ភ្ជាប់​ទៅ​គេហទំព័រ​ទាក់ទង

កេនយ៉ា​តម្រង់​ទិសដៅ​លើ​មន្រ្តី​ធំៗ​ក្នុង​ការ​ប្រឆាំង​អំពើ​ពុករលួយ

  • Michael Onyiego

នាយករដ្ឋមន្ត្រី​កេនយ៉ា លោក រ៉េឡា អូឌិនហ្គា Raila Odinga។

សង្គ្រាមប្រឆាំង​អំពើ​ពុក​រលួយ (The War on Graft) ​បានធ្វើ​ឲ្យញ័ររញ្ជួយ​យ៉ាង​ខ្លាំង​ឆ្លង​កាត់​រដ្ឋ​សភារបស់​ប្រទេស​កេនយ៉ា ​ក្នុង​ប៉ុន្មាន​ខែ​ថ្មីៗ​នេះ ​ដោយមាន​រដ្ឋមន្ត្រីមួយ​ចំនួន​ ត្រូវបាន​កំណត់​មុខសញ្ញា​នៅ​ក្នុងការ​ស៊ើប​អង្កេត​យ៉ាង​លេចធ្លោ។ ប៉ុន្តែ ​អង្គភាពប្រឆាំង​អំពើ​ពុករលួយរបស់​កេនយ៉ា ​បាន​ថ្លែង​ថា ​មាន​ការ​ស៊ើប​អង្កេត​ច្រើន​ថែម​ទៀត ​កំពុងដំណើការ។

ក្នុង​ឆ្នាំ​២០១០ ​រដ្ឋាភិបាល​ឯកភាព​ជាតិ ​បាន​សន្យា​ថា​នឹង​មាន​កិច្ចប្រឹងប្រែងយ៉ាង​ខ្លាំងក្លា​ដើម្បី​ធ្វើ​កំណែ​ទម្រង់ក្រុម​មន្រ្តី​សាធារណៈ​នៅ​ក្នុង​ប្រទេស​នេះ ​ដែលអង្គការតម្លាភាព​អន្តរជាតិមាន​មូល​ដ្ឋាន​នៅ​ទីក្រុង​ប៊ែកឡាំង​បាន​ចាត់ថ្នាក់​ថា​ជា​ប្រទេស​មួយ​ក្នុង​ចំណោមប្រទេសពុក​រលួយ​បំផុតរបស់​ពិភព​លោក។

រដ្ឋាភិបាល​ចម្រុះ ​គួរ​តែ​អាច​ទទួល​បាន​លើស​ពី​អ្វី​ដែល​ខ្លួន​បាន​ដាក់​គោលដៅ​កំណត់ ​ដោយ​សារ​តែ​អ្នក​នយោបាយ​ឆ្នើមៗ​មួយ​ចំនួន​របស់​កេនយ៉ា ​បាន​ដឹង​ថា​ពួកគេ​ស្ថិត​នៅ​ក្រោម​ការស៊ើបអង្កេត​ដោយ​គណៈកម្មការ​ប្រឆាំង​អំពើ​ពុករលួយ​ (Anti-Corruption Commission) របស់​កេនយ៉ា។

នៅ​រដូវ​ស្លឹកឈើ​ជ្រុះ​កាលពី​ឆ្នាំ​មុន ករណី​ដូចជា ​រដ្ឋមន្ត្រី​ការបរទេស ​លោក​ម៉ូសេស ​វីតាងហ្គូឡា (Moses Wetang'ula) និងលោក​វីលៀម រ៉ូតូ (William Ruto) ដែល​នឹង​ក្លាយជា​បេក្ខជនប្រធានាធិបតី​នាំមុខ​គេ​ម្នាក់​ក្នុង​ឆ្នាំ២០១២ត្រូវ​បាន​បង្ខំ​ឲ្យ​លាលែងពី​មុខ​តំណែង​ក្នុង​គណៈ​រដ្ឋ​មន្ត្រី​ដើម្បី​បើក​ផ្លូវ​ឲ្យ​មាន​ការ​ស៊ើប​អង្កេត​ ទៅ​លើ​ករណី​លួច​បន្លំ។

