ភ្ជាប់​ទៅ​គេហទំព័រ​ទាក់ទង

ការ​ធ្លាក់​ចុះ​នៃ​អត្រា​អត់​ការងារ​​ធ្វើ​ អាច​លើក​ស្ទួយ​លោក​ប្រធានាធិបតី​អូបាម៉ា


ប្រធានាធិបតី​សហរដ្ឋ​អាមេរិក បារ៉ាក់ អូបាម៉ា (Barack Obama) ថ្លែង​​អំពី​បញ្ហា​ការងារ​និង​សេដ្ឋកិច្ច​នៅ​ក្នុង​អំឡុង​​ពេល​លោក​ទៅ​ទស្សនា​អគារ​​មួយ​កន្លែង​ដែល​ប្រើ​ថាមពល​ដោយ​មាន​ប្រសិទ្ធភាព​ (សន្សំ​សំចៃ) ​នៅ​ជិត​សេតវិមាន​ក្នុង​រដ្ឋធានី​វ៉ាស៊ីនតោន​ កាល​ពីថ្ងៃ​ទ

ការ​ប្រកាស​កាល​ពី​ដើម​ខែធ្នូ​ ​អំពី​ការ​ធ្លាក់​ចុះ​នៃអត្រា​អត់​ការ​ងារ​ធ្វើនៅ​សហរដ្ឋ​អាមេរិក ​ពី​៩​ភាគ​រយមក​នៅ​ត្រឹម៨.៦​ភាគ​រយ ត្រូវ​បាន​ក្រុម​អ្នក​ជំនាញ​ចាត់​ទុក​ថា​ជា​កម្លាំង​ជំរុញ​ដល់​លទ្ធភាព​ជាប់​ឆ្នោត​សា​ជា​ថ្មីរបស់​លោក​ប្រធានាធិបតី បារ៉ាក់ អូបាម៉ា (Barack Obama) នៅ​ឆ្នាំ​ក្រោយ​នេះ ​ជា​ពិសេស​ ប្រសិន​បើ​អត្រា​នៃ​ការ​ធ្លាក់​ចុះ​នោះនៅ​តែ​មាន​ទំនោរ​ដដែល។

ការ​ធ្លាក់​ចុះ​នៃ​អត្រា​អត់​ការ​ងារ​ធ្វើ គឺ​ជា​ព័ត៌មាន​ផ្នែក​សេដ្ឋកិច្ច​និង​នយោបាយ​ដ៏​ប្រសើរ​បំផុតសម្រាប់​សេត​វិមាន​ ក្នុង​រយៈ​ពេល​ប៉ុន្មាន​ខែ​នេះ​ ហើយ​លោក​ប្រធានាធិបតី​ អូបាម៉ា បាន​ប្រញាប់​ប្រញាល់​គូស​បញ្ជាក់​អំពី​ភាព​ជឿន​លឿន​ទៅ​មុខ​នេះ​ នៅ​ក្នុង​អំឡុង​ពេល​នៃ​សុន្ទរកថា​មួយ​នៅ​ក្នុង​ទីក្រុង​វ៉ាស៊ីនតោន។

«ក្នុង​នាម​ជា​ប្រធានាធិបតី​ បញ្ហា​ប្រឈម​ដ៏​បន្ទាន់​បំផុត​របស់​ខ្ញុំ គឺ​ការ​ធ្វើ​អ្វីៗ​គ្រប់​បែប​យ៉ាងដែល​ខ្ញុំ​អាច​ធ្វើ​បាន ជា​រៀង​រាល់​ថ្ងៃ ដើម្បី​ធ្វើឱ្យ​សេដ្ឋកិច្ចរីក​លូត​លាស់កាន់​តែ​លឿន និង​បង្កើត​ការ​ងារធ្វើ​ឱ្យកាន់​តែ​ច្រើនថែម​ទៀត»។

ក្រុម​អ្នក​សេដ្ឋកិច្ច​ថ្លែង​ថា តួ​លេខ​ថ្មី​នេះជា​សញ្ញាណ​ដ៏​ល្អ​មួយ ប៉ុន្តែពួក​គេ​ក៏​បាន​កត់​សម្គាល់ផង​ដែរ​ថា អត្រា​អត់​ការ​ងារធ្វើ​បាន​ធ្លាក់​ចុះ មួយ​ផ្នែក​ដោយ​សារពលរដ្ឋ​អាមេរិកាំង​ជា​ច្រើន​បាន​ឈប់​ស្វែង​រកការងារ​ធ្វើ។

