ភ្ជាប់​ទៅ​គេហទំព័រ​ទាក់ទង

លោក​រ៉មនី​ឈ្នះ​ឆ្នោត​នៅ​រដ្ឋ​អូហៃយ៉ូ​ដោយ​​សំឡេងតិចតួច


លោក​មីត រ៉មនី (Mott Romney) ចាប់​ដៃ​ជាមួយ​អ្នក​គាំទ្រ​កាល​ពី​ថ្ងៃ​ពុធ​ទី​០៧​មីនា។

បេក្ខជន​ប្រធានាធិបតី​ មីត​ រ៉មនី (Mitt Romney) ​បាន​យក​ជ័យជម្នះ​តាម​សំឡេង​តិចតួច​ក្នុង​ការ​បោះឆ្នោត​បឋម​នៅ​ក្នុង​រដ្ឋ​អូហៃយ៉ូ (Ohio) ​ដែល​ជា​ជ័យជម្នះ​ដ៏​ធំ​ក្នុង​ចំណោម​រដ្ឋ​១០​នៃ​ការ​បោះឆ្នោត​កាល​ពី​ថ្ងៃ​អង្គារ។​

លទ្ធផល​នៃ​ការ​បោះឆ្នោត​ Super Tuesday ​រើស​បេក្ខជន​ប្រធានាធិបតី​ពី​គណបក្ស​សាធារណរដ្ឋ​ កាល​ពី​ថ្ងៃ​អង្គារ​ទី​០៦​ខែ​មីនា​ម្សិលមិញ​នេះ។
លទ្ធផល​នៃ​ការ​បោះឆ្នោត​ Super Tuesday ​រើស​បេក្ខជន​ប្រធានាធិបតី​ពី​គណបក្ស​សាធារណរដ្ឋ​ កាល​ពី​ថ្ងៃ​អង្គារ​ទី​០៦​ខែ​មីនា​ម្សិលមិញ​នេះ។

ដោយ​សន្លឹក​ឆ្នោត​រាប់​ជិត​អស់​នៅ​ព្រឹក​ថ្ងៃ​ពុធ​ លោក ​រ៉មនី ​ដឹកមុខ​គេ​ដោយ​សំឡេង​១២.០០០ ​គឺ​ត្រឹម​តែ​១%​ប៉ុណ្ណោះ​ លើស​អតីត​ព្រឹទ្ធសមាជិករីក សន់ថូរ៉ុម (Rick Santorum)។​ ជ័យជម្នះ​ក្នុង​រដ្ឋ​អូហៃយ៉ូ ​ជា​ជ័យជម្នះ​លើក​ទី​៤​ ក្រោយពី​បាន​យក​ជ័យជម្នះ​ក្នុង​រដ្ឋ​វើម៉នថ៍ (Vermont)​ រដ្ឋ​ វីជីនៀ (Virginia)​ និង​រដ្ឋ ម៉ាស្សាឈូស៊ែតថ៍ (Massachussetts)​ ដែល​លោក​ធ្លាប់​បម្រើ​ជា​អភិបាល​រដ្ឋ។​

ថ្លែង​នៅ​ក្នុង​ក្រុង​បូស្ដិន​ (Boston) រដ្ឋ​ម៉ាស្សាឈូស៊ែតថ៍​ លោក រ៉មនី​ ទស្សន៍ទាយ​ថា​ លោក​នឹង​បាន​ទទួល​ការ​តែងតាំង​ជា​បេក្ខជន​របស់​គណបក្ស​សាធារណរដ្ឋ​ជា​មិន​ខាន។ លោក​ថ្លែង​ថា​ «យប់​នេះ ​យើង​កំពុង​រាប់​សន្លឹក​ឆ្នោត។​ យើង​រាប់​ចំនួន​ប្រតិភូ​ដែលទៅ​បោះឆ្នោត។​ យើង​មាន​សង្ឃឹម។ ​ យើង​រាប់​ថ្ងៃ​រហូត​ដល់​ខែ​វិច្ឆិកា​ ហើយយើង​សង្ឃឹម​ច្រើន​ដែរ។​ យើង​នឹង​ទទួល​ជ័យជម្នះ​ យក​សេតវិមាន​ជា​មិន​ខាន»។