គណៈ​កម្មការប្រឆាំង​អំពើ​ពុក​រលួយ​ បាន​បោះ​ជំហាន​ចូល​ឆ្នាំ​ថ្មី ​ដោយ​មាន​រឿង​ក្តី​មួយទៀត​ប្រឆាំង​នឹង​អតីត​រដ្ឋ​មន្ត្រី​ឧស្សាហកម្ម ​លោក​ហេនរី ហ្កូសហ្គេ ​(Henry Kosgey)​ ពី​បទ​មាន​តួនាទីនៅ​ក្នុង​ការ​នាំ​ចូល​រថយន្ត​ដោយ​ខុស​ច្បាប់​ចូល​ទៅ​ក្នុង​ប្រទេស។ លោក​ ហ្គូសហ្កេ ជា​ប្រធាន​ចលនា​ពណ៌​ទឹក​ក្រូច​គាំទ្រ​លទ្ធិ​ប្រជាធិបតេយ្យ​ (Orange Democratic Movement) ដែល​ជា​គណបក្សរបស់​លោក​នាយក​រដ្ឋមន្ត្រី ​រ៉េឡា អូឌិនហ្គា (Raila Odinga)។

ប៉ុន្តែ ​ប្រធាន​គណៈ​កម្មការប្រឆាំង​អំពើ​ពុក​រលួយ ​លោក​ភីអិលអូ លូម៉ុមបា (P.L..O Lumumba) មាន​ប្រសាសន៍​ថា ការប្រយុទ្ធ​ប្រឆាំង​នឹង​អំពើ​ពុករលួយ ​មិន​ទាន់​បញ្ចប់​នៅឡើយ​ទេ។ លោក​លូម៉ុមបា បាន​ប្រកាស​កាលពី​ថ្ងៃ​អង្គារ៍​មុន​ថា ​រឿងក្តី​សំខាន់ៗ​មួយ​ចំនួន​នឹង​បញ្ជូន​ទៅ​ដល់​ការិយាល័យ​របស់​អគ្គមេធាវី​របស់​រដ្ឋាភិបាល​ក្នុង​ពេល​ឆាប់ៗ​នេះ។

«យើង​រំពឹង​ថា ​សំ​ណុំ​រឿងក្តី​ដ៏​មាន​ឥទ្ធិពល​ចំនួន​៥​ទៅ​៨ ​នឹង​ទៅ​ដល់​លោក​អគ្គមេធាវី ​ប្រសិនបើ​មិន​មាន​កត្តា​អ្វី​កើតឡើង​ទេ»។

ការ​ចោទ​ប្រកាន់ ​បាន​ជាប់ពាក់ព័ន្ធនឹង​រដ្ឋមន្ត្រី​មិន​បញ្ចេញ​ឈ្មោះម្នាក់​ទៀត​និង​ការប្រើប្រាស់​មូលនិធិ​អភិវឌ្ឍ​ន៍មិន​ត្រឹម​ត្រូវ ​ដែល​ចេញ​ដោយរដ្ឋាភិបាល​កណ្តាល។ នៅ​ក្នុងការប្រកាស​នោះ ​លោក​លូម៉ុមបា ​បាន​ហៅ​ការចោទ​ប្រកាន់​នេះថា«​មានសារៈ​សំខាន់​យ៉ាង​ខ្លាំង»​ ហើយ​សន្យា​បញ្ជូន​សំណុំ​រឿង​ក្តី​ទាំងនេះ ​ទៅ​អាជ្ញាធរ​ដ៏​សមស្រប​ក្នុង​ប៉ុន្មាន​សប្តាហ៍ខាងមុខ។