ក្រុម​គណបក្ស​សាធារណរដ្ឋ​ ដោយ​រាប់​បញ្ចូល​ទាំងប្រធាន​សភា​ លោក ចន បូណឺ (John Boehner) មាន​ភាព​ប្រយ័ត្ន​ប្រយែង​ចំពោះ​រឿង​នេះ។

«រាល់​ការ​បង្កើត​ការ​ងារធ្វើ​ណា​មួយ ​គឺ​ជា​ព័ត៌​មាន​គួរ​ជា​ទី​ស្វាគមន៍​ ប៉ុន្តែ​អត្រា​អត់​ការ​ងារធ្វើនៅ​ក្នុង​ប្រទេស​របស់​យើង​ គឺនៅ​តែ​មាន​កម្រិត​ខ្ពស់​ដែល​មិន​អាច​ទទួល​យក​បាននៅ​ឡើយ»។​

ក្រុម​អ្នក​ជំនាញ​ខាង​នយោបាយ​និយាយ​ថា​ បញ្ហា​សេដ្ឋកិច្ច​និង​បញ្ហា​នៃ​អត្រា​អត់​ការ​ងារ​ធ្វើ​ នឹង​ក្លាយ​ជា​បញ្ហា​គន្លឹះ​ នៅ​ក្នុង​ការ​បោះ​ឆ្នោត​ជ្រើសរើស​ប្រធានាធិបតី​ នៅ​ឆ្នាំ​ក្រោយ។

អ្នក​វិភាគ​ លោក ស្ទូអាត រ៉ូថេនប៊ឺក (Stuart Rothenberg) និយាយ​ថា​ ក្រុម​អ្នក​បោះ​ឆ្នោតនឹង​ដាក់​ឲ្យលោក​ប្រធានាធិបតី​ អូបាម៉ា​ ទទួល​ខុស​ត្រូវ​ ប្រសិន​បើ​សេដ្ឋកិច្ចនៅ​តែ​មាន​ភាព​ទន់​ខ្សោយ។

«លោក​ប្រធានាធិបតីត្រូវ​តែ​ធ្វើការ​ផ្លាស់​ប្តូរ​ស្ថានភាព​សេដ្ឋកិច្ច​ និង​ស្ថានភាព​ការងារ និង​អារម្មណ៍​ជា​រូម​របស់​ប្រទេស​នេះ​ ដែល​មាន​ភាព​លំបាក​យ៉ាង​ខ្លាំង​នៅ​ក្នុង​ការ​ធ្វើកិច្ច​ការ​នេះ។ បើ​មិន​ដូច្នេះ​ទេ ​លោក​នឹង​ត្រូវធ្វើការផ្លាស់​ប្តូរ​ចំណាប់​អារម្មណ៍ទៅ​លើ​ការ​បោះ​ឆ្នោត ដែល​ការ​បោះ​ឆ្នោត​នោះនឹងមិនមែនអំពី​ការងារទេ​ ប៉ុន្តែអំពីថា «​តើ​អ្នក​ជឿ​លើ​ក្រុម​អ្នក​សាធារណរដ្ឋនិយម​ឬ​ទេ? តើ​ក្រុម​អ្នក​សាធារណ​រដ្ឋ​និយមគួរ​ឲ្យ​ភ័យ​ខ្លាច​ខ្លាំង​ដែរ​ឬ​ទេ?» ដូច្នេះ​ លោក​មាន​ឱកាស​មួយ​ នៅ​ក្នុង​ការ​ឈ្នះ​ឆ្នោត​សារ​ជា​ថ្មី​ម្តងទៀត»។

ក្រុម​អ្នក​សាធារណ​រដ្ឋ​និយម​ ដោយ​រាប់​បញ្ចូល​ទាំង​អតីតប្រធាន​សភា​សហរដ្ឋ​អាមេរិក​ លោក ញ៉ូវ ជីនរីឆ (Newt Gingrich) ដែល​សង្ឃឹម​ថា​នឹង​ធ្វើ​ការ​តែង​តាំង​បេក្ខជន​សម្រាប់​គណបក្ស​របស់​ពួក​គេ និងឈរ​ឈ្មោះត​ទល់​ជា​មួយ​លោក អូបាម៉ា នៅ​ឆ្នាំ​ក្រោយ បាន​ផ្តោតយុទ្ធនា​ការ​របស់​ខ្លួនយ៉ាង​ខ្លាំង ទៅ​លើប្រវត្តិ​នៃ​បញ្ហា​សេដ្ឋកិច្ចរបស់​លោក​ប្រធានាធិបតី។

