ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

ជីវិត​ស្នេហា​ដ៏​ជូរចត់​របស់​លោក ហុំាង ង៉ោ​ លាត​ត្រដាង​ក្នុង​បទ​ចម្រៀង​«‍ដូច​ផ្កា​កុលាប»


ខ្សែ​ភាពយន្ត​ The Killing Fields of Dr. Haing S. Ngor ឬ​បកប្រែ​ជា​ភាសា​ខ្មែរ​ថា «‍វាល​ពិឃាត​របស់​លោក ហុំាង ង៉ោ» ត្រូវបាន​ផលិត​ដោយ​លោក Arthur Dong ហើយ​ត្រូវបាន​ចាក់​ផ្សាយ​ជា​សាធារណៈ​តាំង​ពី​ឆ្នាំ​២០១៥។
ខ្សែ​ភាពយន្ត​ The Killing Fields of Dr. Haing S. Ngor ឬ​បកប្រែ​ជា​ភាសា​ខ្មែរ​ថា «‍វាល​ពិឃាត​របស់​លោក ហុំាង ង៉ោ» ត្រូវបាន​ផលិត​ដោយ​លោក Arthur Dong ហើយ​ត្រូវបាន​ចាក់​ផ្សាយ​ជា​សាធារណៈ​តាំង​ពី​ឆ្នាំ​២០១៥។

នៅ​ក្នុង​បទ​សម្ភាសន៍​ជាមួយ VOA អ្នកនាង ហ៊ុយ បូច័ន្ទ បាន​ឲ្យ​ដឹង​ថា បទ​ចម្រៀង «‍ដូច​ផ្កា​កុលាប» នេះ​ត្រូវបាន​និពន្ធ​សម្រាប់​វ៉ុល​ចម្រៀង​ទី១​របស់​អ្នកនាង ដែល​ចេញ​ផ្សាយ​កាលពី​ឆ្នាំ​២០១៤។

នៅ​ក្នុង​ខ្សែភាពយន្ត​ឯកសារ The Killing Fields of Dr. Haing S. Ngor បទ​ចម្រៀង​មួយ​ដែល​មាន​ចំណង​ជើង​ថា​«‍ដូច​ផ្កា​កុលាប» ត្រូវ​បាន​និពន្ធ និង​ច្រៀង​ដោយ​អ្នក​ចម្រៀង​អាមេរិកាំង​ដើម​កំណើត​ខ្មែរ ហ៊ុយ បូច័ន្ទ និង​លោក Arlen Hart។ បទ​ចម្រៀង​នេះ​បាន​ផ្សារភ្ជាប់​ទៅ​នឹង​ជីវិត​សេ្នហា​រវាង​លោក ហុំាង ង៉ោ និង​ភរិយា​របស់​លោក​ ដែល​បាន​ស្លាប់​នៅ​ក្នុង​របប​ខ្មែរ​ក្រហម។

នៅ​ក្នុង​បទ​សម្ភាសន៍​ជាមួយ VOA អ្នកនាង ហ៊ុយ បូច័ន្ទ បាន​ឲ្យ​ដឹង​ថា បទ​ចម្រៀង «‍ដូច​ផ្កា​កុលាប» នេះ​ត្រូវបាន​និពន្ធ​សម្រាប់​វ៉ុល​ចម្រៀង​ទី១​របស់​អ្នកនាង ដែល​ចេញ​ផ្សាយ​កាលពី​ឆ្នាំ​២០១៤។ ក៏​ប៉ុន្តែ ក្រោយ​ពី​បាន​ទស្សនា​ខ្សែភាពយន្ត​ស្តី​ពី​ជីវិត​របស់​លោក ហុំាង ង៉ោ ហើយ​និង​បាន​និយាយ​ជាមួយ​អ្នក​និពន្ធ​ខ្សែភាពយន្ត​នោះ​រួច​មក បទ​ចម្រៀង​របស់​អ្នក​នាង​ត្រូវបាន​ជ្រើស​យក​ទៅ​បញ្ចូល​នៅ​ក្នុង​ខ្សែភាព​យន្ត​នោះ។

អ្នកនាង ហ៊ុយ បូច័ន្ទ បាន​និយាយ​ថា បទ​ចម្រៀង​នេះ​និយាយ​អំពី​ការ​តស៊ូ​ឡើង​វិញ​របស់​មនុស្ស។

