ភ្ជាប់​ទៅ​គេហទំព័រ​ទាក់ទង

សេដ្ឋកិច្ច​​​កូដឌឺវ័រ​​កំពុង​ប៉ះ​ពាល់​ដោយ​​ទណ្ឌកម្ម​​​លើ​រដ្ឋា​ភិបាល​​បច្ចុប្បន្ន


ក្រុម​សន្តិសុខ​ត្រៀម​ការពារ​សន្តិសុខ​ពេល​អតិថិ​ជន​ដ៏ច្រើន​មក​បើក​ប្រាក់​ខែ​របស់​ពួកគេ​នៅ​ទី​ស្នាក់​ការ​ធំ​នៃ​ធនាគារ​​ ប៊ីស៊ីស៊ី​ក្នុង​ទី​ក្រុង​អាប៊ីហ្សាន​ កាល​ពី​ថ្ងៃ​ទី ​៣​ ខែ​មិនា​ ឆ្នាំ​ ២០១១។

ការដាក់​ទណ្ឌកម្ម​សេដ្ឋកិច្ច​ទៅ​លើប្រទេស​កូដឌឺវ័រ​កំពុងប៉ះពាល់ដល់​វិស័យ​ជំនួញ​នៅ​ក្នុង​ប្រទេស​ផលិត​កាកាវ​យ៉ាង​ធំ​មួយ​នៅ​ក្នុង​ពិភពលោក។​ ប៉ុន្តែ​រដ្ឋាភិបាល​ដែល​កំពុង​កាន់​អំណាចបច្ចុប្បន្ន​មាន​លទ្ធភាព​បើក​ប្រាក់​បៀវត្សរ៍​ឲ្យ​ទាហាន​និង​មន្ត្រី​រដ្ឋការ​បន្ទាប់​ពី​ធ្វើ​ជាតូបនីយកម្មធនាគារបរទេស។

មាន​មន្ត្រី​រដ្ឋការរាប់​ពាន់នាក់​ ឈរ​តម្រង់​ជួរ​នៅ​តាម​បណ្តោយផ្លូវ​ Rue des Banques នៃ​ទីក្រុង​អាប៊ីហ្សាន​ដោយ​រង់ចាំ​បើក​ប្រាក់​បៀវត្សរ៍​ខែ​កុម្ភៈ​របស់​ពួក​គេ។ នៅ​ពេលដែល​ធនាគារ​បរទេស​បាន​បិទ​ទ្វារ​កាល​ពី​ខែ​មុន​ដោយសារ​តែ​ទណ្ឌ​កម្ម​របស់​តំបន់ទៅ​លើ​លោក​ប្រធានាធិបតី​បច្ចុប្បន្ន​ឡូរ៉ង់ បាកបូ (Laurent Gbagbo) រដ្ឋាភិបាល​របស់​លោក​ បាន​ប្រឈម​មុខ​ទៅ​នឹង​បញ្ហា​លំបាក​ខាង​សេដ្ឋកិច្ច​ដ៏​ធំ​បំផុត​ក្នុង​ការស្វែង​រក​ប្រាក់សុទ្ធ​ដើម្បី​បើក​ឲ្យ​បុគ្គលិក ជា​ពិសេសទាហាន។

រដ្ឋាភិបាល​របស់​លោក​បាកបូ​បាន​កាន់កាប់​បន្តទៅ​លើ​ធនាគារ​ទាំង​អស់​នោះ​យ៉ាង​ឆាប់​រហ័ស​ហើយ​បើក​ធនាគារ​នោះ​ឡើង​វិញ​ក្នុង​សប្តាហ៍​នេះ​ដែល​ចំ​ពេលការបើក​ប្រាក់​បៀវត្សរ៍​ចំនួន​៨០​ភាគរយ​នៃ​ប្រាក់បៀវត្សរ៍​ធម្មតា​របស់​មន្ត្រី​រដ្ឋការទាំង​អស់។

«កិច្ចការ​នោះ​ជោគជ័យ​យ៉ាង​ខ្លាំង។ ខ្ញុំ​ជឿ​ជាក់​ថា ពួក​គេ​នឹង​អាច​ធ្វើ​កិច្ច​ការ​នោះ​បាន»។