លោក​លូម៉ុមបា ​បាន​ដំណើការលឿន​ជាងអ្នក​កាន់​តំណែង​មុន​របស់​លោក​ក្នុង​ការដោះស្រាយ​អំពើ​ពុករលួយយ៉ាង​រាលដាល​នៅ​កេន​យ៉ា ​ប៉ុន្តែ​ការ​កាន់តំណែងរបស់​លោកមិន​មែន​គ្មាន​ការរិះគន់​នោះ​ឡើយ ជាពិសេសក្នុង​រយៈពេល​ប៉ុន្មាន​សប្តាហ៍​ថ្មីៗ​នេះ។

រាល់​មុខ​សញ្ញា​លេច​ធ្លោរបស់​លោក​លូម៉ុមបា​ទាំងអស់ ​ចេញ​មក​ពី​ជួរគណបក្ស​ប្រឆាំង ​ហើយ​ក្រុម​សមាជិក​ចលនា​ពណ៌ទឹកក្រូច​គាំ​ទ្រ​លទ្ធិ​ប្រជាធិបតេយ្យកំពុង​អះអាង​អំពី​ភាពមិនយុត្តិធម៌​នេះ។

កាល​ពី​សប្តាហ៍​មុន ​សមាជិក​របស់​ចលនា​ពណ៌ទឹកក្រូច​គាំទ្រ​លទ្ធិ​ប្រជា​ធិបតេយ្យ លោក រ៉ាឆេល​ ស្សេប៊េស (Rachael Shebesh) បាន​ចោទ​ប្រកាន់​អង្គភាព​ប្រឆាំង​អំពើ​ពុករលួយ​ពី​បទ​មើល​រំលង​មន្រ្តី​ធំៗ​ជាង​នេះ​ដោយ​ហ៊ាន​តែ​ជាមួយគណ​បក្ស​ប្រឆាំង។

«តើ​នៅ​ពេលណា​បញ្ហា​ធំៗ​ នឹង​ត្រូវ​បាន​ដោះស្រាយ? តើ​នៅ​ពេលណាប្រជា​ពលរដ្ឋ​កេន​យ៉ានឹង​អាច​មើលឃើញ​បញ្ហា​ក្រុម​អង់ក្លូលីស៊ីង (Anglo-Leasing) ​ត្រូវ​បាន​ដោះស្រាយ? តើ​នៅ​ពេលណា​យើង​នឹង​អាច​មើល​ឃើញ​បញ្ហា​របស់​ហ្គោល​ដិន​ប៊ើក​ត្រូវ​បញ្ចប់? តើ​នៅ​ពេល​ណា​យើង​នឹង​មើល​ឃើញ​បញ្ហា​ទ្រីតុន ​ត្រូវបាន​ដោះស្រាយ​ឲ្យបាន​ចំ​គោល​ដៅតែ​ម្តង?»

ការ​អះអាង​បែប​នេះ​បាន​បង្ក​ឲ្យមាន​ការរិះគន់​ពី​សំណាក់​គណ​បក្ស​ឯកភាព​ជាតិ​ដែល​កំពុងកាន់​អំណាច។ លោក​លូម៉ុមបា ​បាន​ច្រាន​ចោលការ​ចោទ​ប្រកាន់​ពី​បទ​មាន​ចេតនា​នយោបាយ​ដោយ​បាន​ទទូច​ថា​រឿង​ក្តី​នឹង​ត្រូវ​បាន​ស៊ើប​អង្កេត​ដោយ​គណៈកម្មាការប្រឆាំង​អំពើ​ពុក​រលួយ​របស់​កេនយ៉ា​នៅ​ពេល​ដែល​រឿងក្តី​ទាំងនោះត្រូវ​បាន​រាយការណ៍ឲ្យ​ដឹង៕

ប្រែ​សម្រួល​ដោយ លី សុខឃាង

XS
SM
MD
LG