ភ្ជាប់​ទៅ​គេហទំព័រ​ទាក់ទង

រដ្ឋមន្ត្រី​ហិរញ្ញវត្ថុ​ជប៉ុន​ឈ្នះ​ការប្រកួត​ក្នុង​គណៈបក្ស​ដើម្បី​កាន់​តំណែង​ជា​នាយក​រដ្ឋមន្ត្រី​បន្តពី​លោក​ ខាន់​


លោក​ យ៉ូស៊ីហ៊ីកូណូដា​ (Yoshihiko​ Noda)​ បាននិយាយ​ទៅ​កាន់​ក្រុម​អ្នក​តាក់​តែង​ច្បាប់​ភ្លាមៗ​ក្រោយ​ពី​ការ​បោះឆ្នោត​របស់​លោក​ជា​ប្រធាន​គណៈបក្ស​​ នៅថ្ងៃទី២៩ខែសីហាឆ្នាំ២០១១។

នៅ​ក្នុង​ការ​បោះឆ្នោត​គណៈបក្ស​សារ​ជា​ថ្មី​មួយ​នៅ​ថ្ងៃ​ចន្ទ​ លោក​ យ៉ូស៊ីហ៊ីកូ​ ណូដា​ (Yoshihiko​ Noda)​ រដ្ឋមន្ត្រី​ក្រសួង​ហិរញ្ញវត្ថុ​ប្រទេស​ជប៉ុន​បាន​ឈ្នះ​លោក​ បាន់រី​ កៃអេដា​ (Banri​ Kaieda)​ រដ្ឋមន្ត្រី​ក្រសួង​ពាណិជ្ជកម្ម​ដើម្បី​ឡើង​កាន់​តំណែង​ជា​នាយក​រដ្ឋមន្ត្រី​លើក​ក្រោយ​របស់​ប្រទេស។

អ្នក​នយោបាយ​ជើង​ចាស់​ម្នាក់​អាយុ​ ៥៤​ឆ្នាំ​ ដែល​បច្ចុប្បន្ន​ជា​រដ្ឋមន្ត្រី​ក្រសួង​ហិរញ្ញវត្ថុ​ បាន​ត្រៀម​ជា​ស្រេច​ដើម្បី​ឡើង​កាន់​តំណែង​ជា​នាយក​រដ្ឋមន្ត្រី​ថ្មី​នៃ​ប្រទេស​ជប៉ុន​នៅ​ថ្ងៃ​អង្គារ។

លោក​ Yoshihiko​ Noda​ ត្រូវ​បាន​ជ្រើស​ដោយ​សមាជិក​ភាគច្រើន​នៃ​សភា​តំណាងរាស្ត្រ​ពី​ខាង​គណៈបក្ស​ប្រជាធិបតេយ្យ​របស់​ប្រទេស​ជប៉ុន​ដែល​បាន​បោះឆ្នោត​កាលពី​ថ្ងៃចន្ទ​នៅ​ទីក្រុង​តូក្យូ។

សេចក្តី​ប្រកាស​តាម​ផ្លូវការ​នៃ​គណៈបក្ស​នៅ​ក្នុង​ការ​បោះឆ្នោត​សារ​ជា​ថ្មី​ឲ្យ​ដឹង​ថា​លោក​ Noda​ បាន​ទទួល​សន្លឹក​ឆ្នោត​ ២១៥​សម្លេង​ នៅ​ពេល​លោក​ Banri​ Kaieda​ រដ្ឋមន្ត្រី​ក្រសួង​ពាណិជ្ជកម្ម​បាន​ទទួល​ ១៧៧​សម្លេង។

អតីត​រដ្ឋមន្ត្រី​ក្រសួង​ការ​បរទេស​លោក​ ស៊ៃជី​ ម៉ាអេហារ៉ា​ (Seiji​ Maehara)​ ដែល​ការ​ស្ទង់​មតិ​បាន​បញ្ជាក់​ថា​លោក​ជា​មនុស្ស​ដែល​សាធារណៈជន​ចូល​ចិត្ត​នៅ​ក្នុង​ការ​ប្រកួត​នោះ​ បាន​ជាប់​លេខ​បី​ក្នុង​ចំណោម​បេក្ខជន​៥​នាក់​នៅ​ក្នុង​ការ​បោះឆ្នោត​លើក​ដំបូង​របស់​គណៈបក្ស​នៅ​ថ្ងៃ​ចន្ទ។

