ភ្ជាប់​ទៅ​គេហទំព័រ​ទាក់ទង

logo-print
ព័ត៌មាន​​ថ្មី

អ្នក​កាសែត​ក្នុង​ខេត្ត​កោះកុង​ម្នាក់​រង​ការ​ចោទ​ប្រកាន់​ពី​បទ​បរិហារកេរ្តិ៍ ក្រោយ​ធ្វើ​សេចក្តី​រាយការណ៍​ពី​វិវាទ​ដីធ្លី​​​​​​​​​​


គេហទំព័រ សារព័ត៌មាន​ «កោះកុង​ព័ត៌មាន​ទាន់​ហេតុការណ៍» (Koh Kong Hot News) ថត​កាល​ពី​ថ្ងៃ​ទី​២៨ ខែ​កញ្ញា ឆ្នាំ​២០២១។ (ថត​ពី​គេហទំព័រ kohkonghotnews.com)

អ្នកកាសែត​ម្នាក់​នៅ​ខេត្តកោះកុង​ត្រូវបាន​ស្នងការដ្ឋាន​នគរបាល​ខេត្ត​កោះកុង​បញ្ចូន​ទៅ​សាលាដំបូង​ខេត្ត​ក្រោម​បទ​ចោទ​បរិហារកេរ្តិ៍​និង​ផ្សព្វផ្សាយ​ព័ត៌មាន​មិនពិត​ក្រោយ​ពី​អ្នកកាសែត​រូបនោះធ្វើ​សេចក្តី​រាយ​ការណ៍​ព័ត៌មាន​ពាក់​ព័ន្ធ​នឹង​ការ​កាត់​ឆ្វៀល​ដី​នៅ​ក្នុង​ខេត្ត​ដែល​មានព្រំប្រទល់​ជាប់​ប្រទេស​ថៃ​មួយ​នេះ។

ការ​ចោទ​ប្រកាន់​មក​លើលោក យួន​ ឈីវ នាយក​គ្រប់គ្រង​សារព័ត៌មាន​អនឡាញ​ «កោះ​កុង​ព័ត៌មាន​ទាន់​ហេតុ​ការណ៍​» (Koh Kong Hot News) ​បន្ទាប់​ពីមានការ​ដាក់​ពាក្យ​បណ្តឹងរបស់អភិបាល​រង​ខេត្តកោះកុង​មួយរូប។

ស្នង​ការ​ប៉ូលិសខេត្ត​កោះ​កុង​លោក គង់ មនោ បាន​ប្រាប់​វីអូអេ​នៅថ្ងៃពុធនេះ​ថា​អ្នក​សារ​ព័ត៌​មាន​ឈ្មោះ​យួន​ឈីវ ​ត្រូវ​បាន​អភិបាល​រង​ខេត្ត​កោះ​កុង​លោក សុខ​ សុទ្ធី ​ប្តឹង​ពី​បទ«​បរិហាកេរ្តិ៏ និង​ផ្សាយ​ព័ត៌​មាន​មិន​ពិត» ហើយ​សំ​ណុំ​រឿង​នេះ​កំពុង​ស្ថិត​នៅ​ក្នុង​ដៃសាលាដំបូង​ខេត្តកោះកុង។

លោក​ថ្លែង​ថា៖ «ប្តឹង​បទ​បរិហា​កេរ្តិ៏​ហើយផ្សាយ​ព័ត៌មាន​មិន​ពិត»។

ពាក្យ​បណ្តឹង​របស់​អភិបាល​រង​ខេត្​តលោក​សុខ សុទ្ធី​ មក​លើ​លោក យួន ឈីវ ធ្វើ​ឡើង​ក្រោយពី​រដ្ឋបាល​ខេត្ត​កោះកុង​បាន​ចេញសេចក្តី​ប្រកាស​មួយ​កាលពី​ថ្ងៃអាទិត្យ​កន្លង​ទៅ​ដោយ​ច្រាន​ចោល​សេចក្តី​រាយការណ៍​នានា​កន្លង​មករបស់​លោក​យួន​ឈីវ។ រដ្ឋបាល​ខេត្ត​កោះកុង​បានចោទ​លោក យួន ឈីវថា​បាន​ផ្សព្វផ្សាយ​ព័ត៌មាន«ខុស​ពី​ការ​ពិត​ខ្វះ​វិជ្ជាជីវៈ ខ្វះ​ក្រម​សីលធម៌» ហើយ​ថា​អ្នក​កាសែត​រូបនោះ​ក៏ស្ថិត​ក្នុងចំណោមក្រុម​បុគ្គល​ដែល​ចូល​ទៅ​ទន្ទ្រាន​កាន់កាប់​ដី​រដ្ឋ​ដោយ​ខុស​ច្បាប់​នៅ​ក្នុង​តំបន់​ការពារ​ធម្មជាតិ​នៃ​ឧទ្យាន​ជាតិ​បូទុមសាគរ​ក្នុង​ខេត្ត​កោះកុង។

