ស៊ីលី៖ ក្រុមអ្នកជួយសង្គ្រោះស៊ីលីចាប់ផ្តើមយកសាកសពពីការធ្លាក់យន្តហោះមួយគ្រឿងនៃកងទ័ពអាកាសស៊ីលីក្នុងមហាសមុទ្រប៉ាស៊ីហ្វិកដោយមានមនុស្ស២១នាក់ជិះក្នុងនោះ។
អ៊ីស្រាអែល៖ ជនជាតិអ៊ីស្រាអែលរាប់ពាន់នាក់ធ្វើបាតុកម្មធំៗនៅក្នុងក្រុង Tel Aviv និងក្រុងឯទៀតៗប្រឆាំងនឹងកំណើនតម្លៃជីវភាព។
ចិន៖ គ្រោះថ្នាក់មួយទៀតនៅអណ្តូងរ៉ែធ្យូងថ្មប្រទេសចិនបានបណ្តាលឱ្យកម្មករ១០នាក់ស្លាប់ក្នុងខេត្តស៊ីជួន នាប៉ែកនិរតី។
លីប៊ី៖ លោក Mustafa Abdel Jalil មេដឹកនាំក្រុមប្រឹក្សាជាតិអន្តរកាលលីប៊ីបានមានប្រសាសន៍ថា កងកម្លាំងរបស់លោកឋិតនៅក្នុង «គោលជំហរនៃកម្លាំង» ហើយអាចចូលទៅក្នុងក្រុងណាក៏បានដែរ។ តែទោះជាយ៉ាងណា ក៏លោកបាននិយាយថាពួកគេចង់បញ្ចៀសកុំឱ្យមានការបង្ហូរឈាម។
លីប៊ី៖ ពួកអ្នកស៊ើបអង្កេតខាងសិទ្ធិមនុស្សបានរកឃើញឯកសារសម្ងាត់ក្នុងប្រទេសលីប៊ីដែលហាក់ដូចជាបង្ហាញអំពីកិច្ចសហប្រតិបត្តិការដ៏ជិតស្និទ្ធរវាងទីភ្នាក់ងារស៊ើបការសម្ងាត់បស្ចិមប្រទេសនិងអតីតរបបគ្រប់គ្រងលីប៊ី ដោយទីភ្នាក់ងារស៊ើបការសម្ងាត់សហរដ្ឋអាមេរិកស៊ីអាយអេបានជួយរដ្ឋាភិបាល Gadhafi ក្នុងការចាប់ពង្រត់ពួកជនជាប់សង្ស័យថាជាពួកភេរវជនក្នុងប្រទេសក្រៅ។
ស៊ីរី៖ ពួកសកម្មជនបាននិយាយថា កងកម្លាំងសន្តិសុខរបស់រដ្ឋាភិបាលស៊ីរីបានសម្លាប់មនុស្សយ៉ាងតិចណាស់បីនាក់កាលពីថ្ងៃសៅរ៍ នៅក្នុងការឆ្មក់ឆែកឆេររកមន្ត្រីជាន់ខ្ពស់ម្នាក់ដែលនិយាយថា លោកបានលាលែងចេញពីតំណែងជាការតវ៉ានឹងការបង្ក្រាបរបស់រដ្ឋាភិបាល។
អាហ្វហ្គានីស្ថាន៖ កងកម្លាំងអូតង់និងកងកម្លាំងរដ្ឋាភិបាលអាហ្វហ្គានីស្ថានបានសម្លាប់អតីតអ្នកទោសម្នាក់នៃកន្លែងឃុំឃាំងរបស់សហរដ្ឋអាមេរិកនៅឆកសមុទ្រ Guantanamo ប្រទេសគុយបា ដែលបានក្លាយទៅជាអ្នកទាក់ទងសំខាន់ម្នាក់ជាមួយអង្គការអាល់កៃដា នៅក្រោយគាត់វិលត្រទ្បប់ទៅកាន់ប្រទេសអាហ្វហ្គានីស្ថានវិញ។
ស៊ូដង់៖ មានការអំពាវនាវទូទាំងពិភពលោកឱ្យបញ្ឈប់ជាបន្ទាន់ការប្រយុទ្ធគ្នាទាំងអស់នៅក្នុងរដ្ឋព្រំដែនសំខាន់មួយនៃប្រទេសស៊ូដង់ នៅពេលមានមនុស្សរាប់ពាន់នាក់បានរត់គេចខ្លួនចេញពីអំពើហិង្សា។
ប៉ាគីស្ថាន៖ ពួកតាលីបាន់ប៉ាគីស្ថានបាននិយាយថា ពួកគេបានឃុំឃាំងយុវជនប្រមាណ៣០នាក់ដែលបានត្រូវចាប់ពង្រត់កាលពី៣-៤ថ្ងៃមុននេះ ក្រោយពីបានច្រទ្បំឆ្លងកាត់ព្រំដែនចូលទៅក្នុងប្រទេសអាហ្វហ្គានីស្ថាន។
