អស់រយៈពេលជាងកន្លះឆ្នាំបន្ទាប់ពីលោកកឹម សុខា ប្រធានស្តីទីគណបក្សង្គ្រោះជាតិបានសម្ងំលាក់ខ្លួននៅក្នុងទីស្នាក់ការគណបក្សដោយភ័យខ្លាចពីសុវត្ថិភាព និងក្រោយពីមានរឿងអាស្រូវផ្លូវភេទជាមួយស្រ្តីម្នាក់ដែលសង្ស័យថា ជាស្ត្រីកំណាន់ចិត្តរបស់លោករួចមក លោក កឹម សុខា បានចាប់ផ្តើមបង្ហាញមុខជាសាធារណៈលើកដំបូងនៅតាមបណ្តាខេត្តដើម្បីពង្រឹងទំនាក់ទំនងជាមួយសកម្មជនគណបក្សមុនការបោះឆ្នោត។
តាមកម្មវិធីរបស់គណបក្សសង្គ្រោះជាតិលោក កឹម សុខា នឹងជួបសកម្មជនគណបក្សនៅទូទាំង២៥ខេត្តក្រុង ក៏ប៉ុន្តែការជួបប្រជុំនេះមិនបានបង្ហាញជាសាធារណៈទេ គឺភាគច្រើនធ្វើឡើងលក្ខណៈបិទទ្វារ។
ខេត្តដែលលោក កឹម សុខា បានចាប់ផ្តើមជួបសកម្មជនមុនគេកាលពីថ្ងៃអាទិត្យ គឺខេត្តព្រះសីហនុ ខេត្តកែប និងខេត្តកំពត ហើយក្រោយៗមកទៀតលោកនឹងបន្តជួបសកម្មជននៅទូទាំង២៥ខេត្តក្រុង។
លោក យឹម សុវណ្ណ អ្នកនាំពាក្យគណបក្សសង្គ្រោះជាតិមានប្រសាសន៍ថា ដំណើរចុះតាមមូលដ្ឋានរបស់លោក កឹម សុខា គឺដើម្បីពិនិត្យមើលការវិវត្តនៅមុនការបោះឆ្នោត។
លោក យឹម សុវណ្ណ បានបញ្ជាក់ថា៖
«គោលបំណងគឺគាត់ (កឹម សុខា) ទៅសួរសុខទុក្ខថ្នាក់ដឹកនាំគណបក្សសង្គ្រោះជាតិនៅតាមមូលដ្ឋាន លើកទឹកចិត្ត និងពិនិត្យមើលកិច្ចការមួយចំនួន ដែលពាក់ព័ន្ធនឹងការរៀបចំបេក្ខជនសម្រាប់ការចុះឈ្មោះបោះឆ្នោតនាពេលខាងមុខ»។
លោក កឹម សុខា ប្រធានស្តីទីគណបក្សសង្គ្រោះជាតិបានសម្ងំលាក់ខ្លួននៅក្នុងទីស្នាក់ការគណបក្សអស់រយៈពេលជាងកន្លះឆ្នាំ បន្ទាប់ពីលោកត្រូវបានគេសង្ស័យថា មានរឿងស្នេហាលួចលាក់ជាមួយនាង ខុម ចាន់តារ៉ាទី ហៅ «ស្រីមុំ»។
មានមនុស្សចំនួន៦នាក់យ៉ាងតិចត្រូវបានចាប់ឃុំឃាំង នៅក្នុងសំណុំរឿងអាស្រូវស្នេហាលួចលាក់នោះ។ លោកស៊ាង ចែត ប្រធានក្រុមប្រឹក្សាឃុំស្រក ស្រុកកំពង់សៀម ខេត្តកំពង់ចាម ត្រូវបានតុលាការដោះលែងឲ្យមានសេរីភាពវិញ បន្ទាប់ពីមានព្រះរាជក្រឹតលើកលែងទោសពីព្រះមហាក្សត្រ។
ចំណែកក្រុមសកម្មជនសិទ្ធិមនុស្សរបស់សមាគមសិទ្ធិមនុស្សអាដហុក ចំនួន៤នាក់ និងលោកនី ចរិយា អគ្គលេខាធិការរងនៃគណៈកម្មាធិការជាតិរៀបចំការបោះឆ្នោត កំពុងសិ្ថតក្នុងមន្ទីរឃុំឃាំងនៅឡើយ ដើម្បីរង់ចាំជំនុំជម្រះទោសពីបទ «សូកប៉ាន់សាក្សី និងផ្សំគំនិតសូកប៉ាន់សាក្សី»។
មន្ត្រីគណបក្សប្រជាជនកម្ពុជានិយាយថា សកម្មភាពរបស់លោកកឹម សុខា ខាងគណបក្សសង្គ្រោះជាតិ ចុះជួបសកម្មជននៅតាមបណ្តាខេត្ត មិនបានបង្កឲ្យគណបក្សគ្រប់គ្រងអំណាចមានការព្រួយបារម្ភអំពីប្រជាប្រិយភាពរបស់លោកនៅមុនការបោះឆ្នោតក្រុមប្រឹក្សាឃុំសង្កាត់នោះទេ។
លោក សុខ ឥសាន អ្នកនាំពាក្យគណបក្សប្រជាជនកម្ពុជា និយាយថា៖
«យើងមិនព្រួយបារម្ភទេ ពីព្រោះយើងមានបទពិសោធន៍ក្នុងការដឹកនាំជាច្រើនអាណត្តិមកហើយ។ យើងទៅខ្លាចព្រួយចំពោះការប្រកួតប្រជែងពីគណបក្សដទៃ អាហ្នឹងគឺថា មិនអាចទៅរួចទេ»។
មិនមែនមានតែគណបក្សដែលមានអាសនៈនៅក្នុងរដ្ឋសភាប៉ុណ្ណោះទេដែលបានចុះជួបសកម្មជនរបស់ខ្លួននៅតាមមូលដ្ឋាននោះ គណបក្សតូចៗដែលមិនមានអាសនៈក្នុងរដ្ឋសភាក៏មានផែនការរបស់ខ្លួនផងដែរ។
លោកញ៉ឹក ប៊ុនឆៃ ប្រធានគណបក្សខ្មែររួបរួមជាតិ បានបញ្ជាក់ប្រាប់ VOA នៅថ្ងៃចន្ទនេះថា គណបក្សរបស់លោកបានដាក់កម្មវិធីដើម្បីពង្រឹងសកម្មភាពរបស់គណបក្សនៅមុនការបោះឆ្នោតក្រុមប្រឹក្សាឃុំសង្កាត់ ដែលគ្រោងនឹងប្រព្រឹត្តឡើងនៅក្នុងខែមិថុនាខាងមុខនេះ៕
