ចៅក្រមអន្ដរជាតិក្នុងសាលាក្ដីខ្មែរក្រហមបានរំឭកនៅថ្ងៃច័ន្ទនេះអំពីតួនាទីមិនលម្អៀងរបស់ក្រុមចៅក្រមសម្រាប់រកយុត្តិធម៌ជូនជនរងគ្រោះកម្ពុជា ខណៈដែលចៅក្រមរូបនោះបាននិយាយយោងដល់សំណុំរឿង០០៣ និង០០៤ ដ៏ចម្រូងចម្រាស់។
និយាយនៅក្នុងកិច្ចប្រជុំពេញអង្គលើកទី១០របស់ចៅក្រម និងព្រះរាជអាជ្ញានៃសាលាក្ដីខ្មែរក្រហមដែលនឹងដំណើរការក្នុងរយៈពេលបីថ្ងៃដើម្បីធ្វើវិសោធនកម្មវិធានផ្ទៃក្នុងចាំបាច់មួយចំនួន លោកស្រី ស៊ីលវៀ ខាតរ៉ៃត៍ (Sylvia Cartwright) អនុប្រធានកិច្ចប្រជុំពេញអង្គនេះ មានប្រសាសន៍ថាក្រុមចៅក្រមត្រូវតែឃ្លាតឆ្ងាយពីការជ្រៀតជ្រែកនានា ក្នុងដំណើរការផ្ដល់យុត្តិធម៌ដល់ជនរងគ្រោះកម្ពុជា។
«យើងសង្ឃឹមថា យើងនឹងទទួលបានជោគជ័យក្នុងការផ្ដល់យុត្តិធម៌ជូនប្រជាពលរដ្ឋកម្ពុជា។ ការណ៍នេះត្រូវការសេចក្ដីក្លាហាន និងការសម្រេចចិត្តដែលក្រុមចៅក្រមនឹងពិនិត្យយ៉ាងពេញលេញនូវភស្ដុតាង និងការប្រតិបត្តិតាមផ្លូវច្បាប់ ហើយនឹងធ្វើសេចក្ដីសម្រេចដែលមិនចំណុះឲ្យឥទ្ធិពលខាងក្រៅ ឬចំណុះឲ្យភាពលម្អៀងជាលក្ខណៈបុគ្គលនោះ»។
សាលាក្ដីខ្មែរក្រហមបានចាប់ដាក់ឃុំឃាំង និងចោទប្រកាន់ជនសង្ស័យដែលជាអតីតមេដឹកនាំខ្ពស់បំផុតនៃរបបកម្ពុជាប្រជាធិបតេយ្យ និងអ្នកទទួលខុសត្រូវខ្ពស់បំផុតនៃរបបនេះសរុបចំនួនប្រាំនាក់ ដែលក្នុងនោះមាន ឌុច អៀង សារី ខៀវ សំផន នួន ជា និងអៀង ធីរិទ្ធ។ ពួកគេត្រូវបានចោទប្រកាន់ពីបទប្រព្រឹត្តអំពើឃោរឃៅដែលបានបណ្ដាលឲ្យប្រជាពលរដ្ឋកម្ពុជាស្លាប់ជិត២លាននាក់នៅចន្លោះពីឆ្នាំ១៩៧៥ ដល់ឆ្នាំ ១៩៧៩។
ទាំងលោកស្រី ស៊ីលវៀ ខាតរ៉ៃត៍ និងទាំងលោកចៅក្រមគង់ ស្រ៊ីម ប្រធានអង្គជំនុំជម្រះតុលាការកំពូល និងជាប្រធានកិច្ចប្រជុំពេញអង្គសុទ្ធតែបានបង្ហាញថា ការកាត់ទោសសំណុំរឿង០០២ នឹងមកដល់នៅក្នុងអំឡុងចុងឆ្នាំនេះ។ មន្ដ្រីផ្លូវការនៅក្នុងសាលាក្ដីខ្មែរក្រហមឲ្យដឹងថា ការកាត់ទោសនៅក្នុងសំណុំរឿងនេះអាចនឹងប្រព្រឹត្តទៅនៅក្នុងអំឡុងខែកញ្ញា ឆ្នាំ ២០១១នេះ។ ក៏ប៉ុន្ដែមានការលើកឡើងអំពីកង្វល់ជាច្រើន ដែលខ្លាចថាសំណុំរឿង០០៣ និងសំណុំរឿង០០៤ ត្រូវបានបោះបង់ចោល។ លោកសហចៅក្រមស៊ើបអង្កេតអន្ដរជាតិ ស៊ីហ្គហ្វ៊ិដ ប៊្លុង្គ (Siegfried Blunk) បានប្រាប់វីអូអេខ្មែរកាលពីខែមុនថា សំណុំរឿងនេះនឹងមិនត្រូវបានបោះបង់ចោលនោះទេ។
មានការរិះគន់អំពីការជ្រៀតជ្រែកនយោបាយពីរដ្ឋាភិបាលលើសំណុំរឿង០០៣ និងសំណុំរឿង០០៤នេះ ហើយក៏មានការចោទប្រកាន់ជាច្រើនទៀតទាក់ទងនឹងភាពលម្អៀងផ្នែកនយោបាយ ជាពិសេសសំដៅលើភាគីកម្ពុជានៅក្នុងសាលាក្ដីខ្មែរក្រហម។
លោកស្រី ស៊ីលវៀ ខាតរ៉ៃត៍ មានប្រសាសន៍ថា ការអធិប្បាយជាសាធារណៈទាក់ទងទៅនឹងការងាររបស់សាលាក្ដីខ្មែរក្រហមមិនមែនជាទម្លាប់នៅក្នុងប្រទេសជាច្រើននោះទេ។
ក្រុមចៅក្រម និងសហព្រះរាជអាជ្ញានឹងត្រូវធ្វើវិសោធនកម្មសំខាន់ៗជាច្រើននៅក្នុងរយៈពេលបីថ្ងៃនេះ ជាពិសេសទាក់ទងទៅនឹងការផ្ដល់និតិវិធីដែលមានប្រសិទ្ធិភាពនៅក្នុងការធ្វើបណ្ដឹងឧទ្ធរណ៍ភ្លាមៗចំពោះមុខអង្គជំនុំជម្រះតុលាការកំពូល។ នេះបើផ្អែកតាមលោកចៅក្រម គង់ ស្រ៊ីម។ តែបើផ្អែកតាមលោកស្រីចៅក្រម ស៊ីលវៀ ខាតរ៉ៃត៍ វិញ ការធ្វើវិសោធនកម្មវិធានផ្ទៃក្នុងនេះនឹងធានាដល់តុល្យភាពដល់សិទ្ធិនៃភាគីនានា ជាពិសេសសិទ្ធិរបស់ជនជាប់ចោទ៕
