មន្រ្តីជំនិតដែលជាជំនួយការរបស់លោក កឹម សុខា បានច្រានចោលការអះអាងនានាអំពីគម្រោងបង្កចលាចលណាមួយ ដែលអាចកើតឡើងនៅថ្ងៃប្រកាសសាលក្រមលើលោក កឹម សុខា ដែលគ្រោងធ្វើឡើងនៅថ្ងៃសុក្រ ទី៣ ខែមីនា ឆ្នាំ២០២៣។
មួយថ្ងៃមុនការប្រកាសសាលក្រមលើលោក កឹម សុខា ដែលជាអតីតមេដឹកនាំគណបក្សសង្រ្គោះជាតិ សារព័ត៌មានស្និទ្ធនឹងរដ្ឋាភិបាល Fresh News បានចុះផ្សាយព័ត៌មានតាមហ្វេសប៊ុកមួយ ដែលនិយាយអំពីគម្រោងបង្កចលាចលពីក្រុមណាមួយ នៅពេលប្រកាសសាលក្រមលើលោក កឹម សុខា។
សារព័ត៌មាន Fresh News កាលពីថ្ងៃពុធ បានចុះផ្សាយអត្ថបទមួយក្រោមចំណងជើងថា៖ «ទម្លាយព័ត៌មាន៖ ជនមុខសញ្ញាភ្នាក់ងារសម្ងាត់ CIA ពីររូបកំពុងមានវត្តមាននៅរាជធានីភ្នំពេញ ដើម្បីបង្កចលាចល នៅពេលប្រកាសសាលក្រម កឹម សុខា នៅថ្ងៃទី៣ ខែមីនាខាងមុខ»។ ការចុះផ្សាយនេះ យោងតាមប្រភពមិនផ្លូវការមួយ គឺទំព័រហ្វេសប៊ុកដែលមានឈ្មោះថា «ខ្ញុំ ជាសម រង្ស៊ី» ហើយមនុស្សពីររូបដែលត្រូវបានបញ្ជាក់ឈ្មោះក្នុងការបង្ហោះសារនោះ មានលោក មាជ សុវណ្ណារ៉ា និងជនបរទេសម្នាក់ឈ្មោះ លោក Mark Gibbel។
សារព័ត៌មាន Fresh news ដកស្រង់ព័ត៌មានបន្តថា៖ «មុនពេលចេញដំណើរទៅកម្ពុជា លោក សុវណ្ណារ៉ា មាជ បានអួតប្រាប់មិត្តភក្តិឱ្យដឹងថាគឺត្រូវតែមកដឹកនាំកម្លាំងប្រឆាំងសាលក្រមរបស់តុលាការភ្នំពេញ ដែលប្រកាសកាត់ទោសលោក កឹម សុខា ព្រោះគេមានបណ្តាញច្រើននៅប្រទេសកម្ពុជា។ គួរតែអាជ្ញាធរក្រុងភ្នំពេញ មានការប្រុងប្រយ័ត្នឱ្យមែនទែន ព្រោះជនដែលជាភ្នាក់ងារសម្ងាត់ពីរនាក់ខាងលើនេះមានឧបាយកលពិសពុលខ្លាំងណាស់»។
លោក មាជ សុវណ្ណារ៉ា ដែលជាអតីតមន្ត្រីជាន់ខ្ពស់គណបក្សសង្គ្រោះជាតិ និងជាមនុស្សជំនិតរបស់អតីតប្រធានគណបក្សសង្គ្រោះជាតិ លោក កឹម សុខា បានចេញវីដេអូមួយមានរយៈពេលជិត៧នាទី បង្ហោះលើគណនីហ្វេសប៊ុករបស់លោក ដោយបានច្រានចោលការចេញផ្សាយរបស់សារព័ត៌មាន Fresh News ដែលបានដកស្រង់ការបង្ហោះមិនផ្លូវការ និងភ្ជាប់រូបលោកជាទីភ្នាក់ងារស៊ើបការណ៍សម្ងាត់សហរដ្ឋអាមេរិក (CIA)។
លោកបញ្ជាក់ថា៖ «ខ្ញុំរស់នៅ[ជាមួយ]នឹងដើមត្នោតកម្ពុជា ខ្ញុំស្រឡាញ់មាតុភូមិខ្ញុំ ខ្ញុំមានចំណេះដឹងតិចតួច ខ្ញុំចង់ជួយមាតុភូមិរបស់ខ្ញុំ។ អ៊ីចឹងខ្ញុំសូមបដិសេធនូវព័ត៌មានព្រឹត្តិការណ៍បែបបំបែកបំបាក់ បែបធ្វើឱ្យគេឈឺចាប់របស់ Fresh News របៀបនេះ»។
លោក មាជ សុវណ្ណារ៉ា ក៏បញ្ជាក់ថា លោក Mark Gibbel គឺជាមិត្តរបស់លោក ហើយលោក Mark មកលេងនៅកម្ពុជា។ ចំណែករូបលោកផ្ទាល់មកសួរសុខទុក្ខឪពុកម្តាយ រៀនសូត្រ និងបំពេញការងារស្រាវជ្រាវរបស់លោក។
