មេដឹកនាំកំពូលអ៊ីរ៉ង់លោក Ayatollah Ali Khamenei បាននិយាយនៅថ្ងៃចន្ទនេះថា ការគ្រប់គ្រងរបស់រដ្ឋាភិបាលអ៊ីរ៉ង់មិនបានល្អបានធ្វើឲ្យប៉ះពាល់ដល់សេដ្ឋកិច្ចអ៊ីរ៉ង់ច្រើនជាងការដាក់ទណ្ឌកម្មរបស់សហរដ្ឋអាមេរិកទៅទៀត។
កាលពីសប្ដាហ៍មុន ប្រធានាធិបតីអាមេរិកលោក Donald Trump បានដាក់ឡើងវិញនូវបណ្ដុំទណ្ឌកម្មលើប្រទេសអ៊ីរ៉ង់ ដែលទណ្ឌកម្មទាំងនោះត្រូវបានដកចេញកន្លងមកដោយសារតែកិច្ចព្រមព្រៀងនុយក្លេអ៊ែរអ៊ីរ៉ង់ឆ្នាំ ២០១៥ ដែលកិច្ចព្រមព្រៀងនោះដាក់កំហិតដល់កម្មវិធីនុយក្លេអ៊ែររបស់អ៊ីរ៉ង់ដើម្បីជាថ្នូរនឹងការដកទណ្ឌកម្មរបស់សហរដ្ឋអាមេរិកចេញ។
ទណ្ឌកម្មទាំងនោះសំដៅលើវិស័យរថយន្តរបស់ប្រទេសអ៊ីរ៉ង់ ការធ្វើពាណិជ្ជកម្មរបស់អ៊ីរ៉ង់លើមាស និងលោហធាតុមានតម្លៃផ្សេងទៀត ក៏ដូចជារូបិយវត្ថុរៀលរបស់អ៊ីរ៉ង់ និងការចរាចរហិរញ្ញវត្ថុផ្សេងទៀតផងដែរ។
លោក Trump បានគំរាមដាក់ទណ្ឌកម្មជុំថ្មីមួយទៀតកាលពីថ្ងៃទី ៥ ខែវិច្ឆិកា ឆ្នាំមុនប្រឆាំងនឹងការចរាចរហិរញ្ញវត្ថុ និងការធ្វើអាជីវកម្មនានាពាក់ព័ន្ធនឹងវិស័យថាមពលរបស់ប្រទេសអ៊ីរ៉ង់ ដែលស្ថាប័នហិរញ្ញវត្ថុបរទេសនានាធ្វើប្រតិបត្តិការជាមួយនឹងធនាគារកណ្ដាលនៃប្រទេសអ៊ីរ៉ង់។
លោក Khamenei បាននិយាយនៅថ្ងៃចន្ទនេះថា ប្រសិនបើរដ្ឋាភិបាលអ៊ីរ៉ង់គ្រប់គ្រងប្រទេសបានល្អ នោះអ៊ីរ៉ង់អាចជម្នះយកឈ្នះលើទណ្ឌកម្មរបស់សហរដ្ឋអាមេរិកបាន។
លោក Trump ជារឿយៗ បានរិះគន់លើកិច្ចព្រមព្រៀងនុយក្លេអ៊ែរអ៊ីរ៉ង់ និងដាក់ទណ្ឌកម្មឡើងវិញបន្ទាប់ពីបានដកសហរដ្ឋអាមេរិកចេញពីកិច្ចព្រមព្រៀងនុយក្លេអ៊ែរអ៊ីរ៉ង់នោះ៕