គណៈបក្ស​ប្រជាធិបតេយ្យ​របស់​ប្រទេស​ជប៉ុន​ គ្រប់​គ្រង​សម្លេង​ភាគ​ច្រើន​នៅ​ក្នុង​សភា​ជាន់​ទាប​ដ៏​មាន​អំណាច​ខ្លាំង​របស់​រដ្ឋសភា​ ហេតុ​ដូច្នេះ​លោក​ Noda​ ប្រាកដ​ជា​មាន​ជ័យជំនះ​នៅ​ក្នុង​ការ​បោះឆ្នោត​ថ្ងៃ​អង្គារ​ដើម្បី​ជ្រើស​រើស​នាយក​រដ្ឋមន្ត្រី។

លោក​ Noda​ ពេញ​ចិត្ត​នឹង​ការ​តម្លើង​ពន្ធដារ​ដើម្បី​យក​ទៅ​ដោះស្រាយ​ជា​មួយ​នឹង​បំណុល​របស់​ប្រទេស​ជប៉ុន​ និង​ដើម្បី​ធ្វើ​ឲ្យ​សេដ្ឋកិច្ច​ដែល​ជិត​ស្លាប់​ បាន​រស់​ឡើង​វិញ​ គឺ​ជា​សេដ្ឋកិច្ច​ធំ​ជាង​គេ​បង្អស់​ទី​បី​របស់​ពិភពលោក។

និយាយ​ទៅ​កាន់​ក្រុម​អ្នក​តាក់​តែង​ច្បាប់​ភ្លាមៗ​ក្រោយ​ពី​ការ​បោះឆ្នោត​របស់​លោក​ជា​ប្រធាន​គណៈបក្ស​ លោក​ Noda​ បាន​សន្យា​ប្រយុទ្ធ​នឹង​បញ្ហា​ឥវ៉ាន់​ចុះ​ថ្លៃ​ និង​ទប់​ការ​ឡើង​ឥត​ឈប់​នៃ​រូបិយវត្ថុ​ជប៉ុន​ ដែល​ធ្វើ​ឲ្យ​ខូច​លក្ខណៈ​ជា​អ្នក​ប្រកួត​ប្រជែង​របស់​ប្រទេស​ជប៉ុន។

លោក​ Noda​ បាន​សន្យា​ថា​នឹង​បន្ថែម​កិច្ច​ប្រឹងប្រែង​ជា​ពីរ​ដង​ឡើង​វិញ​ទៀត​ដើម្បី​ជួយ​ប្រទេស​ជប៉ុន​ឲ្យ​ងើប​ពី​គ្រោះ​មហន្តរាយ​ធម្មជាតិ​និង​គ្រោះ​មហន្តរាយ​នុយក្លេអ៊ែរ​នៃ​ពាក់​កណ្តាល​ខែមិនា។