ចំណែកលោក មុត ចន្ថា ជំនួយការលោក កឹម សុខា ក៏បានបង្ហោះសារនាថ្ងៃព្រហស្បតិ៍នេះថាលោក កឹម សុខា នឹងមានវត្តមាននៅតុលាការរាជធានីភ្នំពេញ ហើយលោក«តែងតែរក្សាជំហរស្ងប់ស្ងាត់ មិនបង្កជម្លោះ អហិង្សា និងគោរពច្បាប់យ៉ាងខ្ជាប់ខ្ជួន ក្នុងរយៈពេល៥ឆ្នាំ និង៦ខែ មកនេះ ក្នុងការតតាំងក្តីក្នុងតុលាការ ដើម្បីស្វែងរកយុត្តិធម៌ចំពោះការចោទប្រកាន់ដោយអយុត្តិធម៌»។
លោកសរសេរបន្ថែមថា៖ «ឯកឧត្តម កឹម សុខា តែងតែទូន្មានដល់អ្នកគាំទ្រ និងអ្នកមានសមានចិត្តជាមួយលោក ឱ្យស្ថិតនៅឱ្យឆ្ងាយពីក្រុមណាដែលបង្កជម្លោះ បង្កអស្ថិរភាព និងអសន្តិភាពដល់សង្គម។ ដូច្នេះ ការណ៍ដែលចោទលាបពណ៌ថា មានអ្នកនេះ ឬអ្នកនោះបង្កចលាចលក្នុងថ្ងៃប្រកាសសាលក្រម គឺជាអំពើចោទលាបពណ៌ខ្មែរគ្នាឯងដោយចេតនាទុច្ចរិត»។
លោកបន្ថែមថា៖ «ឯកឧត្តម កឹម សុខា នឹងបង្ហាញខ្លួននៅសាលាដំបូងរាជធានីភ្នំពេញ នៅព្រឹកថ្ងៃទី៣ ខែមីនា ឆ្នាំ២០២៣។ យើងមិនគាំទ្រ និងប្រឆាំងដាច់ខាតចំពោះជនណា ឬក្រុមណាក៏ដោយ ដែលមានចេតនា ឬបំណងបង្កចលាចល ដើម្បីទម្លាក់កំហុស និងចោទប្រកាន់ដោយទុច្ចរិត តាមរបៀបស្វាស៊ីបាយលាបមាត់ពពែ»។
រដ្ឋលេខាធិការ និងជាអ្នកនាំពាក្យក្រសួងមហាផ្ទៃ លោក ខៀវ សុភ័គ ប្រាប់វីអូអេថា ទោះបីជាអ្នកណាម្នាក់ជាភ្នាក់ងារ CIA ឬមិនមែនក៏ដោយ ក៏ក្រសួងមហាផ្ទៃមិនអាចបកស្រាយបានដែរ ព្រោះនេះជាការងារសម្ងាត់របស់រដ្ឋ។
លោកថ្លែងថា៖ «និយាយរួមតាមដាន ឬមិនតាមដាន ក៏ពូមិនដឹងមុនដែរ [ព្រោះ] គ្មានសមត្ថកិច្ចរបស់ពូដែរចង់និយាយអ៊ីចឹង ហើយក៏មិនមែនការងាររបស់មហាផ្ទៃទេ ព្រោះការងារទាំងអស់ហ្នឹង ពាក់ព័ន្ធការងារសម្ងាត់របស់រដ្ឋមិនស្ថិតនៅក្នុង [ក្រសួង]មហាផ្ទៃម្នាក់ឯងទេ ជួលកាល។ ហើយនិយាយរួមក្នុងនាមអ្នកនាំពាក្យក្រសួងមហាផ្ទៃក៏មិនត្រូវ [និយាយដែរ] ទោះជាភ្នាក់ងារ ឬមិនភ្នាក់ងារក៏ មិនអាចបកស្រាយបានដែរ...។ ហើយមួយទៀត ការតាមដាន ឬមិនតាមដានអាស្រ័យលើសកម្មភាពរបស់អ្នកហ្នឹងទេ។ ចង់និយាយអ៊ីចឹង»។
គួរបញ្ជាក់ថានៅដើមឆ្នាំ២០២៣នេះ លោក កឹម សុខា បានជួបជាមួយឥស្សរជននៃបណ្តាប្រទេសផ្សេងៗ ដូចជាប្រធានាធិបតីនៃសហព័ន្ធអាល្លឺម៉ង់ ឯកអគ្គរាជទូតថ្មីនៃចក្រភពអង់គ្លេសប្រចាំនៅកម្ពុជា ឯកអគ្គរដ្ឋទូតសាធារណរដ្ឋបារាំងប្រចាំនៅកម្ពុជា ឯកអគ្គរដ្ឋទូតសហរដ្ឋអាមេរិកប្រចាំនៅកម្ពុជា។ កាលពីថ្ងៃទី២៤ ខែកុម្ភៈ ឆ្នាំ២០២៣ មុនពេលចូលស្តាប់សវនាការប្រកាសសាលក្រម លោក កឹម សុខា បានជួបជាមួយឯកអគ្គរាជទូតថ្មីនៃប្រទេសជប៉ុនប្រចាំកម្ពុជាផងដែរ៕
