កាលពីថ្ងៃអង្គារ ប្រទេសហ៊្សកដានី (Jordan ) បានបញ្ជាក់ថា ពួកជនសកម្មប្រយុទ្ធរដ្ឋឥស្លាម (IS) ប្រាកដជាបានសម្លាប់អ្នកបើកយន្តហោះហ៊្សកដានីម្នាក់ដែលពួកគេបានចាប់ជាចំណាប់ខ្មាំង នៅក្រោយមានការផ្សាយវីដេអូមួយតាមបណ្តាញអ៊ិនធឺណិត ដែលបានបង្ហាញថា អ្នកបើកយន្តហោះនោះ ត្រូវបានដុតទាំងរស់រហូតដល់ស្លាប់។
រូបទាំងនេះត្រូវបានផ្សាយកាលពីថ្ងៃអង្គារ ក៏ប៉ុន្តែ ទូរទស្សន៍រដ្ឋហ៊្សកដានីបាននិយាយថា លោក Muath al-Kaseasbeh បានស្លាប់តាំងតែពីថ្ងៃទី៣ ខែមករាម៉្លេះ។
នៅក្នុងការផ្សាយមួយតាមបណ្តាញ Twitter ឯកអគ្គរាជទូតនៃប្រទេសហ៊្សកដានី ប្រចាំអ.ស.ប.បាននិយាយថា «លោក Muath ដែលជាវីរបុរសរបស់យើងនឹងត្រូវរំឭកជានិច្ចជានិមិត្តរូបមួយនៃសេចក្តីក្លាហាន។ សូមព្រះអាទិទេពប្រសិទ្ធិពរជូនព្រលឹងលោកនិងជួយឲ្យលោកឋិតនៅក្នុងសន្តិភាព»។
លោកប្រធានាធិបតីស.រ.អា.បានមានប្រសាសន៍ថា ប្រសិនបើវីដេអូនេះបានត្រូវរកឃើញថាមានភាពត្រឹមត្រូវគ្មានការក្លែងបន្លំ វាជាការបញ្ជាក់មួយថែមទៀតអំពី «ភាពកាចសាហាវនិងភាពព្រៃផ្សៃ»របស់ពួករដ្ឋឥស្លាម។
លោកប្រធានាធិបតី អូបាម៉ា បានមានប្រសាសន៍ទៅកាន់ពួកអ្នកកាសែតក្នុងរយៈពេលខ្លីក្រោយការចេញផ្សាយវីដេអូនេះដែលហាក់ដូចជាបង្ហាញអ្នកបើកយន្តហោះនោះបានត្រូវដុតនៅក្នុងទ្រុងមួយ។
លោក អូបាម៉ា បានមានប្រសាសន៍ថា ប្រសិនបើត្រូវបញ្ជាក់ថាពិត វីដេអូនេះនឹង«បង្កើនការប្រុងប្រយ័ត្ននិងការប្តេជ្ញាចិត្ត»របស់ក្រុមចម្រុះដឹកនាំដោយស.រ.អា.ក្នុងការប្រយុទ្ធប្រឆាំងនឹងពួកជនសកម្មប្រយុទ្ធនៅក្នុងប្រទេសអ៊ីរ៉ាក់និងប្រទេសស៊ីរីដើម្បីធ្វើឲ្យប្រាកដប្រជាថា ក្រុមនេះនឹងថមថយកម្លាំងនិងទទួលបរាជ័យនៅទីបញ្ចប់។
លោក Kaseasbeh បានធ្វើការឲ្យក្រុមចម្រុះនៅពេលលោកត្រូវចាប់ខ្លួនកាលពីខែធ្នូ នៅក្រោយយន្តហោះប្រតិកម្មប្រយុទ្ធរបស់លោកបានធ្លាក់នៅក្នុងតំបន់មួយនៃប្រទេសស៊ីរីដែលត្រូវត្រួតត្រាដោយពួករដ្ឋឥស្លាម។
លោកឧត្តមសេនិយ Lloyd Austin ប្រធានទីបញ្ជាការកណ្តាលស.រ.អា.ដែលមើលការខុសត្រូវលើយុទ្ធនាការប្រឆាំងនឹងពួកជនសកម្មប្រយុទ្ធបានចេញផ្សាយសេចក្តីថ្លែងការណ៍មួយកាលពីថ្ងៃអង្គារថាលោក Kaseasbeh «បានបម្រើប្រទេសលោកដោយក្លាហាននិងដោយកិត្តិយស»ហើយលោកជាសមាជិកសំខាន់ម្នាក់នៃក្រុមប្រឆាំងនឹងពួករដ្ឋឥស្លាម៕
