អាជ្ញាធរខេត្តកំពតបានចេញសេចក្តីប្រកាសមួយកាលពីថ្ងៃសៅរ៍អំពីការបើកទ្វាររំដោះទឹកចេញពីក្នុងអាងទំនប់វារីអគ្គិសនីកំចាយក្នុងថ្ងៃដដែល និងបានណែនាំឲ្យពលរដ្ឋក្នុងខេត្តជាប់សមុទ្រនេះ បង្កើនការប្រុងប្រយ័ត្នអំពីទឹកជន់លិច។ នេះបើយោងតាមសេចក្តីប្រកាសរបស់រដ្ឋបាលខេត្តកំពតដែល VOA ទទួលបាន។
ការចេញប្រកាសអំពីការបើកទ្វារទឹកនេះរងការរិះគន់ពីមន្ត្រីសិទ្ធិមនុស្ស ដោយសារតែការចេញប្រកាសនោះត្រូវបានធ្វើឡើងក្នុងថ្ងៃតែមួយនៃការណែនាំប្រជាពលរដ្ឋ។
លោក ស៊ឹង សែនករុណា អ្នកនាំពាក្យសមាគមការពារសិទ្ធិមនុស្សអាដហុក (Adhoc) មានប្រសាសន៍ប្រាប់ VOA នៅថ្ងៃចន្ទនេះថា៖
«បាទនេះ ជាការជូនដំណឹងមួយ ដែលប្រកៀកប្រកិតមែនទែន ហើយជាបញ្ហាមួយដែលធ្វើឲ្យពលរដ្ឋហ្នឹង អាចថាមានការភ័យ ស្លន់ស្លោក៏ថាបានដែរ ពីព្រោះវាមានភាពកៀកថ្ងៃពេក»។
តាមសេចក្តីប្រកាសរបស់រដ្ឋបាលខេត្ត កំពត ចុះថ្ងៃទី២០ ខែ តុលា ឆ្នាំ២០១៨ បានបញ្ជាក់ឲ្យដឹងតាមន័យដើមថា៖
«គណៈកម្មាធិការគ្រប់គ្រងគ្រោះមហន្តរាយខេត្ត កំពត សូមជម្រាបជូនដំណឹងដល់បងប្អូនប្រជាពលរដ្ឋដែលមានភូមិសាស្ត្ររស់នៅអមសងខាងដងព្រែកកំពង់បាយជ្រាបថា ស្ថានភាពទឹកក្នុងអាងទំនប់វារីអគ្គិសនីកំចាយថ្ងៃទី ២០ ខែ តុលា ឆ្នាំ ២០១៨ វេលា ម៉ោង ១០នាទីព្រឹក មានកម្ពស់ ១៤៦, ៩៥ ម៉ែត្រ ទឹកហូរចូលអាចមានចំនួន៦៦០០ម៣/វិនាទី។ ក្រុមការងារបច្ចេកទេសរបស់ក្រុមហ៊ុនវារីអគ្គិសនីកំចាយនឹងបើកទ្វារដើម្បីរំដោះទឹកជាបណ្តើរៗចេញពីទំនប់វារីអគ្គិសនីនាព្រឹកនេះ។ ការបើកទ្វារទឹកនេះនឹងបណ្តាលឲ្យជន់លិចនៅភូមិសាស្ត្រភូមិឃុំ ស្រុកមួយចំនួននៅអមសងខាងដងព្រែក»។
សេចក្តីប្រកាសនេះបានអំពាវនាវដល់អាជ្ញាធរភូមិឃុំនិងពលរដ្ឋតាមន័យដើមថា៖
«សូមអាជ្ញាធរភូមិ ឃុំ ស្រុក បង្កើនការយកចិត្តទុកដាក់ខ្ពស់ និងត្រៀមលក្ខណៈធ្វើការជម្លៀសបងប្អូនប្រជាពលរដ្ឋទៅកាន់ទីទួលមានសុវត្ថិភាពក្នុងករណីគ្រោះអាសន្នកើតមានឡើង។ អាស្រ័យដូចបានជម្រាបជូនខាងលើ សូមបងប្អូនប្រជាពលរដ្ឋបង្កើនការប្រុងប្រយ័ត្នខ្ពស់ ដើម្បីជៀសវាងនូវគ្រោះថ្នាក់ដែលអាចកើតមានឡើងជាយថាហេតុ»។