សេចក្តី​ភិតភ័យ​បាន​ណែនាំ​ឲ្យ​មាន​ការ​ធ្លាក់​ចុះ​នៃ​បុរស​ដែល​លោក​ Noda​ នឹង​ស្នង​គឺ​លោក​ ណៅតូ​ ខាន់​ (Naoto​ Kan)​ នាយក​រដ្ឋមន្ត្រី​ចេញ​ពី​តំណែង។​ លោក​បាន​ចុះពី​តំណែង​ជា​ប្រធាន​គណៈបក្ស​កាល​ពី​ថ្ងៃសុក្រ​ ក្រោយ​ពី​បាន​នៅ​កាន់​ការិយាល័យ​តិច​ជាង​១៥​ខែ​ដែល​បើក​ផ្លូវ​ឲ្យ​មាន​ការ​បោះឆ្នោត​របស់​គណៈបក្ស​ប្រជាធិបតេយ្យ​នៃ​ប្រទេស​ជប៉ុន។​ ប្រជាប្រិយភាព​របស់​លោក​ Kan​ បាន​ធ្លាក់ចុះ​នៅ​ពេល​ដែល​រដ្ឋាភិបាល​របស់​លោក​បាន​ព្យាយាម​ដោះស្រាយ​ជាមួយ​គ្រោះ​មហន្តរាយ​មិន​ធ្លាប់​មាន​ពី​មុន​ បី​ដង​ផ្ទួនៗ​ ដែល​បាន​យាយី​មក​លើ​ប្រទេស​ជប៉ុន​នៅថ្ងៃ​ទី១១​ខែមិនា​ គឺ​ការ​រញ្ជួយ​ផែនដី​មាន​កម្រិត​៩​កណ្តក់​សញ្ញា​សូន្យ​ដែល​ធ្វើ​ឲ្យ​កើត​មាន​ព្យុះ​រលក​យក្ស​ tsunami​ និង​ការ​រលាយ​ម៉ាស៊ីន​បង្កើត​កំដៅ​ដែល​កើត​មាន​ឡើង​តាម​កោ្រយ​មក​ទៀត​នៅ​រោងចក្រ​ឋាមពល​នុយក្លេអ៊ែរ​ Fukushima-1​ នៅ​តាម​ឆ្នេរ​សមុទ្រ។​ មហន្តរាយ​ទាំង​នេះ​បាន​បណ្តាល​ឲ្យ​មនុស្ស​ប្រមាណ​ពីរ​ម៉ឺន​នាក់​ស្លាប់​និង​បាត់​ខ្លួន។

ទោះ​ជា​យ៉ាង​ណា​ ក៏​មាន​ការ​រំពឹង​ទុក​តិច​តួច​ណាស់​ថា​ អ្នក​ស្នង​លោក​ Kan​ នឹង​ឋិត​នៅ​ក្នុង​ការិយាល័យ​ក្នុង​រយៈពេល​យូរ​នោះ។​ លោក​ Noda​ នឹង​ក្លាយ​ជា​អ្នក​ដឹកនាំ​ប្រទេស​ជប៉ុន​ទី​៦​ ចាប់​តាំង​ពី​លោក​ យូណូជីរ៉ូ​ គយហ្ស៊ូមី​ (Junuchiro​ Koizumi)​ បាន​ចេញ​ពី​តំណែង​នៅ​ក្នុង​ខែ​កញ្ញា​ឆ្នាំ​២០០៦​មក។

គណៈបក្ស​ប្រជាធិបតេយ្យ​របស់​ប្រទេស​ជប៉ុន​ត្រូវ​បាន​រំខាន​ឥត​ឈប់​ឈរ​ដោយសារ​ជម្លោះ​នយោបាយ​ផ្ទៃ​ក្នុង។​ អ្នក​វិភាគ​ខ្លះ​ទាយ​ថា​គណៈបក្ស​អាច​នឹង​បែក​គ្នា​ក្នុង​ប៉ុន្មាន​ខែ​ទៀត​នេះ។​ អ្នក​ខ្លះ​ទៀត​រំពឹង​ថា​នឹង​មាន​ការ​បោះឆ្នោត​ទូទៅ​មួយ​នៅ​ឆ្នាំ​ក្រោយ​នេះ​ ដែល​នឹង​នាំ​ឲ្យ​ក្រុម​អ្នកអភិរក្ស​នៃ​គណៈបក្ស​ប្រឆាំង​ the Liberal Democratic Party​ គឺ​គណៈបក្ស​ប្រជាធិបតេយ្យ​សេរីនិយម​ត្រឡប់​មក​កាន់​អំណាច​វិញ។​ គណៈបក្ស​ LDP​ នេះ​ បាន​គ្រប់គ្រង​ប្រទេស​ជប៉ុន​ នៅ​ក្នុង​ពេល​ភាគ​ច្រើន​នៃ​យុគ​ក្រោយ​សង្គ្រាម​លោក​លើក​ទី​ពីរ។

ប្រែ​សម្រួល​ ដោយ​ នុច សារីតា

XS
SM
MD
LG