ព័ត៌មាន​អន្តរជាតិ​សំខាន់ៗ​ដទៃទៀត៖

លោក​ស្រី​ យីងឡាក់ ស៊ីណាវ៉ាត្រា ជួប​នឹង​លោក​ ហ៊ុន សែន នាយករដ្ឋមន្ត្រី​កម្ពុជា ក្នុង​ពេល​កន្លង​មក។
លោក​ស្រី​ យីងឡាក់ ស៊ីណាវ៉ាត្រា ជួប​នឹង​លោក​ ហ៊ុន សែន នាយករដ្ឋមន្ត្រី​កម្ពុជា ក្នុង​ពេល​កន្លង​មក។

ថៃ-ជប៉ុន៖ នៅ​ក្នុង​ទស្សនកិច្ច​ជា​ផ្លូវការ​កាល​ពី​ថ្ងៃ​អង្គារ​នៅ​ក្នុង​ប្រទេស​ជប៉ុននាយក​រដ្ឋមន្ដ្រី​ថៃ​ លោកស្រី​ យីងឡាក់​ ស៊ីណាវ៉ាត្រា​ បាន​ចាប់​ផ្ដើម​យុទ្ធនាការ​ដើម្បី​ធ្វើ​ឲ្យ​មាន​ការ​ទុកចិត្ដ​គ្នា​ទៅ​វិញ​ទៅ​មក​ជាមួយ​ក្រុម​អ្នក​វិនិយោគ​ជប៉ុន​ នៅ​ក្រោយ​ពី​មាន​ការ​បំផ្លិចបំផ្លាញ​ដោយ​ទឹក​ជំនន់​កាល​ពី​ឆ្នាំ​មុន។

ស៊ីរី៖ ប្រធាន​អង្គការ​មនុស្សធម៌​របស់​អ.ស.ប. ​នឹង​ធ្វើ​ដំណើរ​ទៅ​កាន់​ប្រទេស​ស៊ីរី​នៅ​ថ្ងៃ​ពុធ​នេះ ​ដើម្បី​ជួយ​ជំរុញ​ឲ្យ​មាន​ការ​អនុញ្ញាត​បើក​ផ្លូវ​ដល់​អង្គការ​ជួយ​សង្រ្គោះយក​ជំនួយ​ទៅ​ឲ្យ​ជន​រងគ្រោះ​ និង​ដឹក​អ្នក​របួស​ចេញ។

កូរ៉េ​ខាង​ជើង៖ ប្រេសិត​ពិសេស​ពីរ​នាក់​ពី​អាមេរិក​កំពុង​ស្ថិត​នៅ​ក្នុង​ទី​ក្រុង​ប៉េកាំង​ ដើម្បី​បើក​ការ​ចរចា​ជាមួយ​កូរ៉េ​ខាងជើង​មក​លើ​សេចក្ដី​ពិស្ដារ​នៃ​ផែនការ​មួយ​ដែល​នឹង​ផ្ដល់​ជំនួយ​អាហារ​ស.រ.អ.​ចំនួន​២៤០.០០០​តោន​ ទៅ​ឲ្យ​ប្រទេស​កុម្មុយនិស្ត​នោះ។

ឥណ្ឌា៖ មេដឹកនាំ​គណបក្ស​កាន់​អំណាច​នៅ​ក្នុង​ប្រទេស​ឥណ្ឌា​ និយាយ​ថា​ អ្នក​កាន់​សន្លឹក​ឆ្នោត​មិន​សប្បាយ​ចិត្ដ​ចំពោះ​បេក្ខជន​របស់​គណបក្ស ​ដែល​ជា​មូលហេតុ​មួយនៃ​ការ​ចាញ់​សន្លឹក​ឆ្នោត​ក្នុង​ការ​បោះឆ្នោត​នៅ​ក្នុង​រដ្ឋ​ឧត្តរប្រទេស (Uttar Pradesh) ដែល​មាន​ប្រជាជន​ច្រើន​ជាង​គេ​របស់​ឥណ្ឌា​កាល​ពី​ពេល​ថ្មីៗ​នេះ។