លោក​អ៊ី​ប្រា​ហ៊ីម កាឡូ (Ibrahim Kalo) គ្រូ​បង្រៀន​ភាសា​អង់គ្លេស​និយាយ​ថា​វិធានការរបស់​ធនាគារ​កណ្តាល​ក្នុង​តំបន់​ដើម្បី​កាត់ផ្តាច់​ពី​រដ្ឋាភិបាល​របស់​លោក​បាកបូ​គឺជា​បញ្ហា​ប្រឈម​មួយ​ចំពោះប្រជាពលរដ្ឋ​កូដឌឺវ័រ​ទាំងអស់​នោះ​ជា​បញ្ហា​ប្រឈម​មួយ​ដែល​កំពុង​តែជួបប្រទះ។

«ខ្ញុំគិត​ថា នេះ​ជា​ប្រតិបត្តិការ​មួយ​ដើម្បី​ធ្វើឲ្យ​រដ្ឋាភិបាល​កូដឌឺវ័រ (Cote d'Ivoire) ជួប​គ្រោះ​ថ្នាក់។ ប៉ុន្តែ ខ្ញុំ​គិត​ថា​ ពួក​គេ​អាច​បើក​ប្រាក់​បៀវត្សរ៍​ឲ្យ​យើង។ ដូច្នេះ​ហើយ​ទើប​ឥឡូវ​នេះ​យើង​ឈរ​តម្រង់​ជួរ។ អ្នក​អាច​មើល​ឃើញមនុស្ស​ឈរ​ជា​ជួរ​យ៉ាង​វែង នៅ​តាម​ធនាគារ​ទាំង​អស់​នៅ​ទីនេះ ដើម្បី​រង់ចាំ​បើកប្រាក់បៀវត្សរ៍ ហើយ​ពួកគេ​នឹង​ត្រូវ​ទទួល​ប្រាក់​នោះ។ អ្នក​អាច​ប្រាកដ​ក្នុង​ចិត្ត​ចំពោះ​ការបើក​ប្រាក់​នោះ។ គ្មាន​បញ្ហា​អ្វី​ទេ»។

លោក វីនសេឡាស អាភីយ៉ា (Winceslas Appia) ជា​អ្នកគ្រប់​គ្រង​ទូទៅ របស់​ធនាគារ​ផ្តល់​ហិរញ្ញវត្ថុ​ដល់​កសិកម្ម​នៅ​ទីក្រុង​អាប៊ីហ្សាន។

លោក អាភីយ៉ា ​និយាយ​ថា​ មាន​ប្រាក់​គ្រប់គ្រាន់​ល្មម ដើម្បីបើកឱ្យអ្នកទាំងអស់​គ្នា។ ដូច្នេះ​គេ ​គ្រប់​រូប គួរ​រក្សា​ភាពស្ងប់​ស្ងៀម។ លោក​ថ្លែង​ថា ធនាគារ​ បាន​ដាក់​ចេញ​វិធានការ​ជាច្រើន​ដើម្បី​ពង្រឹង​បុគ្គលិក​របស់​ពួកគេ ​ដូច្នេះ​ពលរដ្ឋ​គ្រប់រូប​ នឹង​ត្រូវ​បាន​ផ្តល់​សេវាជូន។

ការដក​ប្រាក់​ផ្ទាល់​ខ្លួន ត្រូវ​កម្រិត​នៅ​ត្រឹម​ប្រហែល​៤២៥​ដុល្លារ​ក្នុង​មួយ​ថ្ងៃ។ លោក ដេសៀ ដាឡូ (Desire Dallo) រដ្ឋមន្ត្រី​សេដ្ឋកិច្ចនិង​ហិរញ្ញវត្ថុ​ របស់​លោក​បាកបូ បាន​ឲ្យ​ដឹង​ថា ការដាក់​កម្រិត​ទាំងនោះ​សំដៅ​ជួយ​ឲ្យប្រព័ន្ធ​ធនាគារអាច​សង​បំណុល​បាន។

