មានរឿងរ៉ាវជាច្រើនពាក់ព័ន្ធនឹងការបោះឆ្នោតនៅក្នុងប្រទេស កេនយ៉ា ដោយសារតែលោកប្រធានាធិបតី Uhuru Kenyatta ដែលកំពុងតែកាន់តំណែង បានបើកទ្វារសភា ដោយមានតែសមាជិកខាងគណបក្សកាន់អំណាចប៉ុណ្ណោះចូលរួម។
លោក Kenyatta បានមានប្រសាសន៍ថា «ខ្ញុំសូមបញ្ជាក់ឲ្យច្បាស់ថា រដ្ឋាភិបាលនឹងមិនលើកលែងដល់នរណាម្នាក់ដែលមានបំណងបង្អាក់ដល់សន្តិភាពនិងស្ថិរភាពដែលទទួលបានដោយលំបាករបស់យើងបានទេ។ ក្នុងលក្ខខណ្ឌណាក៏ដោយ ប្រជាពលរដ្ឋកេនយ៉ា មិនត្រូវអនុញ្ញាតឲ្យដំណើរការសេរី និងមានលក្ខណៈប្រកួតប្រជែងរបស់យើង ក្លាយជាការគំរាមកំហែងមួយដល់សន្តិភាពនិងសន្តិសុខប្រទេសជាតិយើងឡើយ»។
តំណាងរាស្ត្រខាងគណបក្សប្រឆាំងបានធ្វើពហិការមិនចូលរួមក្នុងដំណើរការនេះនោះទេ ដោយចោទជាសំណួរទៅលើអភ័យឯកសិទ្ធិរបស់លោក Kenyatta ក្រោយពីសាលក្រមតុលាការកំពូលបានធ្វើមោឃភាពទៅលើលទ្ធផលនៃការបោះឆ្នោតប្រធានាធិបតីកាលពីថ្ងៃទី៨ ខែសីហា កន្លងទៅនេះ។
តុលាការកំពូលនេះបានឲ្យដឹងថា ការបោះឆ្នោតដែលលោក Kenyatta ទទួលបានជ័យជម្នះនេះ មិនអាចទទួលយកបានទេ ដោយសារតែមាន«ភាពមិនប្រក្រតីនិងផ្ទុយពីច្បាប់»មួយចំនួន នៅក្នុងការរាប់សន្លឹកឆ្នោត។
ក្រោយពីតុលាការកំពូលបានចេញសាលក្រមនេះ លោក Kenyatta បានហៅភាពយុត្តិធម៌របស់តុលាការថាទុច្ចរិត។ ប៉ុន្តែកាលពីថ្ងៃអង្គារម្សិលមិញនេះ លោកប្រធានាធិបតីហាក់បន្ទន់សម្តីរបស់ខ្លួន ដោយលោកបានអំពាវនាវឲ្យកងកម្លាំងរបស់រដ្ឋាភិបាលទាំងបី គោរពទៅតាមឆន្ទៈរបស់ប្រជាពលរដ្ឋ៕