កាលពីថ្ងៃទី​២៦ ខែកញ្ញា​រដ្ឋបាល​ខេត្ត​កោះកុង​បាន​បង្ហាញ​នូវ​កាល​បរិច្ឆេទ​មួយ​ចំនួន​ដែល​បញ្ជាក់​ពី​ការ​ផ្សព្វផ្សាយ​របស់​ទំព័រ​ហ្វេសប៊ុក​ឈ្មោះ​ Koh Kong Hot News និង​គណនី​ហ្វេសប៊ុក​ឈ្មោះ យួន ឈីវ​ ដែល​កាល​ពី​ថ្ងៃទី​២១​ខែ​កញ្ញា​ ​បាន​ចុះផ្សាយ​អត្ថបទ​មាន​ខ្លឹមសារ​ថា​លោក​សុខ សុទ្ធី​ដែល​ជា​អភិបាល​រង​ខេត្ត​កោះកុង​មិន​ព្រម​ធ្វើ​តាម​ប្រមុខ​រាជ​រដ្ឋាភិបាល​ពាក់​ព័ន្ធ​នឹង​ការ​កាត់​ឆ្វៀល​ដី​ជូន​ប្រជាពលរដ្ឋ​ហើយ​អាជ្ញាធរ​ខេត្ត​កោះ​កុង​ដឹកនាំ​ដោយ​លោក​សុខ សុទ្ធី មក​កាប់​ដំណាំ​និង​ផ្ទះ​ប្រជាពលរដ្ឋ​គ្មាន​ញញើត​ដៃ​បន្ទាប់​ពី​អនុក្រឹត្យ​លេខ​៣០​អនក្រ.បក​ចុះថ្ងៃ​ទី​២ ខែ​មិថុនា​ ឆ្នាំ​២០២១។

ក្រោយ​មួយ​ថ្ងៃនៃការ​ចេញសេចក្តីប្រកាស​របស់​រដ្ឋបាល​ខេត្តកោះកុង​លោក ទៀ បាញ់​ដែល​ជា​ឧបនាយក​រដ្ឋមន្ត្រី​ផង​នោះ​បាន​ប្រាប់​អង្គភាព​ព័ត៌មាន​ Fresh News ​ថា​ការ​ផ្សព្វផ្សាយ​ព័ត៌មាន​របស់លោក​យួន​ឈីវ ជា​ព័ត៌មាន​«ខុស​ការពិត​មិន​គ្រប់ជ្រុង​ជ្រោយ​និង​បង្ក​ភាព​ចលាចល​ក្នុងសង្គម»។​

លោក​រដ្ឋមន្ត្រី​ការពារជាតិ​ទៀ បាញ់​ ត្រូវ​បាន​អង្គភាព​ព័ត៌​មាន ​Fresh News ស្រង់​សម្តី​តាម​ន័យដើមថា៖ «ធ្វើ​របាយការណ៍​ជាលាយ​លក្ខណ៍​អក្សរ​និង​ពិភាក្សា​ជាមួយ​អ្នកច្បាប់​ធ្វើ​រឿង​ហ្នឹង​ឲ្យ​បាន​ឆាប់​រហ័ស​ទាន់​ពេល​វេលា»។

មុន​ពេល​មន្ត្រី​នគរបាល​ខេត្តកោះកុង​បញ្ជូន​លោក​ យួន​ ឈីវ ​ទៅ​តុលាការ​អ្នក​កាសែត​រូបនោះ​បាន​ចេញ​លិខិត​សុំ​អភ័យ​ទោស​រដ្ឋមន្ត្រី​ក្រសួង​ការពារ​ជាតិ​លោក ទៀ បាញ់​និង​អភិបាល​ខេត្ត​កោះកុងអ្នក​ស្រី មិថុនា ភូថង​ដោយ​សុំ​ការ​អនុគ្រោះ​លើកលែង​កំហុស​ឆ្គង​ចំពោះ​ការ​ធ្វើ​សេចក្តី​រាយការណ៍​កន្លងមក​ហើយ​បា​នសន្យា​ថា​នឹង​មិន​ធ្វើ​ឲ្យ​មាន​ករណី​ខុស​ឆ្គង​នេះ​ទៀត​នោះ​ទេ។

