ភ្ជាប់​ទៅ​គេហទំព័រ​ទាក់ទង

រដ្ឋាភិបាល​កាន់​តំណែង​នៅ​កូឌីវ័រ​បដិសេធ​មិនសុំ​កងរក្សា​សន្តិសុខ​អ.ស.​ប​បន្ថែម


លោក ឡូរ៉ង់​ បាហ្កបូ​ (Laurent Gbagbo)

ទីក្រុងអាប៊ីហ្សង់៖ ប្រធានាធិបតី​កំពុង​កាន់តំណែង​របស់​រដ្ឋាភិបាល​ប្រទេស​កូឌីវ័រ​ បាន​ធ្វើការ​ច្រានចោល​ការអំពាវនាវ​ឲ្យ​បន្ថែម​កងរក្សា​សន្តិភាព​របស់​អង្គការ​សហប្រជាជាតិ​ ដោយ​និយាយ​ថា​ កងកម្លាំង​ទាំងអស់​គួរតែ​ចាកចេញ​ពី​ប្រទេស​នេះ ​ពីព្រោះ​កងកម្លាំង​ទាំងនោះ​កំពុងតែ​បំពាន​លើ​ភាព​អព្យាក្រិត្យ​របស់​ខ្លួន។

ការបដិសេធ​នេះ​ ធ្វើ​ឡើង​ក្រោយ​ពី​មាន​ការ​អំពាវនាវ​របស់នាយក​កងរក្សា​សន្តិភាព​របស់​អង្គការ​សហប្រជាជាតិ​ ដែល​ចង់​បាន​កងរក្សា​សន្តិភាព​ចំនួន​២.០០០​នាក់​បន្ថែម​ទៀត​នៅក្នុង​ប្រទេស​កូឌីវ័រ​ ក្នុង​រយៈពេល​ពីរ​ បី​សប្តាហ៍​ទៀត​នេះ​ ដើម្បី​ជួយ​ដោះស្រាយ​វិបត្តិ​នយោបាយ​នៅ​ប្រទេស​នេះ។

ក៏ប៉ុន្តែ​ ប្រធានាធិបតី​កំពុង​កាន់តំណែង​លោក​ ឡូរ៉ង់​ បាហ្កបូ​ (Laurent Gbagbo) មាន​ប្រសាសន៍​ថា​ កងរក្សា​សន្តិភាព​របស់​អង្គការ​សហប្រជាជាតិ​ទាំងអស់​ដែល​មាន​ចំនួន​ជិត​ ១០.០០០នាក់​ ដែល​កំពុង​ឋិត​នៅ​ក្នុង​ប្រទេស​កូឌីវ័រ​ ត្រូវតែ​ចាកចេញ​ពី​ប្រទេស​នេះ​ ពីព្រោះ​ពួកគេ​បាន​ធ្វើ​ឲ្យ​ប្រជាពលរដ្ឋ​បាត់បង់​ទំនុកចិត្ត​ និង​បាន​ចូល​ជ្រៀតជ្រែក​នៅ​ក្នុង​កិច្ចការ​ផ្ទៃក្នុង​របស់​ប្រទេស​នេះ។

លោក​ អាល់ស៊ីដេ​ ចេចចេ​ (Alcide Djedje)​ ជា​រដ្ឋមន្រ្តី​ក្រសួង​ការបរទេស​របស់​រដ្ឋបាល​លោក​បាហ្កបូ​បាន​មាន​ប្រសាសន៍​ថា​បេសកកម្ម​របស់​អង្គការ​សហប្រជា​ជាតិ​នៅ​ក្នុង​ប្រទេស​កូឌីវ័រ​ បាន​ប្រាសចាក​ពី​តួនាទី​ដើម​របស់​ខ្លួន​ ហើយ​ឥឡូវនេះ​កំពុង​ធ្វើ​ខ្លួន​ជា​អ្នក​ចូលដៃ​ជាមួយ​ក្រុមបះបោរ។ លោក​ ចេចចេថ្លែង​ថា​ រដ្ឋាភិបាល​របស់​លោក​ បាហ្កបូ​ មិន​អាច​ទទួល​បញ្ហា​នោះ​បាន​ទេ​ ហើយ​ក៏លែង​មាន​ទំនុកចិត្ត​លើ​កងរក្សា​សន្តិភាព​ផងដែរ​ ដូច្នេះ​ពួកគេ​ត្រូវតែ​ចាកចេញ​ពី​ប្រទេស​នេះ។

