មេដឹកនាំគណបក្សប្រឆាំង លោក កឹម សុខា និងក្រុមមេធាវីរបស់លោកបញ្ជាក់ថា ពួកគេនឹងចូលរួមសវនាការនៅសប្តាហ៍នេះ គឺចាប់ពីថ្ងៃពុធស្អែក។ សាលាដំបូងរាជធានីភ្នំពេញ បានផ្អាកការជំនុំជម្រះមួយសប្តាហ៍ ក្រោយពីក្រុមមេធាវីលោក កឹម សុខា ដើរចេញពីបន្ទប់សវនាការ។
សវនាការជំនុំជម្រះសំណុំរឿងរបស់លោក កឹម សុខា ពីបទ «សន្និដ្ឋិភាពជាមួយបរទេស» ឬបទក្បត់ជាតិ ឈានចូលដល់សប្តាហ៍ទី៧ បន្ទាប់ពីតុលាការបានចាប់ផ្តើមកាលពី១៥ ខែមករា ឆ្នាំ២០២០ និងប្រកាសថាអាចប្រើពេលរហូតដល់ទៅ៣ខែ។
ឆ្លើយនឹងសំណួររបស់ VOA នៅគេហដ្ឋានរបស់លោកក្នុងខណ្ឌទួលគោក ក្រោយជំនួបជាមួយមន្រ្តីជាន់ខ្ពស់នៃប្រទេសន័រវេស្សរ៍ នៅថ្ងៃអង្គារនេះ លោក កឹម សុខា ដែលជាមេដឹកនាំគណបក្សប្រឆាំង បានបញ្ជាក់យ៉ាងខ្លីថា លោកនឹងទៅចូលរួមសវនាការនៅថ្ងៃពុធជាធម្មតា។
ចំណែកមេធាវីមួយរូបដែលការពារក្តីឲ្យលោក កឹម សុខា គឺអ្នកស្រី ម៉េង សុភារី ប្រាប់ VOA ថា ក្រុមមេធាវីបានត្រៀមខ្លួនរួចជាស្រេចក្នុងការចូលរួមសវនាការ។ អ្នកស្រីរំពឹងថា សវនាការលើសំណុំរឿងលោក កឹម សុខា នឹងអាចដំណើរការទៅដោយរលូនចាប់ពីសប្តាហ៍នេះ។ កាលពីពីរសប្តាហ៍មុនមានភាពចម្រូងចម្រាសកើតឡើងរហូតធ្វើឲ្យក្រុមមេធាវីដើរចេញពីសវនាការ។
អ្នកស្រី ម៉េង សុភារី ថ្លែងថា៖ «យើងមិនមែនជាអ្នកដឹកនាំអង្គសវនាការទេ យើងជាអ្នកចូលរួមនីតិវិធីសវនាការ។ អញ្ចឹងវាអាស្រ័យលើស្ថានភាពជាក់ស្តែង ក៏ប៉ុន្តែយើងគ្រាន់តែយើងសង្ឃឹមថាអ្វីៗនឹងល្អប្រសើរឡើងវិញ»។
ការសម្រេចផ្អាកសវនាការកាលពីថ្ងៃទី១៣ ខែកុម្ភៈ ពោលគឺកាលពីពីរសប្តាហ៍មុន ក្រោយក្រុមមេធាវីការពារក្តីឲ្យលោក កឹម សុខា បានដើរចេញពីបន្ទប់តុលាការ ដោយមូលហេតុថា ពួកគេមិនត្រូវបានអនុញ្ញាតឲ្យលើកពីការមិនសុខចិត្តរបស់ពួកគេនៅក្នុងតុលាការ។
VOAមិនអាចទាក់ទងសុំការអត្ថាធិប្បាយពីលោក តាំង ស៊ុនឡាយ ប្រធានសាលាដំបូងរាជធានីភ្នំពេញ និងអ្នកនាំពាក្យ លោក អ៊ី រិន្ទ បានទេ។
