ភ្ជាប់​ទៅ​គេហទំព័រ​ទាក់ទង

ក្រុមហ៊ុន​ជំនួញ​ជប៉ុន​ចាប់ផ្តើម​ផលិត​ទំនិញ​ឡើង​វិញ​ទោះ​ជា​នៅ​មាន​បញ្ហា​ក៏​ដោយ


កម្មករ​ជញ្ជូន​​​អីវ៉ាន់​នៅ​ឯ​ឃ្លាំង​ក្រុមហ៊ុន​សូនី ដែល​ត្រូវ​ខូតខាត​ដោយ​រលក​យក្ស​ស៊ូណាមី នៅ​ជិត​កំពង់ផែ​ក្រុង​សេនដៃ (Sendai) ប្រទេស​ជប៉ុន​កាល​ពី​ថ្ងៃ​ទី​២៣​ខែ​មីនា​ឆ្នាំ​២០១១។

ក្រុមហ៊ុន​អេឡិកត្រូនិក ​និង​ ក្រុមហ៊ុន​ផលិត​រថយន្ដ​ខ្លះ​ របស់​ប្រទេស​ជប៉ុន​បានចាប់​ផ្ដើម​ផលិតកម្ម​របស់​ខ្លួន​ឡើង​វិញ​ដែល​បាន​ត្រូវ​គាំង​មួយ​រយៈ​ចាប់​តាំង​ពី​ការផែន​ដី​រញ្ជួយ​ និង​ មហា​រលក​ស៊ូណាមី​ នៃ​ថ្ងៃ​ទី​១១​ ខែ​មីនា។ ក៏​ប៉ុន្ដែ​នៅ​មាន​ឧបសគ្គ​ជា​ច្រើន​ដល់​ក្រុមហ៊ុន​ជប៉ុន​ភាគ​ច្រើន។

នៅ​ថ្ងៃ​ពុធទី​២៣​ខែ​មីនា​ឆ្នាំ​២០១១ ក្រុមហ៊ុន​ Panasonic ក្រុមហ៊ុន ​Fujitsu ​និង​ NEC បាន​ចាប់ផ្ដើម​បើក​រោងចក្រ​អេឡិកត្រូនិក​របស់​ខ្លួន​ឡើងវិញ។ តែ​ខណៈ​ដែល​ពួកគេ​ បើក​រោង​ចក្រ​ឡើងវិញ​ក្រុមហ៊ុន​ជា​ច្រើន​បាន​បញ្ឈប់​ផលិតកម្ម​ដោយ​សារ​គេ​មិន​អាច ​ទទួល​បាន​នូវ​គ្រឿង​បន្លះ។

ក្រុមហ៊ុន​ សូនី​ បាន​បញ្ឈប់​រោងចក្រ​ប្រាំ​របស់​ខ្លួន ​រាប់​ទាំង​រោង​ចក្រ​ធ្វើទូរទស្សន៍​និង​ម៉ាស៊ីន​ថត ​ពីព្រោះ​គេ​មិនអាច​ទទួល​យក​សម្ភារៈ​បាន​សម្រាប់​គ្រឿង​បន្លះ​អេឡិកត្រូនិក។

ក្រុម​ហ៊ុន​ តូយ៉ូតា​ និង​ ហុងដា​ និយាយ​ថា​ គេ​មិន​អាច​ផ្ដើម​ផលិត​រថយន្ដ​បាន​ទេ​ យ៉ាង​ហោច​ដល់​អាទិត្យ​ក្រោយ​ ហើយ​ការ​ពន្យា​ពេល​អាច​មាន​បន្ដ​ទៅ​ទៀត។ អ្នក​នាំ​ពាក្យ​របស់​ក្រុមហ៊ុ​ន​ តូយ៉ូតា​ Paul​ Nolasco​ ពន្យល់​ថា។

«យើង​មាន​ការ​លំបាក​និង​រៀប​ចំ​ឲ្យ​មាន​ភាព​រលូន​ ក្នុង​ការ​ទទួល​យក​ការ​ផ្គត់ផ្គង់​ទៀង​ទាត់​នៃ​គ្រឿង​បន្លះ​អេឡិកត្រូនិក ​ផ្នែក​កៅ​ស៊ូ ​និង​ ផ្លាស្ទិច»។

រោងចក្រ​ធំៗ​របស់​ប្រទេស​ជប៉ុន​ មាន​ការ​ផ្គត់​ផ្គង់​សម្ភារៈ​ដ៏​ស្មុគ្រ​ស្មាញ​ ហើយ​បើ​មាន​បញ្ហា​ណា​មូយ ​វា​អាច​បញ្ឈប់​ទាំង​ស្រុង​នូវ​ប្រព័ន្ធ​ទាំងមូល។

ទោះ​ជា​ការ​រញ្ជួយ​ផែនដី​ ឬ​ រលក​ ស៊ូណាមី​ បាន​ធ្វើ​ឲ្យ​ប៉ះ​ពាល់​ផ្ទាល់ដល់ក្រុម​ហ៊ុន​អ្នក​ផ្ដល់​ការ​ផ្គត់​ផ្គង់​តែ​មួយ​ចំនួន​ក៏ដោយ​ ក៏ក្រុម​ហ៊ុន​ឯ​ទៀត​មិន​អាច​ដឹក​នាំ​សម្ភារៈ​ទៅ​ឲ្យរោង​ចក្រ​ ដោយ​សារ​ការ​បិទ​ផ្លូវ​នៅ​ទី​កន្លែង​រង​គ្រោះ​ និងការ​ខ្វះ​សាំង​នៅ​ភាគ​ខាង​កើត​នៃ​ប្រទេស​ជប៉ុន។

បញ្ហា​ទាំង​នោះ​បាន​ត្រូវ​ដោះស្រាយ​ខ្លះ ​ហើយ​មាន​ភាពប្រសើរ​ឡើង​ហើយ​នៅ​ពេល​នេះ។

ផ្លូវ​ថ្នល់​ធំ ​Tohoku​ Expressway​ ពី​ទី​ក្រុង​តូក្យូ​រហូត​ដល់​តំបន់​ភាគ​ខាង​ជើង​ប្រទេស​ជប៉ុន​ បាន​បើក​ឲ្យ​រថយន្ដ​ កាមីញ៉ុងប្រើ ​ហើយ​សមាគម​ប្រេង​កាត​ជប៉ុន​និយាយ​ថា​ ផលិតកម្ម​ប្រេងសាំងសម​នឹង​ឡើង​ដល់​ ៩០%​ នៃ​ភាព​ធម្មតា​នៅ​ចុង​សប្ដាហ៍​នេះ៕

ប្រែ​សម្រួល​ដោយ​ អ៊ូ​ ធួក

XS
SM
MD
LG