ចិន-អាមេរិក៖ នៅ​ថ្ងៃ​ពុធ​ រដ្ឋាភិបាល​ចិន​បាន​រិះគន់​សភា​ស.រ.អ.​ ដែល​បាន​អនុម័ត​ច្បាប់​មួយ​ដែល​អនុញាត​ឲ្យ​ស.រ.អ.​យក​ពន្ធដារ​មក​លើ​ទំនិញ​ទិញ​ចូល​ពី​ប្រទេស​ចិន​ និង​ពី​ប្រទេស​ដែល​មាន​សេដ្ឋកិច្ច​រដ្ឋ​កាន់កាប់។

អាមេរិក៖ ឯកសារ​កំណត់ហេតុ​មួយ​របស់​អតីត​ប្រធានាធិបតី​អាមេរិក រីឆាត នីកសុន (Richard Nixon)​ ដែល​ទើប​នឹង​ត្រូវ​ផ្សព្វផ្សាយ​បង្ហាញ​ឲ្យ​ឃើញថា ​លោក​មាន​ចិត្ដ​ព្រួយ​បារម្ភ​ថា ​ការ​កាប់​សម្លាប់​នៅ​លើ​ទី​លាន ធានអានមេន (Tiananmen)​ ប្រទេស​ចិន​កាល​ពី​ឆ្នាំ​១៩៨៩​ អាច​បំផ្លាញ​ទំនាក់ទំនង​គ្នា​រវាង​ចិន​និង​សហរដ្ឋ​អាមេរិក​ជា​អចិន្ត្រៃយ៍។

អ៊ីរ៉ង់៖ មេ​បញ្ជាការ​យោធា​កណ្ដាល​របស់​ស.រ.អ.​និយាយ​ថា​ ប្រទេស​អ៊ីរ៉ង់​ជា​ការ​គំរាមដ៏​ធំ​បំផុត​មក​លើ​សន្ដិសុខ​នៃ​តំបន់​មជ្ឈឹមបូព៌ា​ ហើយ​រដ្ឋាភិបាល​ទី​ក្រុង​តេហេរ៉ង់​ ខិតខំ​ខ្លាំង​ដើម្បី​រក្សា​អំណាច​ឲ្យ​ប្រធានាធិបតី​ Bashar Al Assad។

ទីបេតិ៍៖ មន្ដ្រី​ចិន​ព្យាយាម​បន្តុះបង្អាប់​ដល់​ជនជាតិ​ទីបេតិ៍​ដែល​បាន​ធ្វើ​អត្ដឃាត​ដោយ​ដុត​ខ្លួនឯង ​ក្នុង​ការ​តវ៉ា​ប្រឆាំង​នឹង​ការ​គ្រប់គ្រង​ចិន​នៅ​តំបន់​របស់​ពួក​គេ។

ភូមា៖ រដ្ឋមន្ដ្រី​ក្រសួង​ការបរទេស​នៃ​ប្រទេស​នូវែលសេឡង់​បាន​អំពាវនាវ​ដល់​ប្រទេសភូមា​ឲ្យ​បន្ដ​ការ​កែ​ទម្រង់​តាម​បែប​ប្រជាធិបតេយ្យនៅ​ពេល​លោក​បញ្ចប់​ទស្សនកិច្ច​ពីរ​ថ្ងៃ​ក្នុង​ប្រទេស​ភូមា។

កេនយ៉ា៖ អាចារ្យ​ពុទ្ធសាសនា​មក​ពី​ប្រទេស​ជប៉ុន ​បាន​រៀបចំ​ពិធី ​សូត្រធម៌​ផ្សះផ្សា​គ្នា​មួយ​ក្នុង​កិច្ច​ប្រឹងប្រែង​ដើម្បី​ជួយ​ក្រុម​អំបូរ​ផ្សេងៗ​នៃ​ប្រទេស​កេនយ៉ា​ឲ្យ​ឈប់​ច្បាំង​គ្នា។​

អាហ្វហ្គានីស្ថាន៖ ទាហាន​ជាតិ​អង់គ្លេស​៦​នាក់​បាន​ស្លាប់​ក្រោយ​ពី​រថយន្ដ​ពាស​ដែក​របស់​ខ្លួន​បាន​បើក​លើ​គ្រាប់​មីន​កប់​តាម​ផ្លូវ។

XS
SM
MD
LG