លោក វ៉ែន ស៊ីថា នាយករដ្ឋបាលសាលាខេត្តកំពតបានប្រាប់ VOA ថា ការចេញសេចក្តីជូនដំណឹងនេះ មិនមានភាពប្រញាប់ប្រញាល់នោះទេ។ លោកអះអាងថា ទឹកក៏បានស្រកហើយក៏គ្មានការជន់លិចនោះដែរ។
លោក វ៉ែន ស៊ីថា បានថ្លែងថា៖
«មានអីប្រថុចញុចចឹង មានអីវា បាទព្រោះទឹកហ្នឹងតែល្ងាច បើកពីព្រឹកល្ងាចទៅអស់ហើយហ្នឹង»។
ក៏ប៉ុន្តែ លោក ស៊ឹង សែនករុណា អ្នកនាំពាក្យសមាគមការពារសិទ្ធិមនុស្សអាដហុក យល់ថា អាជ្ញាធរត្រូវតែមានភាពហ្មត់ចត់ចំពោះការចេញសេចក្តីជូនដំណឹងរបស់ខ្លួន ហើយក៏ត្រូវមានក្រុមប្រចាំការតាមមើលកម្ពស់ទឹកផងដែរ ដើម្បីបង្ការគ្រោះអាសន្ននានា តួយ៉ាងដូចជា ការបាក់ទំនប់នៅប្រទេស ឡាវ ជាដើម។
«យើងឃើញហើយថា អំពីទំនប់វារីអគ្គិសនីនេះ មានការគ្រោះថ្នាក់ធ្ងន់ធ្ងរណាស់ដូចជាមហន្តរាយមួយដែលយើងធ្លាប់ឃើញថ្មីៗនៅប្រទេស ឡាវ អីចឹង។ ដូច្នេះហើយកម្ពុជាយើងដែលហេតុដែលមានទំនប់វារីអគ្គិសនីហ្នឹងគួរតែរឹតបន្តឹងឲ្យមែនទែន កុំឲ្យមានការធ្វេសប្រហែស ដល់ថ្នាក់ភ្លាម ជូនដំណឹងភ្លាមៗចឹង គួរតែមានការជូនដំណឹងរយៈពេលយូរ ដើម្បីឲ្យពលរដ្ឋមានការត្រៀមខ្លួន ហើយក៏គួរតែមានក្រុមប្រចាំការ ក្រុមបច្ចេកទេសត្រួតពិនិត្យមើលក្នុងកម្ពស់ទឹកហ្នឹងឲ្យបានត្រឹមត្រូវ ជៀសវាងកុំឲ្យមានការជូនដំណឹងប្រកៀកប្រកិត ដូចដែលគាត់បានជូនដំណឹងហ្នឹងបាទ»។
កាលពីខែកក្កដា ឆ្នាំ២០១៨ មានហេតុការណ៍បាក់ទំនប់ Xe-Pian Xe-Namnoy ក្នុងខេត្ត Attapeu ប្រទេសឡាវ ដែលស្ថិតនៅក្បែរព្រំដែនប្រទេសកម្ពុជា។ មនុស្សជាច្រើននាក់ត្រូវបានសម្លាប់ និងប្រមាណ៧ពាន់នាក់ត្រូវបានបង្ខំឲ្យចាកចេញពីលំនៅដ្ឋានក្រោយពីមានហេតុការណ៍បាក់ទំនប់វារីអគ្គីសនីដ៏មហន្តរាយនេះ។ ការបាក់ទំនប់នេះ ជាការបាក់ទំនប់លើកទីពីរនៅប្រទេសឡាវ ក្នុងរយៈពេលមួយឆ្នាំ។
មេដឹកនាំនៃបណ្តាប្រទេសនៅតំបន់មេគង្គបានបង្ហាញពីក្តីព្រួយបារម្ភអំពីការអភិវឌ្ឍថាមពលវារីអគ្គិសនីតាមដងទន្លេមេគង្គ ក្រោយពីមានហេតុការណ៍បាក់ទំនប់វារីអគ្គិសនីនៅក្នុងប្រទេសឡាវកាលពីខែកក្កដាកន្លងទៅនេះរួចមក៕