បើ​តាមលិខិត​សុំ​អភ័យ​ទោស​ចុះថ្ងៃទី​២៧ ខែ​កញ្ញា​ ដែល​បាន​បង្ហោះ​លើ​ទំព័រ​ហ្វេសប៊ុក Koh kong Hot News [កោះកុង​ព័ត៌មាន​ទាន់ហេតុ​ការ​ណ៍] លោក​យួន​ ឈីវ ​បាន​លើក​ឡើង​ក្នុង​ន័យ​ដើមថា៖ «សូម​លើក​ការ​ចោទ​ប្រកាន់​ទោស​ដែល​ធ្វើ​ឲ្យ​ប៉ះពាល់​ដល់​ការ​បំពេញ​ការងារ​របស់​រដ្ឋបាល​សាធារណៈ​ហើយ​ខ្ញុំ​បាទ​សូម​សន្យា​ថា​នឹង​មិន​ធ្វើ​ការ​ចុះ​ផ្សាយ​ព័ត៌មាន​ដែល​មិនមាន​ប្រភព​ច្បាស់​លាស់ ដែល​ធ្វើ​ឲ្យ​ប៉ះពាល់​ដល់​កិត្តិយស​ថ្នាក់​ដឹក​នាំ និង​ឈាន​ដល់​ធ្វើ​ឲ្យ​សារធារណៈ​ជន​មាន​ការ​ភ័ន្ត​ច្រឡំ​ទៀត​ទេ»។

​លោក យួន ឈីវ ក៏​បាន​ធ្វើ​លិខិត​សុំទោសដាច់​ដោយ​ឡែកមួយ​ផ្សេងទៀតដល់​លោក សុខ​ សុទ្ធី​អភិបាល​ខេត្ត​កោះ​កុង​កាល​ពីថ្ងៃទី២៨ ខែ​កញ្ញា​ផង​ដែរ។

​អភិបាល​រង​ខេត្ត​កោះ​កុង​លោក សុខ សុទ្ធី បដិសេធ​មិន​ផ្តល់ការ​អធិប្បាយ​នៅ​ថ្ងៃពុធ​នេះ។

មន្ត្រី​ឃ្លាំ​មើល​សិទ្ធិ​មនុស្ស​របស់​អង្គការ​សិទ្ធិ​មនុស្ស​លីកាដូ​ប្រចាំ​ខេត្ត​កោះកុងលោក ហ៊ួរ​ អ៊ីន ​យល់​ថាករណី​លោក យួន​ ឈីវ​រដ្ឋាភិបាល​គួរ​មាន​ចំណាត់​ការ​ចំពោះ​អ្នក​កាសែត​ដោយ​ផ្អែក​ទៅ​លើ​របប​សារ​ព័ត៌​មាន​ជា​ជាង​ការ​ចាត់​វិធាន​ការ​តាម​ផ្លូវ​ច្បាប់​ដែល​មាន​ការ​កាត់​ទោស​លើ​អ្នក​រាយការណ៍​ព័ត៌​មាន​ដែល​តែង​ខិតខំ​ប្រឹង​ប្រែង​ផ្សព្វផ្សាយ​ព័ត៌មាន​ពិត​និង​ស្ថាន​ភាព​របស់​ប្រជា​ពល​រដ្ឋនៅ​តាម​សហគមន៍។

លោក​បន្ថែម​ថា​ជម្រើស​ប្តឹងផ្តល់​របស់​អាជ្ញាធរ​ឲ្យ​មានការ​ដាក់​ទោស​ទណ្ឌ​លើ​លោក​យួន ឈីវ​នឹង​មិន​លើក​ទឹកចិត្ត​ឲ្យ​អ្នកកាសែត​ផ្សេង​ទៀត​ហ៊ាន​ក្នុង​ការ​ធ្វើ​សេចក្តី​រាយការណ៍​បញ្ហា​រស៊ើប​ផ្សេង​ៗ​ដូច​ជាវិវាទ​ដីធ្លី​ជាដើម។