«ប្រសិន​បើ​លោក អូបាម៉ា ​ជាប់​ឆ្នោត​សា​ជា​ថ្មី ហើយ លោក​មានការ​ជឿ​ជាក់​ថា ភាពនិយម​កែប្រែ​ជ្រុល​ហួស​ហេតុ​របស់​លោក មាន​ភាព​ត្រឹម​ត្រូវ ទោះ​ជា​មាន​បញ្ហា​សេដ្ឋកិច្ចក្តី ទោះជា​មាន​ឱនភាព​ក្តី​ និង​ទោះ​ជា​មាន​បញ្ហា​អ្វី​ក៏​ដោយ​ក្តី​ ខ្ញុំ​មិន​អាច​ស្រមៃ​បាន​ទេ ​ថា​តើ​អាណតិ្ត​ទី​ពីរ​របស់​លោក​ នឹង​មាន​លក្ខណៈ​យ៉ាង​ដូច​ម្តេច»។

បច្ចុប្បន្ន​នេះ ​លោក ​ជីនរីឆ​ និង​អតីត​អភិបាល​រដ្ឋ​ម៉ាសាជូសេត​ (Massachusetts) លោក​ មីត រ៉ូមនី (Mitt Romney) ស្ថិត​ក្នុង​លំដាប់​ខ្ពស់​ជាង​គេ ​នៅ​ក្នុង​ការ​ស្ទាប​ស្ទង់​មតិ​ជា​សាធារណៈ​ ដែល​វាស់​ស្ទង់​ការគាំទ្រ​ចំពោះ​អ្នកប្រកួត​ប្រជែង​ដំណែង​ប្រធានាធិបតី​ចំនួន​៨​នាក់ របស់​គណបក្ស​សាធារណរដ្ឋនិយម។

លោក ស្ទីវ ម៉ាក់ម៉ាហុន (Steve​ McMahon)​ អ្នក​យុទ្ធ​សាស្រ្តនយោបាយ​របស់​គណបក្ស​ប្រជាធិបតេយ្យ ថ្លែង​ថា និន្នាការនៃ​ការ​រីក​ចំរើន​ជា​លំដាប់​ នៃតួ​លេខអត់​ការ​ងារធ្វើ នឹង​ជួយ​ផ្តល់​ឳកាស​យ៉ាង​ធំ​ធេង​ដល់​ការ​ជាប់​ឆ្នោត​សា​ជា​ថ្មី​របស់​លោក​ប្រធានាធិបតី។

«អ្វី​ដែល​សំខាន់​បំផុត​នៅ​ក្នុង​យុទ្ធនា​ការ​សម្រាប់​ដំណែង​ប្រធានាធិបតី នៅ​ទី​បញ្ចប់ នៅ​ពេល​និយាយ​អំពីបញ្ហា​សេដ្ឋកិច្ច​នោះ​គឺ​ថា «តើ​ប្រជាពលរដ្ឋ​មាន​អារម្មណ៍​ថា អ្វីៗនឹង​កាន់​តែ​ប្រសើរ​ឡើង ហើយ​ស្ថិត​នៅ​លើ​គន្លង​មួយនៃ​ភាព​កាន់​តែ​ប្រសើរ​ឡើង ឬ​តើ​ពួក​គេ​គិត​ថា អ្វីៗ​នៅ​តែ​ដដែល ឬ​កាន់​តែ​អាក្រក់​ទៅ?»

លោក ម៉ាក់ម៉ាហុន និង​ក្រុម​គណបក្ស​ប្រជាធិបតេយ្យផ្សេង​ទៀត សង្ឃឹម​ថា លោកប្រធានាធិបតី អូបាម៉ា អាច​យកគំរូ​តាម​អតីត​ប្រធានាធិបតី រ៉ូណាល់ រីហ្គេន (Ronald Reagan)។ លោក រីហ្គេន ទទួល​ជោគ​ជ័យ​យ៉ាងខ្លាំង​ក្លា ដោយបានជាប់ឆ្នោត​សា​ជា​ថ្មីនៅ​ឆ្នាំ​១៩៨៤ ទោះ​បីជា​អត្រា​អត់​ការ​ងារ​ធ្វើ​ស្ថិត​ក្នុង​កម្រិត​៧.២​ភាគ​រយ ភាគ​ច្រើន​ដោយ​សារ​ក្រុម​អ្នក​បោះ​ឆ្នោត​បាន​ជឿ​ថា ប្រទេស​នេះ​ត្រូវ​បាន​ដឹក​នាំ​នៅ​ក្នុង​ទិស​ដៅ​ដ៏​ត្រឹមត្រូវ៕​

ប្រែ​សម្រួល​ដោយ​ លី សុខឃាង

XS
SM
MD
LG