នៅក្នុងដំណើរទស្សនកិច្ចទៅក្រៅប្រទេសជាលើកដំបូងចាប់តាំងពីចូលកាន់តំណែងជានាយករដ្ឋមន្ត្រីជប៉ុនមក លោក Yoshihide Suga បានធ្វើដំណើរទៅកាន់រដ្ឋធានីហាណូយ ប្រទេសវៀតណាមកាលពីថ្ងៃចន្ទ ដើម្បីចូលរួមក្នុងកិច្ចពិភាក្សាទ្វេភាគីជាមួយនាយករដ្ឋមន្ត្រីវៀតណាម។
ភាគីទាំងពីរ បានសម្រេចនូវកិច្ចព្រមព្រៀងមួយចំនួនទាក់ទិននឹងការពង្រឹងកិច្ចសហប្រតិបត្តិការសេដ្ឋកិច្ច និងសន្តិសុខ។
លោក Suga បានឡើងកាន់តំណែងបន្តពីលោក Shinzo Abe ដែលបានលាលែងពីតំណែងដោយសារបញ្ហាសុខភាព។
នៅក្នុងសន្និសីទសារព័ត៌មានមួយបន្ទាប់ពីបានពិភាក្សាជាមួយនាយករដ្ឋមន្ត្រីវៀតណាមលោក Nguyen Xuan Phuc មក លោក Suga បានប្រកាសពីកិច្ចព្រមព្រៀងមួយ ដែលប្រទេសជប៉ុននឹងនាំចេញសម្ភារ:យោធាទៅកាន់ប្រទេសវៀតណាម ស្របពេលដែលប្រទេសចិនកំពុងពង្រីកវត្តមានយោធារបស់ខ្លួននៅក្នុងតំបន់។
លោក Suga បានប្រាប់អ្នកកាសែតថា កិច្ចព្រមព្រៀងនេះគឺជា «ជំហានដ៏ធំមួយនៅក្នុងផ្នែកសន្តិសុខសម្រាប់ប្រទេសទាំងពីរ ដែលយើងបានសម្រេចជាគោលការណ៍នៅក្នុងការផ្ទេរឧបករណ៍យោធា និងបច្ចេកវិទ្យា»។
មេដឹកនាំទាំងពីរក៏បានឯកភាពគ្នាផងដែរលើសារៈសំខាន់នៃការរក្សាសន្តិភាព សន្តិសុខ និងសេរីភាពនៃការធ្វើនាវាចរណ៍ និងការហោះហើរនៅតំបន់សមុទ្រចិនខាងត្បូង។
លោក Phuc បាននិយាយថា៖ «ប្រទេសវៀតណាមស្វាគមន៍ប្រទេសជប៉ុន ដែលជាមហាអំណាចពិភពលោកមួយ ដើម្បីបន្តរួមចំណែកយ៉ាងសកម្មចំពោះសន្តិភាព ស្ថិរភាព និងវិបុលភាពនៅក្នុងតំបន់ និងលើពិភពលោក»។
លោក Suga បានបញ្ជាក់ថា ប្រទេសទាំងពីរក៏បានព្រមព្រៀងគ្នាផងដែរនៅក្នុងការពង្រឹងកិច្ចសហប្រតិបត្តិការដើម្បីកាត់បន្ថយផលប៉ះពាល់លើសេដ្ឋកិច្ចដែលបណ្ដាលមកពីការរាតត្បាតនៃជំងឺកូវីដ១៩ និងដើម្បីបើកទីផ្សារសេដ្ឋកិច្ចឡើងវិញឲ្យបានលឿនបំផុតតាមដែលអាចធ្វើទៅបាន។
លោក Suga បញ្ជាក់ដូច្នេះថា៖ «ថ្ងែនេះ យើងបានឯកភាពលើការបើកឡើងវិញនៃការធ្វើដំណើរដើម្បីជំនួញ ក៏ដូចជាការធ្វើដំណើរធម្មតាតាមយន្តហោះរវាងប្រទេសទាំងពីរ»៕