«‍នេះ​គឺ​ប្រៀប​បាន​នឹង​រឿងរ៉ាវ​ ដែល​លោក ហុំាង ង៉ោ បាន​ឆ្លង​កាត់។ លោក​បាន​តំណាង​ឲ្យ​ការ​តស៊ូ​ឡើង​វិញ​នេះ។ ហើយ​លោក​មាន​ប្រវត្តិ​សេ្នហា​ដ៏​អស្ចារ្យ​មួយ​ជាមួយ​នឹង​ភរិយា​របស់​លោក​ ហើយ​ក៏ជា​គ្រូពេទ្យ​ដ៏​ល្អ​ម្នាក់»។

ខ្សែ​ភាពយន្ត​ The Killing Fields of Dr. Haing S. Ngor ឬ​បកប្រែ​ជា​ភាសា​ខ្មែរ​ថា «‍វាល​ពិឃាតវេជ្ជបណ្ឌិត ហុំាង ង៉ោ» ត្រូវបាន​ផលិត​ដោយ​លោក Arthur Dong ហើយ​ត្រូវបាន​ចាក់​ផ្សាយ​ជា​សាធារណៈ​តាំង​ពី​ឆ្នាំ​២០១៥ ដែល​មាន​រូបលោក ហុំាង ង៉ោ សំដែងនៅ​ក្នុង​ខ្សែភាពយន្ត​នោះ​ផង​ដែរ មុន​ពេល​ដែល​លោក​ត្រូវបាន​ខ្មាន់​កាំភ្លើង​បាញ់​សម្លាប់​កាលពី​ឆ្នាំ​១៩៩៦។

លោក ហុំាង ង៉ោ គឺជា​ពលរដ្ឋ​អាមេរិកាំង​ដើម​កំណើត​ខ្មែរ​ដំបូង​គេ​បង្អស់ ដែល​បាន​ទទួល​ពាន​រង្វាន់ Oscar សម្រាប់​តួនាទី​ជា​តួសំដែងរង​កាលពី​ឆ្នាំ​១៩៨៥ ដែល​លោក​បាន​សំដែង​នៅ​ក្នុង​ខ្សែភាពយន្ត​ឯកសារ​ដ៏​ល្បីល្បាញមួយ​ដែល​មាន​ចំណង​ជើង​ថា «‍វាល​ពិឃាត» ឬ The Killing Fields។

អ្នក​នាង ហ៊ុយ បូច័ន្ទ បាន​បកស្រាយ​អត្ថន័យ​នៃ​បទ​ចម្រៀង​«‍ដូច​ផ្កា​កុលាប» ទៅ​នឹង​ខ្សែ​ជីវិត​របស់​លោក ហុំាង ង៉ោ ថា៖

«‍​នៅ​ពេល​ដែល​ខ្ញុំ​ច្រៀង​ឃ្លា​មួយ​ថា ស្ងប់ស្ងាត់​ដូច​ទឹក​សមុទ្រ​ តើ​អ្នក​ដឹង​ទេ ហើយ​ក្លិន​ផ្អែម​ដូច​ផ្កា​កុលាប វា​សំដៅ​ទៅ​លើ​អារម្មណ៍​ដែល​មាន​នៅ​ក្នុង​ចិត្ត​របស់​យើង ដែល​ធ្វើ​ឲ្យ​យើង​ស្ងប់ ក្រោយ​ពេល​ឆ្លង​ផុត​រឿង​សោកសៅ ដូច​ដែល​លោក ហុំាង ង៉ោ បាន​ឆ្លងកាត់​ក្នុង​អំឡុង​របប​ខ្មែរ​ក្រហម»។

អ្នក​និពន្ធ​បទ​ចម្រៀង​អាមេរិកាំង​ដើម​កំណើត​ខ្មែរ​រូប​នេះ​មាន​កិត្តិយស ដែល​បទ​ចម្រៀង​របស់​អ្នកនាង​ត្រូវបាន​បញ្ចូល​ក្នុង​ខ្សែ​ភាពយន្ត​ស្តី​ពី​ខ្សែ​ជីវិត​របស់​លោក ហុំាង ង៉ោ។

«‍​ខ្សែ​ភាពយន្ត​នេះ​រៀបរាប់​ពី​ប្រវត្តិសាស្ត្រ​ដ៏​សំខាន់​មួយ ហើយ​បាន​ផ្តល់​មេរៀន​ជីវិត​ដ៏​មាន​ប្រយោជន៍​ដែល​ផ្តោត​លើ​ក្តី​សង្ឃឹម និង​វប្បធម៌។ ហើយ​សំខាន់​ជាង​នេះ ខ្សែ​ភាព​យន្ត​នេះ​និយាយ​អំពី​បុរស​ម្នាក់ ដែល​បាន​បេ្តជ្ញាចិត្ត​តំណាង​ឲ្យ​ខ្មែរ និង​ជា​ពិសេស​គឺ​តំណាង​ឲ្យ​សិទ្ធិ​មនុស្ស​ជុំវិញ​ពិភព​លោក»។

