យន្តហោះចម្បាំងអ៊ីស្រាអែលបានវាយប្រហារលើគោលដៅនានានៅទូទាំងតំបន់ហ្កាហ្សា (Gaza) កាលពីយប់មិញនិងឈានចូលដល់ថ្ងៃអាទិត្យ ក៏ដូចជាលើអាកាសយានដ្ឋានពីរកន្លែងនៅក្នុងប្រទេសស៊ីរីនិងវិហារអ៊ិស្លាមមួយកន្លែងដែលក្រុមសកម្មប្រយុទ្ធបានប្រើប្រាស់នៅក្នុងតំបន់វែសប៊ែងដែលជាតំបន់កាន់កាប់ដោយអ៊ីស្រាអែលនៅពេលដែលសង្គ្រាមរយៈពេលពីរសប្ដាហ៍ជាមួយនឹងក្រុមហាម៉ាស់នេះបង្កហានិភ័យនៃការវិវត្តចូលទៅក្នុងសង្គ្រាមធំជាងនេះ។ នេះបើយោងតាមសេចក្ដីរាយការណ៍របស់ទីភ្នាក់ងារសារព័ត៌មាន AP។
អ៊ីស្រាអែលបានបាញ់បោះទៅវិញទៅមកជាមួយនឹងក្រុមសកម្មប្រយុទ្ធហេសបូឡា (Hezbollah) ស្ទើរតែរាល់ថ្ងៃតាំងពីពេលដែលសង្គ្រាមរវាងអ៊ីស្រាអែលនិងក្រុមហាម៉ាស់បានចាប់ផ្ដើមមក ហើយភាពតានតឹងកំពុងកើនឡើងនៅក្នុងតំបន់តំបន់វែសប៊ែង (West Bank) ដែលនៅទីនោះកងកម្លាំងអ៊ីស្រាអែលបានប្រយុទ្ធជាមួយនឹងក្រុមសកម្មប្រយុទ្ធនៅតាមជំរំជនភៀសខ្លួននិងបានធ្វើការវាយប្រហារតាមអាកាសពីរលើកក្នុងពេលប៉ុន្មានថ្ងៃចុងក្រោយនេះ។
អស់រយៈពេលជាច្រើនថ្ងៃមកហើយ អ៊ីស្រាអែលហាក់ដូចជាជិតធ្វើការលុកលុយតាមផ្លូវគោកចូលក្នុងតំបន់ហ្កាហ្សានៅក្នុងផ្នែកមួយនៃការឆ្លើយតបរបស់ខ្លួនចំពោះការឆ្មក់វាយប្រហារដ៏ប្រល័យរបស់ក្រុមហាម៉ាស់លើអ៊ីស្រាអែលកាលពីថ្ងៃទី៧ ខែតុលាកន្លងទៅនេះ។ រថក្រោះនិងទាហានរាប់ម៉ឺននាក់បានប្រមូលផ្ដុំនៅតាមព្រំដែន ហើយថ្នាក់ដឹកនាំអ៊ីស្រាអែលបាននិយាយអំពីដំណាក់កាលបន្ទាប់ដែលមិនទាន់កំណត់នៅឡើយនៅក្នុងប្រតិបត្តិការនេះ។
ប៉ុន្តែ យោធាអ៊ីស្រាអែលបានទទួលស្គាល់ថាជនស៊ីវិលប៉ាឡេស្ទីនរាប់សែននាក់កំពុងស្ថិតនៅក្នុងផ្នែកភាគខាងជើងនៃតំបន់ហ្កាហ្សានៅឡើយ បើទោះបីជាមានបញ្ជាឱ្យមានការជម្លៀសចេញទាំងស្រុងក៏ដោយ ដែលករណីនេះនឹងធ្វើឱ្យស្មុគស្មាញដល់ការវាយប្រហារតាមផ្លូវគោកណាមួយ។
ជាងនេះទៀត ហានិភ័យនៃការបង្កឱ្យមានសង្គ្រាមធំជាងនេះជាមួយនឹងសម្ព័ន្ធមិត្តរបស់ក្រុមហាម៉ាស់នៅក្នុងប្រទេសលីបង់និងប្រទេសស៊ីរីក៏ប្រហែលជាអាចពន្យារពេលដល់ការលុក លុយរបស់អ៊ីស្រាអែលតាមផ្លូវគោកចូលក្នុងតំបន់ហ្កាហ្សានេះផងដែរ។
កាលពីថ្ងៃសៅរ៍ រថយន្តដឹកជំនួយមនុស្សធម៌ចំនួន២០គ្រឿងត្រូវបានអនុញ្ញាតឱ្យចូលក្នុងតំបន់ហ្កាហ្សាពីប្រទេសអេហ្ស៊ីបតាមច្រកឆ្លងកាត់ទីក្រុង Rafah ដែលនេះគឺជាលើកដំបូងបង្អស់ដែលមានការអនុញ្ញាតឱ្យចូលក្នុងតំបន់ហ្កាហ្សាតាំងពីពេលដែលអ៊ីស្រាអែលបានធ្វើការហ៊ុមព័ទ្ធតំបន់នេះកាលពីពីរសប្ដាហ៍មុនមក។
បុគ្គលិកជំនួយមនុស្សធម៌បាននិយាយថាជំនួយទាំងនេះគឺមានចំនួនតិចតួចប៉ុណ្ណោះក្នុងការដោះស្រាយវិបត្តិមនុស្សធម៌ដែលកាន់តែរីកធំឡើងនៅក្នុងតំបន់ហ្កាហ្សាដែលនៅទីនោះ ពលរដ្ឋចំនួនពាក់កណ្ដាលនៃប្រជាជនសរុបចំនួន២លាន៣សែននាក់បានរត់ភៀសខ្លួនពីផ្ទះសម្បែងរបស់ពួកគេ។
ទីភ្នាក់ងារជំនួយមនុស្សធម៌អង្គការសហប្រជាជាតិដែលគេស្គាល់ថា OCHA បានបញ្ជាក់ថា ក្បួនរថយន្តបានដឹកជំនួយមនុស្សធម៌ប្រហែល៤%ប៉ុណ្ណោះនៃជំនួយនាំចូលជាមធ្យមប្រចាំថ្ងៃមុនពេលសង្គ្រាមនេះបានចាប់ផ្ដើមនិង«មួយចំណែកនៃអ្វីដែលត្រូវការប៉ុណ្ណោះបន្ទាប់ពីមានការហ៊ុមព័ទ្ធទាំងស្រុងអស់រយៈពេល១៣ថ្ងៃកន្លងមកលើតំបន់ហ្កាហ្សា»។
យោធាអ៊ីស្រាអែលបានបញ្ជាក់ថាស្ថានភាពមនុស្សធម៌គឺ«អាចគ្រប់គ្រងបាន»ស្របពេលដែលទីភ្នាក់ងារ OCHA បានអំពាវនាវឱ្យមានការអនុញ្ញាតឱ្យរថយន្តដឹកជំនួយមនុស្សធម៌ចំនួន១០០គ្រឿងចូលទៅក្នុងតំបន់ហ្កាហ្សាក្នុងមួយថ្ងៃៗ៕
ប្រែសម្រួលដោយលោក ភី សុភាដា