លោក ដាឡូ ​កំពុង​ស្នើ​សុំ​ឲ្យ​ពលរដ្ឋ​កុំ​ដក​ប្រាក់​ទាំងអស់​របស់​ពួកគេ ​ដោយសារតែ​ប្រព័ន្ធ​ធនាគារ អាច​ដំណើការ​បាន លុះ​ណា​តែមាន​តុល្យភាព​រវាងប្រាក់បញ្ញើ និង​ប្រាក់​កម្ចី។ លោក ដាឡូ ថ្លែង​ទៀត​ថា វា​ច្បាស់​ណាស់​ថា ពលរដ្ឋ​មាន​ការព្រួយ​បារម្ភ​ថា ធនាគារ​នឹង​បិទ​ទ្វារ​ម្តង​ទៀត។ ប៉ុន្តែ លោក​និយាយ​ថា ឥឡូវ​នេះ ធនាគារ​ទាំង​នេះ​គ្រប់​គ្រង​ដោយរដ្ឋ ដែល​នឹង​មិន​ដួល​រលំ​ទេ ដូច្នេះ​ម្ចាស់​គណនេយ្យ​ធនាគារ មិន​គួរ​ភ័យ​ស្លន់ស្លោរ​ ហើយ​ដក​សាច់​ប្រាក់​របស់​ពួក​គេ​ទាំង​អស់​នោះ​ឡើយ ដោយសារ​តែ​ថា ការធ្វើ​បែប​នោះនឹង​មិន​អាចជួយ​ស្រោច​ស្រង់​ទេ។

ទណ្ឌកម្ម​សេដ្ឋកិច្ច​ ធ្វើ​ឡើង​សំដៅបណ្តេញលោក​បាកបូ ​ចេញ​ពី​អំណាច ​បន្ទាប់​ពី​លោក​បាន​អះ​អាង​ពី​ការឈ្នះ​ឆ្នោត​ឡើងវិញ​ នៅ​ក្នុង​ការ​បោះ​ឆ្នោត​តំណែង​ប្រធានាធិបតី​ដ៏​ចម្រូង​ចម្រាស់​កាល​ពី​ខែវិច្ឆិកា​មុន។ ក្រុម​ប្រឹក្សា​រដ្ឋ​ធម្មនុញ្ញ បាន​ទុក​ជា​មោឃៈ​នូវ​សន្លឹក​ឆ្នោតជិត​១០​ភាគរយ ​ដែល​ថា​មាន​ការ​បន្លំ​នោះ។ គណៈកម្មា​ធិការ​រៀប​ចំ​ការបោះ​ឆ្នោតរបស់​កូដឌឺវ័រ ​និង​អង្គការ​សហប្រជា​ជាតិ​ បាន​បញ្ជាក់​លទ្ធផល​ថា លោក​អតីត​នាយក​រដ្ឋ​មន្ត្រី អាឡាសាន វ៉ាត់តារ៉ា (Alassane Ouattara) បាន​ឈ្នះ​ការបោះ​ឆ្នោត​នោះ។

ការអំពាវ​នាវ​របស់​លោក​ វ៉ាត់តារ៉ា ដែល​សុំ​ឲ្យ​មាន​ការហាម​ឃាត់​ការនាំ​ចេញ​កាកាវ បាន​ធ្វើ​ឲ្យ​ឧស្សាហកម្ម​នោះ​ភាគ​ច្រើន​បំផុត ជាប់​គាំង ដោយ​បាន​រាំង​ខ្ទប់រដ្ឋាភិបាលលោក ​បាកបូ នូវ​ប្រភពប្រាក់​ចំណូល​ពន្ធ​ដ៏​សំខាន់។ ទណ្ឌកម្ម បាន​ធ្វើឲ្យ​ខ្វះខាត​ឧស្ម័ន​សម្រាប់ចម្អិន​អាហារ និងការដួល​រលំនៃ​ដំណើការផ្ទេរ​សាច់​ប្រាក់​និង​កាត​ឥណ​ទាន ដោយ​បណ្តាល​ឲ្យ ​កូដឌឺវ័រ ក្លាយ​ជា​សេដ្ឋកិច្ចពឹង​ផ្អែកលើ​សាច់​ប្រាក់​សុទ្ធ។

លោក មួគតារ បាហ៍ (Mouctar Bah) អ្នក​ជំនួញ​ជាតិ​សេណេហ្កាល់ លក់​ទូរស័ព្ទ​ចល័ត នៅ​សង្កាត់​ត្រេឆវៀល (Treichville) នៃ​ទីក្រុង​អាប៊ីហ្សាន។