បទ​ចម្រៀង​របស់​អ្នក​នាង ហ៊ុយ បូច័ន្ទ ដែល​មាន​ចំណង​ជើង​ថា «‍ដូចផ្កាកុលាប» ​ត្រូវបាន​ជ្រើស​យក​ទៅ​បញ្ចូល​នៅ​ក្នុង​ខ្សែភាព​យន្ត​ស្តី​ពី​ជីវិតរបស់លោក ហាំង ង៉ោ។
បទ​ចម្រៀង​របស់​អ្នក​នាង ហ៊ុយ បូច័ន្ទ ដែល​មាន​ចំណង​ជើង​ថា «‍ដូចផ្កាកុលាប» ​ត្រូវបាន​ជ្រើស​យក​ទៅ​បញ្ចូល​នៅ​ក្នុង​ខ្សែភាព​យន្ត​ស្តី​ពី​ជីវិតរបស់លោក ហាំង ង៉ោ។

អ្នក​នាង ហ៊ុយ បូច័ន្ទ បាន​ចាប់​ផ្តើម​ច្រៀង​តាំង​ពី​ខ្លួន​នៅ​ក្មេង ហើយ​ទេព​កោសល្យ​របស់​អ្នកនាង​កាន់តែ​ប្រសើរ​ឡើង​ នៅ​ពេល​ដែល​អ្នក​នាង​ចូល​ច្រៀង​ឲ្យ​ក្រុម​តន្ត្រី​រ៉ុក​ខ្មែរ​របស់​ឪពុក​អ្នក​នាង។ ក៏​ប៉ុន្តែ ក្រោយ​ពេល​ដែល​ឪពុក​របស់​អ្នក​នាង​បាន​ស្លាប់​កាលពី​ឆ្នាំ​២០០៦ អ្នក​នាង​ ហ៊ុយ បូច័ន្ទ បាន​ព្យាយាម​តស៊ូ​ឡើង​វិញ ហើយ​ពង្រឹង​ទេពកោសល្យ​របស់​អ្នកនាង រហូត​ឈាន​ដល់​និពន្ធ​បទ​ចម្រៀង​ដោយ​ខ្លួន​ឯង។

ក្នុង​នាម​ជា​ពលរដ្ឋ​អាមេរិកាំង​ដើម​កំណើត​ខ្មែរ អ្នក​ស្រី ហ៊ុយ បូច័ន្ទ ចាត់ទុក​បទ​ចម្រៀង​របស់​អ្នក​នាង​ថា បង្ហាញ​ពី​«‍បទ​ពិសោធន៍​របស់​ពលរដ្ឋ​អាមេរិកាំង​ដែល​មាន​ដើម​កំណើត​ពី​ពូជសាសន៍​ផ្សេងៗ» ជា​ពិសេស​ខ្មែរ​អាមេរិកាំង ដែល​ពួក​គេ​ភាគច្រើន​ព្យាយាម​ស្វែងយល់​ពី​អត្ត​សញ្ញាណ​ពិត​ប្រាកដ​របស់​ខ្លួន។

«‍បទ​ចម្រៀង​របស់​ខ្ញុំ​ភាគច្រើន​ត្រូវបាន​និពន្ធ​ឡើង ដោយសារ​រឿងរ៉ាវ​តស៊ូ​ជាច្រើន​របស់​បងប្អូន​ពលរដ្ឋ​ខ្មែរ​អាមេរិកាំង​យើង​ និង​ដំណើរ​ជីវិត​របស់​ពួក​យើង​រហូត​មក​ដល់​ពេល​នេះ។ ហើយ​បទ​ចម្រៀង​របស់​ខ្ញុំ​ក៏​ព្យាយាម​លើក​ទឹក​ចិត្ត​ដល់​យុវជន​ឲ្យ​ស្វែង​រក​សំឡេង​របស់​ខ្លួន»។

សម្រាប់​អ្នកនាង ហ៊ុយ បូច័ន្ទ ការ​និពន្ធ​បទ​ចម្រៀង​គឺជា​មធ្យោបាយ​មួយ ដែល​អាច​ផ្សារភ្ជាប់​រូប​នាង​ទៅ​កាន់​ពលរដ្ឋ​ខ្មែរ​អាមេរិកាំង ដែល​អ្នក​នាង​យល់​ថា នៅតែ​ស្វែង​យល់​ពី​អត្ត​សញ្ញាណ​របស់​ខ្លួន​ជា​ខ្មែរ​អាមេរិកាំង៕

XS
SM
MD
LG