ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

«ទិវា​បញ្ចប់​ទាសភាព» ក្លាយ​ជា​ថ្ងៃ​ឈប់​សម្រាក​ជាតិ​នៅ​សហរដ្ឋ​អាមេរិក


ប្រជាជន​នាំ​គ្នា​ប្រារព្ធ​ទិវា​បញ្ចប់​ទាស​ភាព​នៅ​សួន St. Nicholas ក្នុង​ទីក្រុង​ញូវយ៉ក សហរដ្ឋ​អាមេរិក ថ្ងៃទី១៨ ខែមិថុនា ឆ្នាំ២០២១។

ទិវា​បញ្ចប់​ទាសភាព (Juneteenth) បាន​ក្លាយ​ជា​ថ្ងៃ​ឈប់​សម្រាក​ជាតិ​នៅ​សហរដ្ឋ​អាមេរិក បន្ទាប់ពី​លោក​ប្រធានាធិបតី Joe Biden ចុះ​ហត្ថលេខា​លើ​សេចក្ដី​ព្រាង​ច្បាប់​ស្ដីពី​ការ​បង្កើត​ទិវា​នេះ​ឲ្យ​ក្លាយទៅជា​ច្បាប់​កាលពី​ថ្ងៃ​ព្រហស្បតិ៍។

ប៉ុន្តែ​ពលរដ្ឋ​អាមេរិកាំង​ដើម​កំណើត​អាហ្វ្រិក​បាន​ប្រារព្ធ​ទិវា​នេះ​ជា​រៀងរាល់​ឆ្នាំ​នៅ​ថ្ងៃ​ទី ១៩ ខែ​មិថុនា តាំងពី​ឆ្នាំ ១៨៦៥ មក​ម៉្លេះ ដែល​នៅ​ពេល​នោះ ពលរដ្ឋ​ស្បែក​ខ្មៅ​ដែលជា​ទាសករ​ចុងក្រោយ​បង្អស់​បាន​ដឹង​ថា​ពួកគេ​មាន​សេរីភាព​រួច​ផុត​ពី​ទាសភាព។ ពួកគេ​បាន​ដឹង​ដូច្នេះ​ក្នុង​ពេល​ពីរ​ឆ្នាំ​កន្លះ​ក្រោយ​មក បន្ទាប់ពី​លោក​ប្រធានាធិបតី Abraham Lincoln ចុះ​ហត្ថលេខា​លើ​សេចក្ដី​ប្រកាស​ស្ដីពី​ការ​រួចផុត​ពី​ទាសភាព (Emancipation Proclamation)។

ទិវា​នេះ​ក៏​ជា​ថ្ងៃ​មួយ​ដើម្បី​ឆ្លុះបញ្ចាំង​អំពី​ការ​តស៊ូ​ជម្នះ​របស់​ពលរដ្ឋ​អាមេរិកាំង​ដើម​កំណើត​អាហ្វ្រិក​ដើម្បី​សេរីភាព​និង​យុត្តិធម៌ និង​ជា​ថ្ងៃ​ដើម្បី​បង្រៀន​អំពី​ប្រវត្តិសាស្ត្រ​ដ៏​សំខាន់​ដល់​កូន​ចៅ​ជំនាន់​ក្រោយ​ផងដែរ។

អ្នកស្រី Kelly Elaine Navies ដែលជា​អ្នក​ជំនាញ​ខាង​សារមន្ទីរ​និង​ជា​ប្រវត្តិវិទូ​ម្នាក់​នៅ​សារមន្ទីរ​ជាតិ​ប្រវត្តិសាស្ត្រ​និង​វប្បធម៌​ពលរដ្ឋ​អាមេរិកាំង​ដើម​កំណើត​អាហ្វ្រិក​ក្នុង​រដ្ឋធានី​វ៉ាស៊ីនតោន បាន​ពន្យល់​ថា កាលពី​ថ្ងៃ​ទី ១៩ ខែ​មិថុនា ឆ្នាំ ១៨៦៥ លោក​នាយ​ឧត្តមសេនីយ៍ Gordon Granger បាន​ធ្វើ​ដំណើរ​ទៅ​ដល់​ទីក្រុង Galveston រដ្ឋ Texas ដោយ​អម​ដំណើរ​ដោយ​កងទ័ព​រដ្ឋាភិបាល​សហព័ន្ធ​សហរដ្ឋ​អាមេរិក (The Union) ចំនួន ១.៨០០ នាក់ ដែល​ភាគច្រើន​គឺ​ជា​កងកម្លាំង​ចម្រុះ​ជាតិ​សាសន៍ និង​បាន​ប្រកាស​នូវ​បទបញ្ជា​លេខ ៣ របស់​មេបញ្ជាការ​យោធា ដែល​ជូន​ដំណឹង​ដល់​ពលរដ្ឋ​នៅ​រដ្ឋ Texas ថា ទាសករ​ទាំងអស់​រួច​ផុត​ពី​ទាសភាព។

