ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

ប្រធាន​កាកបាទ​ក្រហម​អ៊ីតាលី៖ សូមកុំ​ចាត់​ទុក​ជន​អន្តោប្រវេសន៍​ថា​ «ខុស​ច្បាប់»


ប្រធាន​កាកបាទ​ក្រហម​អ៊ីតាលី​ លោក​ Francesco Rocca និយាយ​នៅ​ឯ​អង្គការ​សហប្រជាជាតិ​ កាល​ពី​ថ្ងៃ​ទី​៦ ខែ​ឧសភា​ ឆ្នាំ​២០១៥។
ប្រធាន​កាកបាទ​ក្រហម​អ៊ីតាលី​ លោក​ Francesco Rocca និយាយ​នៅ​ឯ​អង្គការ​សហប្រជាជាតិ​ កាល​ពី​ថ្ងៃ​ទី​៦ ខែ​ឧសភា​ ឆ្នាំ​២០១៥។

ប្រធាន​កាកបាទ​ក្រហម​អ៊ីតាលី​ លោក​ Francesco Rocca បាន​ប្រាប់​អ្នក​សារព័ត៌មាន​ថា​ ចាប់​តាំង​ពី​ដើម​ឆ្នាំ​នេះ​មក​ មាន​មនុស្ស​ជាង​៣៥០០០​នាក់​ មក​ពី​អាហ្រ្វិក​ខាង​ជើង​ និង​មជ្ឈិម​បូព៌ា​ បាន​ព្យាយាម​ធ្វើ​ដំណើរ​ដ៏គ្រោះ​ថ្នាក់​ឆ្លង​កាត់​សមុទ្រ​មេឌីទែរ៉ានេ​ ដើម្បី​ស្វែង​រក​ការការពារ​នៅ​ក្នុង​ទ្វីប​អឺរ៉ុប។ មាន​មនុស្ស​ប្រហែល​១​៨០០នាក់​បាន​ស្លាប់​នៅ​ក្នុង​ការធ្វើ​ដំណើរ​នោះ។

ប្រទេស​អ៊ីតាលី​ កងទ័ព​ជើង​ទឹក​ និងឆ្មាំ​សមុទ្រ​របស់​ខ្លួន​ បាន​ស្ថិត​នៅ​ជួរ​មុខ​គេនៃ​វិបត្តិ​នេះ។ កាល​ពី​ឆ្នាំ​មុន​ ពួកគេ​បាន​សង្គ្រោះ​ជនអន្តោប្រវេសន៍ជាង ១៦​០​ ០០០​នាក់​ពី​សមុទ្រ។

លោក​ Rocca បាន​និយាយ​ថា​ ត្រូវ​តែ​មាន​ការ​រក​វិធី​ស្រប​ច្បាប់​មួយ​ សម្រាប់​អ្នក​ដែល​ព្យាយាម​រត់​គេច​ចេញ​ពី​ជម្លោះ​ និង​ការគាប​សង្កត់​ដែល​កើត​មាន​នៅ​ក្នុង​ប្រទេស​របស់​ពួកគេ។

«តើ​អ្នក​អាច​បញ្ឈប់​ម្តាយ​ម្នាក់ ​ដែល​ព្យាយាម​ជួយ​សង្គ្រោះ​កូន​ស្រី​របស់​ខ្លួន​នៅ​ក្នុង​ប្រទេស​នីហ្សេរីយ៉ា​បាន​យ៉ាង​ដូច​ម្តេច?​ តើ​អ្នក​អាច​បញ្ឈប់​ឳពុក​ម្នាក់​ ដែល​បាន​បាត់​បង់​កូន​ប្រុស​ម្នាក់​ទៅ​ហើយ​នោះ​ ហើយ​កំពុង​ចង់​ជួយ​កូនៗ​ដទៃទៀត​ឲ្យ​ចាក​ចេញ​ពី​ប្រទេស​ស៊ីរី​បាន​យ៉ាង​ដូច​ម្តេច?»

កិច្ច​ខំ​ប្រឹង​ប្រែង​របស់​អឺរ៉ុប​ក្នុង​ការ​បញ្ឈប់​លំហូរ​នៃ​ជន​អន្តោប្រវេសន៍​បាន​ផ្តោត​ទៅ​លើប្រទេស​លីប៊ី ដែល​ធ្លាក់​ក្នុង​ភាព​ចលាចលនយោបាយ​ និង​ជម្លោះ ​ដែល​នេះ​បាន​បើក​ផ្លូវ​ឲ្យ​ក្រុម​ជួញ​ដូរ​លួច​នាំ​មនុស្ស​ចូល​ទៅ​កាន់​ទ្វីប​អឺរ៉ុប។

នាយករដ្ឋមន្ត្រី​អ៊ីតាលី​ លោក​ Matteo Renzi ​បាន​ស្នើ​ឲ្យ​បំផ្លាញ​ទូក​របស់​ក្រុម​ជួញដូរ​មនុស្សទាំង​នោះ​ នៅ​មុន​ពេល​ទូក​ទាំង​នោះផ្ទុក​ពេញ​ទៅ​ដោយ​ជន​អន្តោប្រវេសន៍​ ដែល​ជា​វិធី​បង្ការមួយ​ដើម្បី​បញ្ឈប់​ក្រុម​ជួញដូរ​ទាំង​នោះ​។

ប្រធាន​កាកបាទ​ក្រហម លោក​ Rocca ហាក់​ដូច​ជា​មាន​មន្ទិល​សង្ស័យ​ចំពោះ​ប្រសិទ្ធភាព​នៃ​វិធី​នេះ។

«សម្រាប់​ពួក​យើង​ ​ការ​បំផ្ទុះ​ទូក​នោះ ​មិន​មែន​ជា​ដំណោះស្រាយ​ទេ។ យើងត្រូវ​តែ​បញ្ជាក់​ឲ្យ​បាន​ច្បាស់​លាស់​ ពីព្រោះ​ក្រុម​ជួញដូរ​ទាំង​នោះ​នឹង​រក​ផ្លូវ​ផ្សេង​ទៀត»។​

លោក​បាន​និយាយ​ថា​ ពួក​អ្នក​លួច​នាំ​មនុស្ស​ទាំង​នោះ​ មិន​មែន​មាន​តែ​នៅ​ប្រទេស​លីប៊ី​តែ​មួយ​នោះ​ទេ​ ប៉ុន្តែ​ពួកគេ​ក៏​កំពុង​មាន​ភាព​សកម្ម​រួច​ទៅ​ហើយ​នៅ​ក្នុង​ប្រទេស​អេហ្ស៊ីប​ ស៊ូដង់​ តួកគី​ លីប៊ង់ និង​តំបន់​បាល់កង់ (Balkans)​ផង​ដែរ៕

ប្រែ​សម្រួល​ដោយ​ នូវ​ ពៅ​លក្ខិណា

XS
SM
MD
LG