កងរក្សា​សន្តិភាព​ទាំងនោះ​ខ្លះ​កំពុង​យាម​សណ្ឋាគារ​នា​មណ្ឌល​កំសាន្ត​មួយ​ក្នុង​ទីក្រុង​អាប៊ីហ្សង់​ដែល​លោក​ អាឡាសាន់​ វ៉ាត់តារ៉ា​ (Alassane Ouattara)​ មិន​បាន​ចាកចេញ​តាំងពី​ គណៈ​កម្មការ​រៀបចំ​ការបោះឆ្នោត​របស់​ប្រទេស​កូឌីវ័រ​ បាន​ប្រកាស​ថា​ លោក​ជា​អ្នក​ទទួល​បាន​ជ័យជម្នះ​ ក្នុង​ការបោះឆ្នោត​ជ្រើសរើស​ប្រធានាធិបតី​កាលពី​ខែវិច្ឆិកា​នោះ​មក។ ក្រុម​អតីត​អ្នកបះបោរ​ ដែល​គាំទ្រ​លោក​ វ៉ាត់តារ៉ា​ ក៏​ឋិត​នៅក្នុង​សណ្ឋាគារ​នោះ​ដែរ​ ដែល​លោក​ ចេចចេ​ បាន​ថ្លែង​ថា​ នោះ​ជា​ការគំរាមកំហែង​ដល់​សន្តិសុខ។

លោក​ ចេចចេ​ មាន​ប្រសាសន៍​ថា កងយោធា​មិនអាច​អត់ទ្រាំ​នឹង​វត្តមាន​នៃ​កងកម្លាំង​ប្រយុទ្ធ​ ប្រដាប់​ដោយ​អាវុធ​យ៉ាងច្រើន​ចំនួន​ ៣០០នាក់​ នៅ​ឯ​សណ្ឋាគារ​ ដែល​នៅ​យ៉ាងជិត​នឹង​ទីកន្លែង​ស្នាក់នៅ​របស់​លោក​បាហ្កបូ​បាន​ទេ។​លោក​ថ្លែងថា​ ការបិទផ្លូវ​មិនឲ្យ​ចេញចូល​សណ្ឋាគារ​នោះ​ គឺ​ជា​វិធានការ​សន្តិសុខ​មួយ​ ដែល​នឹង​ដក​ចេញ​វិញ​ បើសិនណា​ក្រុមបះបោរ​ទាំងនោះ​វិល​ត្រលប់​ទៅ​ទីតាំង​របស់​ពួកគេ​នៅ​ភាគ​ខាងជើង​វិញ។

លោក​ បាហ្កបូ​ បាន​យល់ព្រម​បញ្ឈប់​ការបិទ​ផ្លូវ​ និង​ចូលរួម​ចរចា​ថែមទៀត​ដោយ​គ្មាន​ការដាក់​លក្ខខណ្ឌក្រោយ​ការចរចា​ជាមួយ​ក្រុមមេដឹកនាំ​ប្រទេស​នៅ​អាហ្វ្រិក​ខាងលិច។ តែ​ក្រុម​សម្ព័ន្ធមិត្ត​ក្នុង​តំបន់​និយាយ​ថា​ ការប្តេជ្ញា​នោះ​ មិន​អាច​ធ្វើ​ឲ្យ​ពួកគេ​ដកចេញ​នូវ​ការគំរាម​របស់​ពួកគេ​ឡើយ​ ដែលថា​ ពួកគេ​នឹង​ប្រើ​កម្លាំងទ័ព​ដក​លោក​ បាហ្កបូ​ចេញ​ បើសិនលោក​ នៅតែ​មិនព្រម​ប្រគល់​អំណាច​ទៅ​ឲ្យ​លោក​ វ៉ាត់តារ៉ា​ ទេ​នោះ។