អ្នកស្រី Navies ថ្លែង​ថា៖ «[សេចក្ដីប្រកាស​នោះ] ចង់​បញ្ជាក់​ថា ទាសភាព​ត្រូវ​បញ្ចប់​តាម​ផ្លូវ​ច្បាប់ ហើយ​ទាសករ​មាន​សេរីភាព​ឡើង​វិញ។ រឿង​នេះ​គឺ​សំខាន់ ដោយសារតែ​ទោះបីជា​សេចក្ដី​ប្រកាស​របស់​ប្រធានាធិបតី​ស្ដីពី​ការ​រួចផុត​ពី​ទាសភាព​ត្រូវ​បាន​ចុះ​ហត្ថលេខា​កាលពី​ថ្ងៃ​ទី ១ ខែ​មករា ឆ្នាំ ១៨៦៣ ក៏ដោយ ក៏​សេចក្ដី​ប្រកាស​នេះ​ត្រូវ​បាន​អនុវត្ត​តែ​នៅ​ក្នុង​បណ្ដា​រដ្ឋ​ភាគ​ខាង​ត្បូង (The Confederacy) ណា​ដែល​មាន​វត្តមាន​កងទ័ព​រដ្ឋាភិបាល​សហព័ន្ធ​តែ​ប៉ុណ្ណោះ»។

ប្រធានាធិបតី​សហរដ្ឋ​អាមេរិក លោក Joe Biden ចុះ​ហត្ថលេខា​លើ​សេចក្ដីព្រាង​ច្បាប់​ស្ដី​ពី​ទិវា​បញ្ចប់​ទាសភាព​ឲ្យទិវា​នេះ​ក្លាយ​ជា​ថ្ងៃ​ឈប់​សម្រាក​ជាតិ​នៅ​ក្នុង​សហរដ្ឋ​អាមេរិក សេតវិមាន រដ្ឋធានី​វ៉ាស៊ីនតោន ថ្ងៃទី១៧ ខែមិថុនា ឆ្នាំ២០២១។
ប្រធានាធិបតី​សហរដ្ឋ​អាមេរិក លោក Joe Biden ចុះ​ហត្ថលេខា​លើ​សេចក្ដីព្រាង​ច្បាប់​ស្ដី​ពី​ទិវា​បញ្ចប់​ទាសភាព​ឲ្យទិវា​នេះ​ក្លាយ​ជា​ថ្ងៃ​ឈប់​សម្រាក​ជាតិ​នៅ​ក្នុង​សហរដ្ឋ​អាមេរិក សេតវិមាន រដ្ឋធានី​វ៉ាស៊ីនតោន ថ្ងៃទី១៧ ខែមិថុនា ឆ្នាំ២០២១។

អ្នកស្រី Navies បាន​រំឭក​ឡើងវិញ​នូវ​ពេល​ដែល​អ្នកស្រី​នៅ​ជា​កុមារ​ថា ឪពុក​របស់​អ្នកស្រី ដែល​ជា​អ្នក​អប់រំ​ម្នាក់ តែងតែ​ប្រារព្ធ​ទិវា​បញ្ចប់​ទាសភាព​នេះ ដែល​គេ​ស្គាល់​ផងដែរ​ថា​ជា «ទិវា​សេរីភាព»។

អ្នកស្រី Navies ថ្លែង​ថា៖ «គាត់ [ឪពុក​អ្នកស្រី] មិន​ត្រឹមតែ​អញ្ជើញ​សិស្ស​របស់​គាត់​នៅ​វិទ្យាល័យ Berkeley ប៉ុណ្ណោះ​ទេ ប៉ុន្តែ​គាត់​ថែម​ទាំង​អញ្ជើញ​មិត្តភក្ដិ​និង​ក្រុម​គ្រួសារ​របស់​គាត់ ក៏​ដូចជា​សមាជិក​សហគមន៍​ផងដែរ។ យើង​តែងតែ​អាំង​សាច់​ពេញ​មួយ​យប់ ហើយ​តាំង​ពី​ក្មេង​មក ការងារ​របស់​ខ្ញុំ​គឺ​ត្រូវ​ចិញ្ច្រាំ​ខ្ទឹម​បារាំង​និង​ដំឡូង​បារាំង»។

