ទៅម៉ោង ១២និង៣០នាទីថ្ងៃត្រង់នេះ។
លោកបានថ្លែងបន្តថា មានការដាក់ពង្រាយកម្លាំងមានសមត្ថកិច្ច ប្រមាណជាង ១០នាក់ ដែលបានរារាំងមិនឲ្យ ក្រុមប្រជាពលរដ្ឋមកពីសហគមន៍នានាក្នុងខេត្តកោះកុងដែលរងគ្រោះដោយការបូមខ្សាច់ និងការរំលោភបំពានដីធ្លី ក៏ដូចជាយុវជនមកពីទីក្រុងភ្នំពេញប្រមាណ ២០នាក់ មិនឲ្យចូលរួមតាមដានដំណើរការជំនុំជម្រះក្តីនៅក្នុងសាលសវនាការ។
យ៉ាងណាក្ដីលោកជឿថា តុលាការខេត្តកោះកុង នឹងផ្ដល់យុត្តិធម៌ដល់សកម្មជនទាំងពីរដែលមិនបានប្រព្រឹត្តបទល្មើស តែពួកគេគ្រាន់តែចុះទៅប្រមូលព័ត៌មាន និងទិន្នន័យនៅទីកន្លែងកើតហេតុសម្រាប់កិច្ចការស្រាវជ្រាវដែលមានគោលដៅការពារធនធានធម្មជាតិនៅកម្ពុជា។
«អីចឹងការណ៍ដែលគាត់ទៅហ្នឹង គាត់គ្រាន់តែបំពេញវិជ្ជាជីវៈ ជាអ្នកស្រាវជ្រាវ ជាអ្នកស៊ើបអង្កេត ហើយអីចឹង គាត់មិនបានប្រព្រឹត្តអីខុសទេ ហើយការណ៍ដែលចាប់គាត់ឃុំឃាំងហ្នឹងគឺជាការដែល បង្អាក់នូវសកម្មភាពរបស់គាត់មិនឲ្យចូលរួមនៅក្នុងកិច្ចការពារធនធានធម្មជាតិបាទ»។
លោក ចាន់ ណាគ្រី មេការក្រុមហ៊ុន SEZ របស់លោកលី យ៉ុងផាត់ ជាឧកញ៉ាមួយរូប និងជាសមាជិកព្រឹទ្ធសភាមកពីគណបក្សប្រជាជនកម្ពុជា បានបញ្ជាក់ថា លោកមិនបានចូលខ្លួនក្នុងសវនាការនៅព្រឹកថ្ងៃព្រហស្បតិ៍នេះ ក្នុងនាមជាដើមបណ្តឹង ដោយហេតុលោកមានការមមាញឹកជាមួយការងាររបស់លោក។
លោកមានប្រសាសន៍ថា លោកបានប្រគល់សិទ្ធិឲ្យមេធាវីរបស់លោកចាត់ការក្នុងរឿងក្ដីនេះ ហើយបានបន្តចោទសកម្មជនទាំងពីរថា បានប្រព្រឹត្តល្មើស ទើបនាំដល់ការចាប់ពួកគេយកមកកាត់ទោស។
«ធម្មតាបើសិនជាអត់ខុស គេអត់ចាប់គាត់យកទៅកាត់ទោស ទៅតាមផ្លូវច្បាប់អញ្ចឹង បងណា៎»។
VOA ព្យាយាមសុំការអធិប្បាយពីតំណាងអយ្យការលោក អ៊ីវ ត្រាយ តែលោកជាប់រវល់ក្នុងសវនាការផ្សេងទៀត។ VOA ក៏មិនទាន់អាចសុំការអធិប្បាយពីលោក សំ ឃីតវៀន ស្នងការនគរបាលខេត្តកោះកុងបានដែរ ដោយទូរស័ព្ទរបស់លោកជាប់រវល់។
អង្គការមាតាធម្មជាតិដែលត្រូវបានរដ្ឋាភិបាលចាត់ទុកថា«ជាក្រុមញុះញង់» នៅពេលពួកគេទម្លាយរបាយការណ៍របស់គយតៃវ៉ាន់ ទាក់ទិនការនាំខ្សាច់ទៅកាន់កោះតៃវ៉ាន់។ របាយការណ៍នោះ បានបង្ហាញនូវទិន្នន័យតម្លៃនាំខ្សាច់ចេញរាប់លានដុល្លារ ដែលមិនត្រូវគ្នានឹងទិន្នន័យរបស់រដ្ឋាភិបាលកម្ពុជា។
យ៉ាងណាក៏ដោយ ប្រសិនបើត្រូវបានរកឃើញថាមានទោសមែន នោះសកម្មជនបរិស្ថានទាំងពីរនាក់នេះ អាចត្រូវប្រឈមនឹងការជាប់ពន្ធនាគារ២ឆ្នាំ និងត្រូវពិន័យជាប្រាក់ក្នុងម្នាក់ចំនួន៤លានរៀល។
សកម្មជនទាំងពីរនាក់ ត្រូវបានឃុំខ្លួនបណ្ដោះអាសន្នអស់រយៈពេលជាង៤ខែមកហើយ គិតចាប់តាំងពីថ្ងៃចាប់ខ្លួន៕
