មន្រ្តីរដ្ឋាភិបាលជប៉ុនបាននិយាយថា ពួកគេនឹងអនុញ្ញាតឲ្យរោងចក្រនុយក្លេអ៊ែរដែលផ្អាកដំណើរការ អាចចាប់ផ្តើមប្រតិបត្តិការឡើងវិញ បន្ទាប់ពីឆ្លងកាត់ការធ្វើតេស្តសុវត្ថិភាពថ្មី ដើម្បីស្ទង់ពីភាពធន់របស់រោងចក្រទាំងនេះចំពោះរាល់គ្រោះមហន្តរាយធំៗ។ ការវាយតម្លៃនេះជាផ្នែកមួយនៃកិច្ចប្រឹងប្រែងស្តារការទុកចិត្តរបស់សាធារណជនចំពោះថាមពលអាតូមិច បន្ទាប់ពីគ្រោះរញ្ជួយដីនិងស៊ូណាមី កាលពីថ្ងៃទី១១ខែមិនានៅភាគឦសានប្រទេសដែលនាំឲ្យមានការលេចធ្លាយវិទ្យុសកម្មម៉ាស៊ីនរ៉េអាក់ទ័រចំនួនបី។
រដ្ឋាភិបាលប្រទេសជប៉ុននិយាយថា ការធ្វើតេស្តអំពីភាពធន់របស់រោងចក្រនឹងត្រូវអនុវត្តទៅលើរាល់ម៉ាស៊ីនរ៉េអាក់ទ័រនុយក្លេអ៊ែរទូទាំងប្រទេស។
ក្នុងពេលនិយាយទៅកាន់អ្នកសារព័ត៌មាន Yukio Edano ប្រធានអ្នកនាំពាក្យរដ្ឋាភិបាលបានពន្យល់ថា មន្រ្តីរដ្ឋាភិបាលអាចផ្តល់ការអនុញ្ញាតឲ្យចាប់ផ្តើមដំណើរការរោងចក្រនុយក្លេអ៊ែរឡើងវិញ បន្ទាប់ពីការវាយតម្លៃដំណាក់កាលទីមួយ។
Edano និយាយថា នឹងមិនមានកាលបរិច្ឆេទបញ្ចប់ការធ្វើតេស្តសុវត្ថិភាពដែលនឹងរៀបចំជាចម្បងដោយគណៈកម្មការសុវត្ថិភាពនុយក្លេអ៊ែររបស់ប្រទេសនោះទេ។លោកបាននិយាយថា រោងចក្រទាំងឡាយណាដែលនៅបន្តដំណើរការនឹងត្រូវវាយតម្លៃ ក្រោមដំណាក់កាលទីពីរដែលទូលំទូលាយជាងការធ្វើតេស្តអំពីភាពធន់។
មន្រ្តីរដ្ឋាភិបាលនិយាយថា លទ្ធផលនៃការធ្វើតេស្តអាចនាំឲ្យឈានទៅដល់ការបិទម៉ាស៊ីនរ៉េអាក់ទ័រមួយចំនួនដែលកំពុងដំណើរការបច្ចុប្បន្ន។
ការធ្វើដូចគ្នា ដែលមានលក្ខណៈបទដ្ឋានខុសពីអ្វីដែលបានស្នើដោយសហភាពអឺរ៉ុបនោះគឺដើម្បីកំណត់ថា តើស្ថានភាពរោងចក្រនុយក្លេអ៊ែរមានលទ្ធភាពឆ្លើយតបនឹងព្រឹត្តិការណ៍នានា ដូចជារញ្ជួយផែនដី ទឹកជំនន់ ការផ្ទុះ ឬការបុកដោយយន្តហោះបានល្អយ៉ាងណា។
ម៉ាស៊ីនរ៉េអាក់ទ័ររបស់ជប៉ុនចំនួន៣៥ក្នុងចំណោម៥៤មិនដំណើរការទេ។ម៉ាស៊ីនភាគច្រើនមិនដំណើរការដោយសារវាស្ថិតក្រោមការថែរក្សា ឬក៏ដោយសាររដ្ឋាភិបាលក្នុងស្រុកមិនផ្តល់ការអនុញ្ញាតឲ្យចាប់ផ្តើមប្រើប្រាស់សារជាថ្មី ដោយបារម្ភអំពីសុវត្ថិភាព។
មន្រ្តីក្នុងស្រុកមានកង្វល់ខ្លាំងជាងមុនអំពីសុវត្ថិភាពនុយក្លេអ៊ែរ បន្ទាប់ពីមានគ្រោះរញ្ជួយដីមានកម្លាំង៩កណ្តក់សញ្ញាលើជញ្ជីងរិចទ័រ កាលពីថ្ងៃទី១១ខែមិនា ហើយបង្កើតឲ្យមានស៊ូណាមីនៅតាមឆ្នេរភាគឦសាន។ គ្រោះមហន្តរាយធម្មជាតិដែលបណ្តាលឲ្យមានមនុស្សស្លាប់ និងបាត់ខ្លួនចំនួន២ម៉ឺននាក់នេះ បានធ្វើឲ្យរោងចក្រTokyo Electric's Fukushima-1 ខូចខាតយ៉ាងដំណំ។ ម៉ាស៊ីនរ៉េអាក់ទ័រ៣ក្នុងចំណោម៦បានរងគ្រោះពីការលេចធ្លាយវិទ្យុសកម្ម ហើយម៉ាស៊ីននៅមានលេចភាយជាតិវិទ្យុសកម្ម។
ឧបទ្ទវហេតុ និងការពន្យារការចាប់ផ្តើមដំណើរការម៉ាស៊ីនជាថ្មីបាននាំឲ្យមានការចាត់វិធានការសន្សំថាមពលនៅតាមតំបន់ខ្លះរបស់ប្រទេសជប៉ុន។
នៅមុនមានពេលគ្រោះមហន្តរាយកាលពីខែមិនា ថាមពលអគ្គិសនី៣០ភាគរយនៅប្រទេសជប៉ុនបានពឹងផ្អែកទៅលើរោងចក្រនុយក្លេអ៊ែរ ហើយមានបំណងថានឹងបង្កើនដល់៥០ភាគរយនៅមុនឆ្នាំ២០៣០៕
