មេដឹកនាំកូរ៉េខាងជើងលោក Kim Jong Un បានព្រមានថា លោកប្រហែលជាឈប់គោរពតាមការផ្អាកមួយរយៈដែលខ្លួនលោកបានធ្វើកន្លងមកទាក់ទិននឹងការសាកល្បងមីស៊ីលរយៈចម្ងាយឆ្ងាយ និងនុយក្លេអ៊ែរ ដោយលោកបានគំរាមថានឹងចាត់វិធានការ «ដ៏ភ្ញាក់ផ្អើល» មួយ ប្រសិនបើសហរដ្ឋអាមេរិកមិនព្រមបន្ធូរបន្ថយគោលជំហររបស់ខ្លួននៅក្នុងការចរចានុយក្លេអ៊ែរ។
លោក Kim Jong Un បាននិយាយថា គ្មានហេតុផលណាមួយដែលលោកត្រូវផ្អាកការសាកល្បងអាវុធទាំងនេះទេ ប្រសិនបើសហរដ្ឋអាមេរិកនៅបន្តធ្វើសមយុទ្ធយោធា និងលក់អាវុធទំនើបជាមួយ និងឲ្យប្រទេសកូរ៉េខាងត្បូងនោះ។ នេះបើយោងតាមការថ្លែងរបស់លោកដែលបានផ្សព្វផ្សាយនៅថ្ងៃពុធនេះដោយទីភ្នាក់ងារព័ត៌មានមជ្ឈិមកូរ៉េ ដែលជាទីភ្នាក់ងារព័ត៌មានផ្លូវការរបស់ប្រទេសកូរ៉េខាងជើង។
កូរ៉េខាងជើងមិនបានសាកល្បងនុយក្លេអ៊ែរ ឬក៏គ្រាប់ផ្លោងមីស៊ីលឆ្លងទ្វីបអស់រយៈពេលជាង ២ ឆ្នាំមកហើយ។ កាលពីខែមេសា ឆ្នាំ ២០១៨ លោក Kim Jong Un បានប្រកាសថា ប្រទេសរបស់លោក «មិនត្រូវការ» ការសាកល្បងដូចនេះទៀតទេ។ ការប្រកាសដូចនេះបានបើកផ្លូវឲ្យមានការចរចាជាមួយនឹងសហរដ្ឋអាមេរិកជិតពីរឆ្នាំ ដែលឥឡូវនេះការចរចានេះបានជាប់គាំង។
ប្រធានាធិបតីសហរដ្ឋអាមេរិកលោក Donald Trump ដែលបានជួបពិភាក្សាជាមួយនឹងលោក Kim Jong Un ៣ ដងរួចមកហើយ បាននិយាយថា លោក Kim Jong Un បានសន្យាដោយខ្លួនលោកផ្ទាល់ថានឹងមិនធ្វើការសាកល្បងគ្រាប់ផ្លោងមីស៊ីលឆ្លងទ្វីប ឬក៏នុយក្លេអ៊ែរឡើងវិញទេ ទោះបីជាមេដឹកនាំទាំងពីរមិនដែលសម្រេចនូវការព្រមព្រៀងនេះជាផ្លូវការក៏ដោយ។
ដោយថ្លែងកាលពីយប់ថ្ងៃអង្គារម្សិលមិញ លោក Trump ហាក់ដូចជាមិនសូវខ្វាយខ្វល់ខ្លាំងអំពីការគំរាមរបស់លោក Kim Jong Un នេះ ដោយលោកបានបញ្ជាក់ថា ទំនាក់ទំនងរបស់លោកជាមួយនឹងលោក Kim Jong Un នៅតែ «ល្អខ្លាំង» ដដែល។
លោក Trump និយាយដូច្នេះថា៖ «លោក Kim Jong Un តំណាងឲ្យប្រទេសរបស់លោក។ ខ្ញុំតំណាងឲ្យប្រទេសរបស់ខ្ញុំ។ យើងត្រូវធ្វើអ្វីដែលយើងត្រូវធ្វើ។ ប៉ុន្តែលោក Kim Jong Un បានចុះហត្ថលេខាលើកិច្ចព្រមព្រៀងមួយ ដែលបញ្ជាក់អំពីការលុបបំបាត់នុយក្លេអ៊ែរ»។
លោក Trump បានបន្ថែមថា៖ «ខ្ញុំគិតថា លោក Kim Jong Un គោរពតាមពាក្យសម្ដីរបស់លោក។ ដូច្នេះ យើងនឹងអាចរកដំណោះស្រាយបាន»៕