លោក បាហ៍ និយាយ​ថា ក្រុមអ្នករកស៊ី​ជាតិ​សេណេហ្កាល់ ​ស្ថិត​នៅ​ក្នុង​ប្រទេស​កូដឌឺវ័រ ​នៅ​ពេល​មាន​ស្ថានភាព​ល្អ​ប្រសើរ។ ឥឡូវ​នេះ គ្មាន​អ្វី​ដំណើការ​សោះ។ គ្មាន​ភ្នាក់ងារ​វេសស្ទើន​យូ​ញៀន (Western Union) ឬ​ធនាគារ​ដើម្បី​ផ្ទេរ​ប្រាក់​ឡើយ។ លោក បាហ៍ ថ្លែង​ទៀត​ថា អ្នករកស៊ី ​មិនមែន​អ្នក​នយោបាយ​ទេ ដូច្នេះនៅ​ពេល​ជំនួញ​មិន​ដំណើការ​ទេ ពួកគេ​ក៏ចាកចេញ​ទៅ។

នៅ​ឯ​ស្ថានីយ៍​ប្រេង​ឥន្ធនៈ​តូតាល់ ​នៅ​តាម​បណ្តោយមហា​វិថី ឧត្តម​សេនីយ៍​ឌឺហ្គោល (du General DeGaulle​) អ្នកបើកបរ​យាន​យន្ត ​មិន​ត្រូវ​បាន​អនុញ្ញាត​ឲ្យ​ទិញ​ប្រេង​ដាក់​ប៊ីដុង​ទេ។ នោះ​ជា​ផ្នែក​មួយ​នៃ​យុទ្ធនាការ​របស់​រដ្ឋាភិបាល ​ក្នុង​ការទប់​ស្កាត់​ការកើន​ឡើង​ខ្លាំង ក្នុង​ខណៈ​ដែលរោងចក្រ​ចម្រាញ់ប្រេង​របស់​ទីក្រុង​អាប៊ីហ្សាន​ កំពុង​កាត់បន្ថយ​ការផលិត ​ដោយសារ​តែ​រោង​ចក្រនេះ​ កំពុង​មាន​បញ្ហា​ក្នុង​ការទិញ​ប្រេង​ឆៅ។

ក្រុម​គាំ​ទ្រ​លោក​ វ៉ាត់តារ៉ា និយាយថា ទណ្ឌ​កម្ម​ទៅ​លើ​លោក បាកបូ កំពុង​មាន​ប្រសិទ្ធភាព ​បើ​ទោះ​ជា​ទណ្ឌ​កម្ម​នោះ​ហាក់​មាន​សភាព​យឺត​ជាង​ការ​រំពឹង​ទុក​ក៏​ដោយ។

លោក បាម​បា ម៉ាសានី (Bamba Massany) សមាជិក​សភា​គាំ​ទ្រ​លោក បាកបូ មាន​ប្រសាសន៍​ថា​ ពលរដ្ឋ​កូដឌឺវ័រ ​នឹង​គ្មាន​ការព្រួយ​បារម្ភ​ដោយ​សារ​តែ​សហគមន៍​អន្តរ​ជាតិ​នោះ​ឡើយ។

លោក​ ម៉ាសានី បាន​ឲ្យ​ដឹង​ទៀត​ថា ទណ្ឌ​កម្ម​ទៅ​លើ​រដ្ឋាភិបាល​របស់​លោក បាកបូ ជា​អំពើ​អមនុស្ស​ធម៌ ​និង​មិន​សម​ហេតុ​ផល។ ឥឡូវ​នេះ​គឺជាពេល​សម្រាប់​ប្រជាពលរដ្ឋក្នុង​ការជួយ​រដ្ឋាភិបាល​ដូច​ដែល​លោក ម៉ាសានី​ បាន​និយាយ​ថា​រដ្ឋាភិបាលកំពុង​ធ្វើការ​ដើម្បី​ពង្រឹង​មូលដ្ឋានសេដ្ឋកិច្ច​របស់​កូដឌឺវ័រ៕

ប្រែសម្រួលដោយ លី សុខឃាង

XS
SM
MD
LG