លោកនាយករដ្ឋមន្រ្តីប្រទេសជប៉ុន Shinzo Abe នឹងបានទទួលកិត្តិយសដ៏កម្រមួយនៅក្នុងការអញ្ជើញទៅថ្លែងសុន្ទរកថានៅចំពោះមុខកិច្ចប្រជុំនៃសភាទាំងពីររបស់ស.រ.អា. នៅថ្ងៃពុធនេះ នៅក្នុងការបន្តទស្សនកិច្ចមួយសប្តាហ៍របស់លោកក្នុងស.រ.អា.។
លោកនាយករដ្ឋមន្រ្តី Abe បានអញ្ជើញជាភ្ញៀវកិត្តិយសនៅក្នុងពិធីលាងសាយភោជន៍ថ្នាក់រដ្ឋដ៏ឱឡារិកមួយកាលពីល្ងាចថ្ងៃអង្គារនៅក្នុងបន្ទប់ East Room នៃសេតវិមាន ដែលមានលំអទៅដោយភ្លើងពណ៌ផ្កាឈូកនិងផ្កាដើម cherry។
លោកប្រធានាធិបតី បារ៉ាក់ អូបាម៉ា បានស្វាគមន៍លោក អាបេ ដោយកំណាព្យប្រពៃណីមួយរបស់ជប៉ុន ហៅថា haiku។ លោកបានប្រើសា្រ Sake ឬស្រាសជប៉ុន ជំនួសស្រា Champagne សម្រាប់លើកកែវស្រាអបអរសាទរ។
លោក អាបេ ជានាយករដ្ឋមន្រ្តីជប៉ុនទីមួយដែលនឹងឡើងថ្លែងសុន្ទរកថានៅមុខកិច្ចប្រជុំរបស់សភាទាំងពីរ។សុន្ទរកថាដែលរំពឹងថានឹងថ្លែងនៅវេលាម៉ោង ១១ ព្រឹកថ្ងៃពុធនេះ ដែលត្រូវនិងម៉ោង ១០ យប់នៅប្រទេសកម្ពុជា នឹងមានការតាមស្តាប់យ៉ាងហ្មត់ចត់អំពីការថ្លែងយោងទៅរកអតីតកាលនៃសង្គ្រាមរបស់ប្រទេសជប៉ុន។
ប្រជាពលរដ្ឋចិននិងកូរ៉េខាងត្បូងជាច្រើននិយាយថា លោក អាបេ មិនបានសុំអភ័យទោសគ្រប់គ្រាន់ទេ ចំពោះការប្រព្រឹត្តឆ្គាំឆ្គងរបស់ជប៉ុនក្នុងសង្គ្រាម រួមមានការប្រើស្រ្តីអាស៊ីជាទាសករផ្លូវភេទនៅក្នុងសង្គ្រាមលោកលើកទីពីរ៕