សវនាការលើករណីលោក កឹម សុខា ជារៀងរាល់សប្តាហ៍តែងមានការចូលរួមឃ្លាំមើលពីមន្រ្តីស្ថានទូតនៃបណ្តាប្រទេសធំៗជាច្រើននិងអង្គការសង្គមស៊ីវិលមួយចំនួន។ សវនាការក្នុងមួយសប្តាហ៍ ធ្វើឡើងរយៈពេល២ថ្ងៃ គឺនៅថ្ងៃពុធ និងព្រហស្បតិ៍។
លោកនាយករដ្ឋមន្រ្តី ហ៊ុន សែន កាលពីថ្ងៃចន្ទ ថ្លែងដោយមិនចំឈ្មោះ តែសំដៅលើលោក កឹម សុខា ថា កម្ពុជាមិនថយក្រោយក្នុងការកាត់ក្ដីលើមនុស្ស ដែលលោកហៅថាជា«ជនក្បត់ជាតិ» ហើយលោកក៏បានព្រមានបិទការចរចាជាមួយគ្រប់ភាគីណា ដែលចង់ឲ្យលោកជួយអ្នកដែលតុលាការកំពុងកាត់ក្ដីផងដែរ។
ថ្លែងពីវិមានសន្តិភាព លោក ហ៊ុន សែន បញ្ជាក់ថា៖ «ថ្ងៃនេះសូមជូនសារជាក់លាក់ច្បាស់លាស់ ថាកម្ពុជាមិនថយក្រោយលើការកាត់ក្ដីចំពោះជនក្បត់ជាតិ ឬអ្នកដែលទទួលនូវទណ្ឌកម្មទេ។ អ្នកឯងត្រូវតែច្បាស់ អ្វីដែលអ្នកឯងបានធ្វើ អ្នកឯងត្រូវចាំ អ្នកឯងយកថ្ងៃទី២៩ ខែធ្នូ ២០១៣ គឺជាថ្ងៃផ្ដាច់ព្រ័ត្រ ក្នុងការផ្ដួលរំលំ»។
លោក ហ៊ុន សែន បានបញ្ជាក់ថា នេះជាការឆ្លើយតបទៅនឹងការសម្រេចរបស់សហភាពអឺរ៉ុបក្នុងការព្យួរប្រព័ន្ធអនុគ្រោះពន្ធនៅកម្ពុជា ហៅថាEBAដែលនឹងធ្វើឲ្យកម្ពុជាខាតបង់ប្រាក់ជាង១០០លានដុល្លារអាមេរិកនៅពេលខាងមុខ ដោយសារប៉ះពាល់ការនាំចេញផលិតផលទៅអឺរ៉ុបប្រមាណ២០ភាគរយ។ កន្លងទៅ សហភាពអឺរ៉ុប បានជំរុញឲ្យទម្លាក់ការចោទប្រកាន់លោក កឹម សុខា។
លោក កឹម សុខា នៅថ្ងៃអង្គារនេះ បានបដិសេធមិនធ្វើអត្ថាធិប្បាយជុំវិញការលើកឡើងរបស់លោកនាយករដ្ឋមន្រ្តី ហ៊ុន សែន ទេ។
លោក កឹម សុខា ត្រូវបានចាប់ខ្លួនកាលពីដើមខែកញ្ញា ឆ្នាំ២០១៧ ដោយសមត្ថកិច្ចបានប្រើប្រាស់វីដេអូមានរយៈពេលជាងពីរនាទី ដែលស្រង់ចេញពីវីដេអូជាងមួយម៉ោង មកធ្វើជាភស្តុតាងក្នុងការចាប់ខ្លួននិងចោទប្រកាន់ ហើយឃុំខ្លួនលោកក្នុងពន្ធនាគារ។ ក្រោយមក លោកត្រូវបានដោះលែងពីពន្ធនាគារមកឲ្យនៅក្នុងផ្ទះ។ លោកមិនមានសេរីភាពធ្វើនយោបាយ និងចាកចេញទៅក្រៅប្រទេសនោះទេ។
សវនាការជំនុំជម្រះសំណុំរឿងលោក កឹម សុខា កន្លងទៅមានការជជែកដេញដោលអំពីប្រវត្តិការងារទាំងនយោបាយ និងសង្គមស៊ីវិល ចាប់ពីឆ្នាំ១៩៩៣ ដល់ឆ្នាំ២០១២ ព្រមទាំងទំនាក់ទំនងផ្សេងៗជាមួយជនបរទេស និងអង្គការអន្តរជាតិមួយចំនួន៕