អ្នកស្រី​បាន​ថ្លែង​ទៀត​ថា៖ «យើង​មាន​កម្មវិធី​មួយ​សម្រាប់​មនុស្ស​ទាំង​ចាស់​ទាំង​ក្មេង។ ក្មេងៗ​ត្រូវ​សម្ដែង​និង​អាន​កំណាព្យ បញ្ចេញ​ក្បាច់​រាំ និង​បើក​ក្បាល​មីក្រូ។ ចំណែក​ឯ​ចាស់ៗ​វិញ​ត្រូវ​និទាន​និង​ចែក​រំលែក​រឿងរ៉ាវ​របស់​ខ្លួន​ក្នុង​នាម​ជា​ពលរដ្ឋ​ស្បែក​ខ្មៅ​រស់នៅ​ក្នុង​សហរដ្ឋ​អាមេរិក»។

ទិវា​បញ្ចប់​ទាសភាព​នេះ​បាន​ក្លាយជា​ថ្ងៃ​ឈប់​សម្រាប់​នៅ​ក្នុង​រដ្ឋ​ជិត ៥០ នៅ​ទូទាំង​សហរដ្ឋ​អាមេរិក និង​នៅ​ក្នុង​រដ្ឋធានី​វ៉ាស៊ីនតោន។ កាលពី​ឆ្នាំ​មុន បន្ទាប់ពី​មនុស្ស​រាប់​លាន​នាក់​បាន​នាំ​គ្នា​តវ៉ា​ប្រឆាំង​នឹង​ភាព​អយុត្តិធម៌​ជាតិ​សាសន៍​នៅ​ក្រោយ​ហេតុការណ៍​សម្លាប់​លោក George Floyd នាង Breonna Taylor និង​អ្នក​ផ្សេង​ទៀត​មក ក្រុម​សមាជិក​សភា​មកពី​គណបក្ស​ប្រជាធិបតេយ្យ​និង​គណបក្ស​សាធារណរដ្ឋ​បាន​ព្យាយាម​ធ្វើ​ឲ្យ​សភា​ទទួល​ស្គាល់​ទិវា​បញ្ចប់​ទាសភាព​នេះ​ជា​ថ្ងៃ​ឈប់​សម្រាក​របស់​ជាតិ។

កាល​ពី​ថ្ងៃ​ព្រហស្បតិ៍​កន្លង​ទៅ​នេះ គឺ​ក្នុង​រយៈពេល​ជាង ១៥០ ឆ្នាំ​ក្រោយ​មក ទិវា​បញ្ចប់​ទាសភាព​នេះ​ត្រូវ​បាន​លោក​ប្រធានាធិបតី Biden ចុះ​ហត្ថលេខា​ជា​ផ្លូវការ​ទទួល​ស្គាល់​ជា​ថ្ងៃ​ឈប់​សម្រាក​របស់​ជាតិ​នៅ​ក្នុង​ពិធី​មួយ​នៅ​សេតវិមាន បន្ទាប់ពី​សេចក្ដី​ព្រាង​ច្បាប់​ស្ដីពី​ការ​បង្កើត​ទិវា​នេះ​ត្រូវ​បាន​សភា​អនុម័ត​បាន​ប៉ុន្មាន​ថ្ងៃ​មក។

លោក Justin Hansford សាស្ត្រាចារ្យ​មហា​វិទ្យាល័យ​ច្បាប់​នៃ​សាកលវិទ្យាល័យ Howard បាន​និយាយ​ថា ទិវា​បញ្ចប់​ទាសភាព​នេះ​គឺ​មិន​គ្រាន់តែ​ជា​ការ​អបអរ​អំពី​ការ​មាន​សេរីភាព​ឡើង​វិញ​របស់​ពលរដ្ឋ​អាមេរិកាំង​ដើម​កំណើត​អាហ្វ្រិក​ប៉ុណ្ណោះ​ទេ ប៉ុន្តែ​ថែមទាំង​ជា​ថ្ងៃ​នៃ​ការ​ចងចាំ​និង​ការ​អប់រំ​ផងដែរ៕

ប្រែសម្រួល​ដោយ​អ្នកស្រី ហុង ចិន្ដា

XS
SM
MD
LG