លោក​ថ្លែង​ថា៖ «ក្នុង​នាម​គាត់ ​[លោក យួន​ឈីវ] អាជ្ញាធរ​ខេត្ត​គួរ​តែ​អនុវត្ត​ទៅ​តាម​ច្បាប់​ស្តី​ពី​សារព័ត៌​មាន​ហើយ​បើ​សិន​ជា​គាត់​ធ្វើ​ខុស​សូម​ឲ្យ​គាត់​កែ​តម្រូវ​ឡើង​វិញ​ទៅ​កែ​តម្រូវ​ឲ្យ​បាន​ត្រូវ។ ហើយ​ក្នុង​នោះ​ដែរ គាត់​ក៏​បាន​សរសេរ​លិខិត​សុំ​ទោស​ចំពោះ​សម្តេច​សេនា​ធិ​ជ័យ​ចំពោះ​អភិបាល​ខេត្ត​ក៏​ដូច​ជា​អភិបាល​រង​ខេត្ត​ សុខ សុទ្ធី​ ទៅ​ហើយ​ដែរ»។

លោក​បន្ថែមថា៖ «អញ្ចឹង​កាល​ណា​យើង​មាន​ចំណាត់​ការ​ចំពោះ​អ្នក​សារព័ត៌​មាន​ដែល​រាយការណ៍អំពី​ចំណុច​អវិជ្ជមាន​នៅ​ក្នុង​ខេត្ត​កាល​ណា​យើង​មាន​ចំណាត់​ការ​តាម​ផ្លូវ​ច្បាប់​បែប​ហ្នឹង​ហើយ​បើ​សិន​ជា​មាន​ការ​ឃុំ​ខ្លួន​។ យើង​ឃើញ​ថា​ ព័ត៌មាន​ពិត​នៅ​តាម​ស្រុក​ភូមិ​ឃុំ​ផ្សេង​ៗ​ដែល​ជា​អំពើ​អវិជ្ជមាន​នឹង​មិន​ត្រូវ​បាន​រាយការណ៍​ឲ្យ​ថ្នាក់​ដឹក​នាំ​ខេត្ត​បាន​ដឹង​ទៀតទេ។ ព្រោះ​ថា​បើ​មាន​រាយ​ការណ៍​ទៅ​មាន​ការ​ខុស​ឆ្គង​ទៅ​ត្រូវ​បាន​កសាង​សំណុំ​រឿង​ទៅ​តុលាការ​ប្រឈម​នឹង​ការ​ជាប់​គុក»។

នាយក​ប្រតិបត្តិ​សមាគម​អ្នកសារព័ត៌មាន​(ខេមបូចា) លោក ​ណុប វី ទទូចឲ្យ​ថ្នាក់​ដឹកនាំទាមទារ​ការ​កែ​តម្រូវ​ការ​រាយ​ការណ៍​ព័ត៌មាន​របស់​លោក​យួន​ ឈីវ​ឲ្យ​ស្រប​ទៅតាម​ច្បាប់​ស្តីពី​របប​សារព័ត៌មាន​ជាជាង​ការ​ចាត់​វិធាន​ការ​ច្បាប់​ដែល​នឹង​មិន​លើក​ទឹកចិត្ត​ឲ្យ​អ្នក​សារព័ត៌មាន​ផ្សេង​ទៀត​បន្ត​ធ្វើ​សេចក្តី​រាយការណ៍​ព័ត៌មាន​ពាក់​ព័ន្ធ​នឹង​មន្ត្រី​មាន​អំណាច។​

លោក​ក៏​ទទូច​សុំ​ឲ្យ​អ្នកសារព័ត៌មាន​ត្រូវ​មាន​ប្រយ័ត្នប្រយែង​ក្នុងពេល​ធ្វើ​សេចក្តី​រាយ​ការណ៍​ព័ត៌មាន​ដោយ​ត្រូវ​ផ្ទៀងផ្ទាត់​ព័ត៌មាន​ដែល​ត្រូវ​រាយការណ៍​និង​ធ្វើ​យ៉ាង​ណា​ឲ្យមានតុល្យការ​នៃបន្ទុក​ព័ត៌មាន​នៅពេល​សរសេរ​អត្ថបទ​ឬ​ផ្សព្វផ្សាយ​ព័ត៌មាន​ណាមួយ​ទៅ​កាន់​សាធារណជន​ទូទៅ៕

XS
SM
MD
LG