លោក​ ចេមស៍ បេហូ (James Gbeho)​ ជា​នាយក​នៃ​សម្ព័ន្ធភាព​ ECOWAS​ ក្នុង​តំបន់​បាន​មាន​ប្រសាសន៍ថា៖

«បើសិនណា​ការដោះស្រាយ​តាម​សន្តិវិធី​មិន​អាច​សម្រេច​បាន​ទេ​នោះ​ នោះ​ការ​ប្រើ​កម្លាំង​យោធា​ អាច​ត្រូវ​លើក​យក​មក​ពិចារណា​ដើម្បី​ទុកជា​មធ្យោបាយ​មួយ​សម្រាប់​ដោះស្រាយ​ឲ្យ​បាន​ចីរភាព​ នៃ​វិបត្តិ​ក្នុង​ប្រទេស​កូឌីវ័រ»។

លោក​បេហូ​ មាន​ប្រសាសន៍​ថា​ មេដឹកនាំ​អាហ្រ្វិក​ខាងលិច​យល់​ អំពី​ភាព​គ្រោះថ្នាក់​នៃ​ការបន្ថែម​កងកម្លាំងទ័ព​ ខណៈដែល​លោក​ បាហ្កបូ​ គ្រប់គ្រង​កងទ័ពជាតិ​ដូច​នេះ។

ក៏ប៉ុន្តែ​លោក​វ៉ាត់តារ៉ា​បាន​ប្រាប់​ទូរទស្សន៍​បារាំង​មួយ​ថា​ ការអន្តរាគម​ពី​យោធា​ ក្នុង​តំបន់​ នឹង​មិន​នាំ​ឲ្យ​មាន​សង្រ្គាម​ស៊ីវិល​ជាថ្មី​ទេ​ ហើយ​លោក​ជឿ​ថា​ មេដឹកនាំ​អាហ្វ្រិក​ខាងលិច​ នឹង​ប្រើ​អ្វីៗ​ទាំងអស់​ រួមទាំង​កងកម្លាំង​ស្របច្បាប់​ផង​ ដើម្បី​ ដក​លោក​ បាហ្កបូ​ ចេញ​ពី​តំណែង។

លោក​ឆាលស៍​ ប្លេ​ ហ្កូដ​ (Charles Ble Goude) ជា​រដ្ឋមន្រ្តី​ក្រសួង​យុវជន​របស់​រដ្ឋបាល​លោក​ បាហ្កបូ​បាន​ថ្លែង​នៅ​ក្នុង​ការប្រមូលផ្តុំ​មួយ​ក្នុង​ទីក្រុង​ អាប៊ីហ្សង់​ ថា​ ការណ៍​ដែល​លោកវ៉ាត់តារ៉ា​ជឿ​ថា​ កងទ័ព​បរទេស​នឹង​មក​ប្រទេស​កូឌីវ័រ​ដើម្បី​ធ្វើ​ឲ្យ​លោក​ក្លាយ​ជា​ប្រធានាធិបតី​នោះ​គឺ​ជា​ការយល់​ខុស​មួយ។

លោក ហ្កូដ​និយាយ​ថា​ គ្មាន​កងទ័ព​ណា​ ទោះជា​ មាន​ឥទ្ធិពល​ខ្លាំង​ ប៉ុណ្ណា​អាច​មក​កូឌីវ័រ​ ដើម្បី​ដក​លោក​ ឡូរ៉ង់​ បាហ្កបូ​ ចេញ​ពី​តំណែង​ ហើយ​ប្រគល់​តំណែង​ជា​ប្រធានាធិបតី​ទៅ​ឲ្យ​លោក​វ៉ាត់តារ៉ា​ទេ។​ គេ​មិន​ត្រូវ​ប្រើ​កម្លាំងទ័ព​ទេ​ ជាពិសេស​នៅ​ទីក្រុងអាប៊ីហ្សង់​ពីព្រោះ​ក្រុម​អ្នកគាំទ្រ​លោក​ បាហ្កបូ​ នឹង​មិន​ព្រម​ឡើយ៕

ប្រែសម្រួល​ដោយ​ លី ម៉ូរីវ៉ាន់

XS
SM
MD
LG